Read Fulfulded 1 Makabe 8 Bible Online

1 Makabe 8 - Fulfulded bible

1 Makabe 8

¹Yahuuda nannooɗo habaru Roma'en. Ɓe ɗon mbi'a ɓe semmbiɗɓe, woonananɓe hawtanɓe bee maɓɓe, ɓe taaskiiɓe laataago soobiraaɓe ƴamɓe ɓe fuu.

²Ɓe limtani mo konuuji ɗi ɓe ngaɗi e no ɓe njaalori yimɓe Galatiya. Roma'en leesni ɓe, dooli ɓe yoɓango ɓe garaama naawŋga.

³Ɓe konino boo lesdi Ispaniya haa ɓe njaɓta gasarɗe kaŋŋeeri e cardi gonɗe ton.

⁴Bee dabare e tiiɗal, ɓe nyaami lesɗe man fuu koo ngam ɗe daayiiɗe bee Roma. Ɓe njaali laamiiɓe warɓe diga keerol duniyaaru ngam hippugo ɓe. Roma'en keɓi jaalorgal dow maɓɓe, ɓe ukkani ɓe masiibooji caatuɗi, luttuɓe boo ɗon njoɓana ɓe garaama hitaande fuu.

⁵Ɓe njaali e ɓe leesni laamiiɓe Makedoniya, Filippi e Persiya e tuurtaniiɓe ɓe.

⁶Ɓe ɗiggini Antiyokus Mawɗo, laamiiɗo Asiya, kippunooɗo ɓe bee nyiibi teemerre e noogas, bee pucci, bee mootaaji konu e mooɓre sooje'en semmbiɗnde.

⁷Ɓe naŋngi mo o geeto, ɓe ndooli mo kaŋko e ruutu maako, ɓe njoɓa garaama ɗuuɗka e ɓe ndokka ɓe naŋngaaɓe.

⁸Indiya, Mediya, Lidiya e gure goɗɗe booɗɗe nder laamu man, ɓe njaɓti ɗum haa Antiyokus ngam ɓe ndokka laamiiɗo Emen.

⁹Yunaniŋke'en ngaɗi anniya hongo ɓe ngam senndirgo bee maɓɓe.

¹⁰Nde Roma'en nani ɗum, ɓe neli mawɗo ardiiɓe sooje'en gooto ngam hongo ɓe. Ɗuuɗɓe nder Yunaniŋke'en mbaraama nder haɓre man, rewɓe maɓɓe e ɓikkoy maɓɓe naŋngaama. Roma'en luuwi jawle maɓɓe e marti wuro maɓɓe, ɓe pusi mahi, laatini ɓe bana maccuɓe bana no ɓe ngaɗata hannde boo.

¹¹To ɓe kaɓti ɓe haa lesɗe goɗɗe, nder duuɗe, Roma'en nattina gure man e ɓe ngartira yimɓe gure man maccuɓe maɓɓe.

¹²Ammaa Roma'en ɗon njogi sooba'en muuɗum'en bee amaana non boo hooliiɓe ɓe. Ɓe leesni laamiiɓe lesɗe keedduɗe bee maɓɓe bana laamiiɓe lesɗe daayiiɗe boo. Nanɓe habaru maɓɓe fuu kuli ɓe.

¹³Ɓe ɗon laama ɓen ɓe ngiɗi laamaago, ɓe ɗon ɓorta ɓen ɓe ngiɗaa. Ɓe njottake haa kaakaadi maŋngu.

¹⁴Bee man fuu, walaa Romaajo gooto hifnoto hufnoore laamu malla ɓornoto limce laamu ngam haa heɓa daraja.

¹⁵Ɓe njo'ini kawtal ardiiɓe teemeɗɗe tati e noogas. Nyalaade fuu, suɓaaɓe kawta, carwootira dow saɗirmaaji jama'aare, ngam haa koo moy fuu weltinoro.

¹⁶Hitaande fuu, ɓe kalfina gooto caka maɓɓe ardaago Roma'en e o ardo laamu man fuu. Ɓe ɗowtano mo e walaa kaajanɗo mo malla ganyanɗo mo.

¹⁷Yahuuda suɓi Epolem ɓii Yuhanna e taaniraawo Hakkos bee Yason ɓii Eli'azaaru, o neli ɓe haa Roma. O neli ngam haɓɓugo alkawal e waɗgo amaana bee Roma'en.

¹⁸Yahuuda tammono o hisnan Yahuudu'en wonɓe dow maral Yunaniŋke'en haa Siriya, ɓen haɓdanɓe wartirgo Isra'iila'en maccuɓe.

¹⁹Epolem e Yason ndilli Roma. Ɓaawo jahaaŋgal juutŋgal, ɓe njotti yeeso kawtal ardiiɓe Roma, ɓe mbolwani ɓe boliiɗe ɗe'e:

²⁰“Yahuuda Makabe, deerɗum'en e jama'aare Yahuudu'en neli min haa mooɗon ngam min kaɓɓa alkawal jam. Min ngiɗi, bee laaɓɗum, min lime caka wonduɓe bee mooɗon e min laato min soobiraaɓe mon.”

²¹Ardiiɓe Roma njaɓi sarɗuwol man.

²²Ndaa no bataakewol man winndira dow alluha njamndi mboɗeeri. Kanjum ɓe neldi haa Urusaliima ngam siftinora Yahuudu'en alkawal jam e salaaman:

²³“Min ɗon ngelo Roma'en e jama'aare Yahuudu'en ceyo haa foroy haa lesdi non boo dow maayo. Ɓe laato hisnaaɓe dow konne'en maɓɓe e nder konu boo!

²⁴Ammaa koo toy nder lesdi, to konu ummake dow Roma'en malla dow hawtananɓe ɓe,

²⁵jama'aare Yahuudu'en haɓoyan bee ɓernde woore bee maɓɓe bana no ɗum haandi wakkati man.

²⁶Roma'en ɗon ƴama Yahuudu'en taa ɓe ndokka malla ɓe coorra alkamaari, balmi, ceede malla koommbooje haa konne'en maɓɓe. Ɓe laato neɗɗinɓe alkawal maɓɓe, walaa ko ɓe tammoto ɓaawo man.

²⁷To konu ummake dow Yahuudu'en boo, Roma'en nastan haɓre man bee ɓernde woore ngam jiŋngugo ɓe bana no ɗum haandi wakkati man.

²⁸Roma'en iinani Yahuudu'en ɓe ndokkataa koo alkamaari, koo balmi, koo ceede malla koommbooje haa konne'en maɓɓe. Roma'en ɗon neɗɗini jogaago alkawal nga'al bee gooŋga.”

²⁹Kanjum woni sarɗiiji binndaaɗi ɗi ɓe kaɓɓotiri bee Yahuudu'en.

³⁰To nder garanɗum, ɓe ɗiɗo fuu ɓe narri haa ɓe ɓesda malla ɓe usta sarɗuwol dow ko winnda, ɓe poti ɓe ngaɗa ɗum, doole ɓe ngaɗa fodde ko ɓe ɓesdi malla ɓe usti.

³¹Min neli boo haa laamiiɗo Demetiriyus bataakewol dow aybeeji ɗi o waɗi Yahuudu'en: “Koni a ɓillata sooba'en amin e wallooɓe amin Yahuudu'en bee caatal?

³²To ɓe meeti siŋkugo ma, min njiŋngan ɓe e min ngaɗan konu bee ma haa lesdi e nder ndiyam fuu.”