Read Fulfulded 1 Makabe 9 Bible Online

1 Makabe 9 - Fulfulded bible

1 Makabe 9

¹Nde Demetiriyus nani Nikanor maayi e sooje'en maako njaalaama, o taaskiti nelgo nde ɗiɗaɓre Bakides e Alkime haa Yahudiya, ɓe ardo mooɓre maako nyaaɗnde.

²Ɓe kooci laawol Galiili, ɓe caŋngini yeeso Mesalot kommbi Arbeel. Ɓe nyaami wuro man e ɓe mbari yimɓe ɗuuɗɗe.

³Nder hitaande 152 nder lewru aranndu, ɓe njo'ini saŋngeere maɓɓe yeeso Urusaliima.

⁴Ɓaawoɗon ɓe ndilli diga ton haa Beret bee sooje'en ujine noogas e wa'ooɓe pucci ujine ɗiɗo.

⁵Yahuuda, gal wakeere mum, saŋngini haa Elasa bee sooje'en muuɗum waawɓe haɓre ujine tati.

⁶Nde sooje'en Yahuuda ngi'i mooɓe sooje'en konne'en maɓɓe ɗuuɗɗe jamum, ɓe kultori e ɗuuɗɓe caka maɓɓe ndoggi saŋngeere: Sey teemeɗɗe njoweetato lutti.

⁷Yahuuda nde laari sooje'en muuɗum ɗon tampa wakkati haɓre fuɗɗata, ɓernde maako ta'i ngam o walaa wakkati mooɓtugo sooje'en maako.

⁸O sakli, o wi'i haa luttuɓe: “Tiitooɗen konne'en meeɗen, kippooɗen ɓe to en mbaawan.”

⁹Sooje'en maako njaɓaay haala ka'a, ɓe mbi'i mo: “Ɗum waɗataako, en pamɗi. Jonta kam sey kisnen yoŋkiiji men tan. Ɓaawoɗon, en lorto bee deerɗiraaɓe men haɓtaago.”

¹⁰Yahuuda jaabi ɓe: “En ndogga haɓre na? Aa'a, min kam mi waɗataa huunde bana nii! To wakkati maayde men waɗi, maayen en worɗuɓe ngam daliila deerɗiraaɓe meeɗen. Taa mbilen neɗɗaaku men.”

¹¹Mooɓe konne'en ngurti saŋngeere mum'en, ɓe tiiti Yahuudu'en. Wa'iiɓe pucci sennditi geɓe ɗiɗi, sooje'en jogiiɓe piɗirɗum e ɓahi ɗon ardi yeeso, haa caffuuji arani ɗi waawɓe haɓre.

¹²Bakides ɗon ardi sooje'en wuttudu nyaamru. Sooje'en bee kosɗe ɗon ngaɗi geɓe ɗiɗi, ɓe ɗon njaha bee fuufugo algayta. Sooje'en Yahuuda boo puufi algayta.

¹³Lesdi dimmbi ngam jahargal sooje'en geɓe ɗiɗi go, nden haɓre ummi, nde fuɗɗi fajira e nde neeɓi haa jemma.

¹⁴Yahuuda faami Bakides e sooje'en maɓɓe nyaaɗɓe ɗon ndardi wuttudu nyaamru. Nden sooje'en maako waawɓe kawtani mo,

¹⁵ɓe kippoyi wuttudu nyaamru man ndu sooje'en Siriya, ɓe parti ɓe, taasni ɓe haa kooseehon Azara.

¹⁶Nde mooɓe ɗe juŋngo nano paami wuttudu nyaamru kam jaalaama, ɗe kippoyi Yahuuda e sooje'en mum gal ɓaawo.

¹⁷Haɓre wuli, yimɓe ɗuuɗɗe maayi gal geɓe ɗiɗi fuu.

¹⁸Yahuuda boo mbaraama e luttuɗum sooje'en maako boo ndoggi.

¹⁹Yonatan e Simon kooci ɓanndu deerɗiraawo muuɗum'en Yahuuda e ɓe uwi mo haa yenaande saare maɓɓe haa Moodin.

²⁰Isra'iila'en fuu mboyi mo, ɓe mboyi ɗuuɗɗum e ɓe ngaɗi maayiti nyalɗe ɗuuɗɗe. Ɓe ɗon mbi'a:

²¹“Noy ka waari, gorɗuɗo, cuusɗo, kisnuɗo Isra'iila maayata?”

²²Luttuɗum kuuɗe Yahuuda, kaɓe maako, jaalorɗe maako e neɗɗakuuji ɗi o heɓi ɗuuɗɗi en mbaawataa winndididgo ɗum.

²³Ɓaawo maayde Yahuuda, yedduɓe Allah mbaŋgi koo toy fuu nder Isra'iila, yimɓe halluɓe keɓi semmbe.

²⁴Yaake man weelo caatuŋgo waɗno, ɗuuɗɓe nder jama'aare kawtani ɓe.

²⁵Nden Bakides suɓi heefeerɓe, o ardini ɓe nder gure lesdi maako.

²⁶Yimɓe man puɗɗi tefgo e ɓillugo sooba'en Yahuuda fuu: Ɓe naŋnga ɓe, ɓe njahra ɓe haa Bakides, kanyum boo ɗon waato ɓe e ɗon toska ɓe.

²⁷Isra'iila'en meeɗaay anndugo ɓillaare tullunde nde'e diga zamanu annabiijo walaano caka maɓɓe.

²⁸Nden sooba'en Yahuuda fuu mooɓti, ɓe mbi'i Yonatan:

²⁹“Diga maayde deerɗa Yahuuda, walaa goɗɗo bana maako baawanɗo yahrugo en haɓgo bee konne'en men, Bakides e wanyɓe ummaatoore men.

³⁰An min cuɓi haa kooca pellel maako. Laatoɗa ardiiɗo amin e ɗowoowo amin haa konu.”

³¹Nden Yonatan jaɓi ardaago, o hooci laamu ɓaawo deerɗiiko Yahuuda.

³²Nde Bakides heɓi habaru man, o haɓdi haa o mbara Yonatan.

³³Ammaa nde Yonatan e yimɓe mum e deerɗum Simon nani haala man, ɓe cuuɗoyi haa nder harde hamaadaare Teko'a. Ɓe caŋngini kommbi mbeela njamndi Asfar.

³⁴Nyannde siwtorde feere, Bakides faami haa ɓe ngoni, o ta'i maayo Urdun bee sooje'en maako fuu.

³⁵Yonatan neli deerɗum Yuhanna, cuklaniiɗo ɓen ɓe kaɓataa, ƴamgo sooba'en maɓɓe Nabate'en to ɓe poti sigaago haa maɓɓe doŋle maɓɓe ɗuuɗɗe.

³⁶Ammaa dow laawol, Jambirite'en yimɓe Medeba, kippi Yuhanna, naŋngi mo, ndillidi bee doŋle fuu.

³⁷Neeɓi seɗɗa, Yonatan e deerɗum Simon keɓi habaru no Jambirite'en go ɗon taaskano waɗgo teegal maŋngal. Munyaaɗo ɓii ardiiɗo mawɗo haa Kanaana ummoto diga Nabata bee ɗoftooɓe ɗuuɗɓe.

³⁸Ɓe ngejjitaay no Jambirite'en mbarno deerɗiraawo maɓɓe Yuhanna. Ɓe mba'i, ɓe cuuɗi nder loogo hooseere ngam rengo ɓe.

³⁹Wakkati ɓe ɗon taaski rengo ɓe, ɓe eewi yimɓe bee doŋle ɗuuɗɗe, ɓaŋɗo, sooba'en mum e deerɗum'en ɗon ngara fottugo bee yeɓre ndeya bee fiyooɓe bawɗi e yimooɓe. Ɓe ɗon bee balmi boo.

⁴⁰Yonatan e yimɓe mum ngurti haa ɓe cuuɗi, ɓe kippi ɓe, ɓe puɗɗi mbargo ɓe. Ɗuuɗɓe mbaraama e luttuɓe boo ndoggi haa hooseere. Yahuudu'en koociti doŋle maɓɓe fuu.

⁴¹Nii non ɓaŋgal laati maayiti e gimi wammbaaɓe laati bojji.

⁴²Ɓaawo waataago deerɗiraawo maɓɓe Yuhanna, Yonatan e Simon cuuɗoyi haa yayre wonnde dow pomoole maayo Urdun.

⁴³Bakides faami haa ɓe ngoni. Nyannde siwtorde, o dilli haa daande maayo Urdun bee mooɓe ɗuuɗɗe.

⁴⁴Yonatan wi'i yimɓe mum: “Umme! Konen ngam kisnen yoŋkiiji men! Ko saalino kam fuu, en meeɗaay nastugo nder ɓillaare bana nde hannde.

⁴⁵Konne'en ɗon tiiti en gal yeeso e maayo Urdun boo ɗon ɓaawo men. Ko taari en fuu ɗum yayre e guuɓe. Walaa gal ndoggiren fuu.

⁴⁶Tore Jawmiraawo haa keɓen, ndaɗen konne'en men.”

⁴⁷Konu fuɗɗi. Yonatan ɓaŋgti juŋngo haa faɗɗa Bakides, ammaa o luuti fiyannde man bee lortaago ɓaawo ɓaawo.

⁴⁸Nden Yonatan e yimɓe mum ndiwi, njolli nder maayo Urdun, ɓe ngini haa ɓe njotti fomoonde gaɗaare. Konne'en paasiti ta'ugo maayo ngam tokkaago ɓe.

⁴⁹Nyalde man yimɓe Bakides baakin ujineere kalki.

⁵⁰Bakides lorti tawon haa Urusaliima, o semmbiɗini gure Yahudiya bee taarnugo ɗe bee mahi towɗi marɗi pareeje bee paaɓi. Ɗum Yeriko, Emmawus, Bayti-Horon, Betel, Timna, Faraton e Tefon.

⁵¹O jo'ini sooje'en ngam ɓillugo Yahuudu'en.

⁵²O semmbiɗini mahi taariiɗi Bayti-Sur e Gezer, non boo mahi suudu Urusaliima semmbiɗndu. O jo'ini mooɓe sooje'en nyaamdu sigordu.

⁵³O naŋngi ɓiɓɓe laamiiɓe lesdi man, o maɓɓi ɓe haa pelle man.

⁵⁴Nder lewru ɗiɗaɓru nder hitaande 153, Alkime umri ɓe pusa mahol taariiŋgol haykaliiru ngam wilgo kuugal annabi'en. Ɓe puɗɗi fusgo.

⁵⁵Nden Alkime heɓi piyal, kuugal fuu dari. O laati o boosɗo, o waawataa maɓɓititgo hunnduko maako, o waawataa wolwugo malla o tinndina anniyaaji maako ragareeji.

⁵⁶Neeɓaay sam, o maayi nder torra naawka.

⁵⁷Nde Bakides heɓi habar Alkime maayi, o lorti les laamiiɗo Demetiriyus. Yahudiya heɓi foofti deydey duuɓi ɗiɗi.

⁵⁸Nden Yahuudu'en yedduɓe Allah mooɓti, mbi'mbi'tiri: “Yonatan e yimɓe mum ɗon njooɗi nder jam jonta, walaa ko hulnata ɓe boo. Mbi'en Bakides wara, o waawan naŋngugo ɓe jemmaare woore.”

⁵⁹Ɓe ndilli haa ɓe ngeewta dabare man bee Bakides.

⁶⁰Kaŋko o naŋngi laawol bee sooje'en ɗuuɗɓe. O neldi bee sirri bataakewol haa yimɓe maako wonɓe haa Yahudiya, o ɗon ƴama ɓe ɓe naŋnga Yonatan e yimɓe mum. Ammaa dabare maɓɓe fiistaama ngam Yonatan heɓi habaru man.

⁶¹Kanyum boo, bee yimɓe maako, o naŋngi nder waɗɓe dabare man yimɓe cappanɗe njowo wonɓe nder lesdi maako, ɓe mbari ɓe.

⁶²Ɓaawoɗon, Yonatan, Simon e yimɓe muuɗum'en cuuɗoyi nder wuro ngo walaa koo goɗɗo, wi'eteeŋgo Bayti-Basi. Ɓe nyiɓti babal laatinooŋgal winnde e ɓe cemmbiɗini ngal bee mahi towɗi.

⁶³Nde Bakides heɓi habaru man, o mooɓti sooje'en maako fuu, o ewni yiɗɓe mo haa Yahudiya ngara kawtana mo.

⁶⁴O dilli haa Bayti-Basi ngam o hippo ngo, o honi babal man balɗe ɗuuɗɗe bee kuuje pusruɗe mahi.

⁶⁵Nden Yonatan ɗali deerɗum Simon nder wuro man e bee yimɓe seɗɗa, o wurti o dilli ladde.

⁶⁶O jaaloyi Odomera bee lenyol mum e asŋgol Fasiron nder saŋngeere mum. Ɓe fuu ɓe njaɓi haɓdugo bee Yonatan e yimɓe mum. Ɓe ndillidi ɓe fuu, ɓe kippoyi Bakides.

⁶⁷Simon bee yimɓe mum ngurti nder Bayti-Basi, ɓe nguli kuuje pusruɗe mahi,

⁶⁸ɓe nasti haɓre bee Bakides. Ɓe parti mo ngam dabare maako wuuraay.

⁶⁹O ɓerni dow Yahuudu'en yedduɓe Allah sarwuɓe mo o yaha Yahudiya, o mbari ɗuuɗɓe maɓɓe. Ɓaawo man o hoosi anniya lortaago lesdi maako.

⁷⁰Nde Yonatan nani habaru man, o neli dow maako nelaaɓe ngam waɗgo sarɗiiji sulhu e lortingo naŋngaaɓe.

⁷¹Bakides jaɓi sarɗiiji Yonatan, o hunani mo o ɗalan mo nder jam haa fodde ngeendam maako.

⁷²O hokkiti mo naŋngaaɓe ɓe o naŋngi diga Yahudiya e o lorti haa lesdi maako. O lortaaki haa lesdi Isra'iila sam.

⁷³Nii non konu timmiri haa lesdi Isra'iila. Yonatan jooɗoyi haa Mikmas. O warti ardiiɗo jama'aare e o nattini nder Isra'iila yimɓe yedduɓe Allah.