Read Fulfulded 2 Makabe 10 Bible Online

2 Makabe 10 - Fulfulded bible

2 Makabe 10

¹Barka Jawmiraawo, Yahuuda Makabe e yimɓe mum njaɓti haykaliiru e berniwol Urusaliima fuu.

²Ɓe campiti kirsirɗe ɗe jananɓe mahno caka wuro, bee nokkuuje haa heefeerɓe ndewata labbi.

³Ɓe laɓɓini haykaliiru, ɓe mahi hirsirde hesre. Nden ɓe tappindiri kaa'e kuɓɓanɗe yiite ngam ɓe kuɓɓa yiite dow hirsirde, ɓe lii'i kirseteeŋga arana ɓaawo duuɓi ɗiɗi caaliiɗi. Ɓe cuurni uurdi, ɓe kuɓɓi pittirlaaji e ɓe njo'ini tamseeje ɗe ɓe lii'ani Allah.

⁴Nde ɓe ngaɗi ɗum, ɓe ndo'i ɓe kippi geese maɓɓe haa lesdi, ngam ɓe toro Jawmiraawo taa torra ɓe bee masiibooji irin ɗi'i. Koo to laati ɓe toonyi mo fahin, o elto ɓe bee hakkiilo e taa o ɗala ɓe haa laamu heefeerɓe njancanɓe mo.

⁵Ɓe laɓɓini haykaliiru nder nyalaade nde jananɓe coɓnino ndu, waato nder balɗe noogas e jowaɓre nder lewru Kislew.

⁶Ɓe ngaɗi juulde man bee seyo, deydey balɗe joweetati bana juulde bukkaaji. Yahuuda e yimɓe mum ciftori neeɓaay ɓe ngaɗno juulde bukkaaji yaake ɓe ɗonno njooɗi dow kooseeje e nder lowi dabbaaji ladde.

⁷Kanjum waɗi jonta ɓe ɗon njogi haakooji dibinooje e lice maaje, ɓe ɗonno ɓaŋgta gime gettooje heedi dokkuɗo ɓe daliila no ɓe laɓɓina haykaliiru mum.

⁸Ndaa anniya ka ɓe koo'i: “Umroore hokkaama haa ummaatoore Yahuudu'en waɗgo juulde nde'e nde hitaande yaali fuu.” Jama'aare boo yerdi ɗum.

⁹Ndaa nii Antiyokus bi'eteeɗo Epifan maayri.

¹⁰Jonta min mbolwan dow Antiyokus Epator ɓii gedduɗo Allah oo. Min kollan sarru maako bana konuuji ɗi o waɗi nder dammuɗum man.

¹¹Nde Epator laami, o suɓi goɗɗo feere bi'eteeɗo Lisiyas, o laatini mo wakiiliijo e ngomnaajo lesdi Siriya maŋngo e Finisiya

¹²haa babal Potolome bi'eteeɗo “juuta hoore”. kaŋko laatino ngomnaajo aartuɗo jogoriiɗo Yahuudu'en nder adilaaku ɓaawo boneeji ɗi ɓe ngiidi. O tabitini joonde jam bee maɓɓe.

¹³Ngam daliila man “soobiraaɓe laamiiɗo” ngulli mo haa Epator. Ko saalino boo, o haadanaama nde ɗuuɗɗum o faasikiijo. Laamiiɗo Filometor mo Misra halfinno mo Kiprus, ammaa o acci duunde man, o dilli haa Antiyokus Epifan. Nde o waawaay ɓaŋgtugo daraja kuugal maako, o safti o mbarti bee yargo dajje.

¹⁴Yaake Gorgiyas laati ngomnaajo lesdi Idume, o soodi sooje'en jananɓe, o tefi dabareeji fuu no o hipporo Yahuudu'en.

¹⁵Accu non boo, yimɓe Idume wonɓe nder cuuɗi cemmbiɗɗi kanyum'en boo ɓillani Yahuudu'en. Ɓe njaɓɓino yimɓe fartaaɓe diga Urusaliima e ɓe anniyino waɗgo haɓre.

¹⁶Yahuuda e yimɓe mum ɓaŋgti do'a haa Allah, ɓe ɗon toro mo o heeda gal maɓɓe. Nden ɓe ummi, ɓe tiitoyi cuuɗi Idume cemmbiɗɗi.

¹⁷Ɓe kippi ɗi kippol caatuŋgol, ɓe parti aynooɓe mahi maaji e jooɗiiɓe ton. Ɓe mbari yimɓe ɓe ɓe tawi fuu, ɓe mbari baakin yimɓe ujine noogas.

¹⁸Bee man fuu, ko dillani yimɓe ujine njoweenayo ndoggi, nyukkino nder cuuɗi ɗiɗi ɓurɗi semmbiɗineego, marɗi kuuje haɓtaago koo to haɓre man neeɓi.

¹⁹Yahuuda Makabe ɗali haa yeeso maaji Simon e Yusufu e Jakayus e sooje'en ɗuuɗɓe, ngam ɓe taaro e ɓe kippo ɗi. kaŋko bee hoore maako boo, o dilli haa nokkuure nde ɓe mari haaje maako bee ko yaawi.

²⁰Ammaa sooje'en Simon yiɗɓe ceede ɗali yimɓe feere wonɓe nder cuuɗi ɗiɗi go, ngurti, ndoggi, ngam ɓe njaɓi ceede ko waɗata suleyje cardi ujine cappanɗe joweeɗiɗi.

²¹Nde Yahuuda heɓi habaru man, o mooɓti ardiiɓe mooɓe man, o haadani ɓe bee wi'go ɓe coorri deerɗiraaɓe maɓɓe: Ngam ceede, ɓe njoofi konne'en maɓɓe, taaskaniiɓe haɓgo bee maɓɓe!

²²Yahuuda mbari faasiki'en ɓe'e, ɓaawoɗon o jaɓti cuuɗi cemmbiɗɗi man fuu.

²³O jaali konuuji ɗi o waɗi fuu, bana nii non o wurtini e o jaali ko dillani sooje'en ujine noogas nder cuuɗi cemmbiɗɗi ɗiɗi go.

²⁴Ammaa Timote mo Yahuudu'en njaalino aran, soodi sooje'en jananɓe ɗuuɗɓe, o waddi diga lesdi Asiya wa'ooɓe pucci. Nden o ummi bee mooɓe sooje'en maako ngam hippoyaago Yahudiya.

²⁵Nde o ɗon ɓadito, Yahuuda Makabe e yimɓe mum ɓaŋgti do'a haa Allah bee rufgo mbulwuldi dow ko'e muuɗum'en, ɓe taadi keeci maɓɓe bee leppi buhuuje.

²⁶Ɓe turi haa lesdi yeeso hirsirde, ɓe ƴami Allah mo'ana ɓe, o laato “konneejo konne'en maɓɓe, ganyo wanyɓe maɓɓe” bana o wi'i nder Tawreeta.

²⁷Nde ɓe timmini do'a maɓɓe, ɓe kooci balmi maɓɓe, ɓe ngurti Urusaliima, ɓe njehi daayiiɗum, nde ɓe ɓaditi konne'en maɓɓe, ɓe ndari.

²⁸Jaŋngo maajum nde naaŋge fuɗi, mooɓe ɗiɗi tiitotiri, puɗɗi haɓre. Haa ɓe njaalo, Yahuudu'en marsori cuusal muuɗum'en e ko ɓurata boo ɓe marsori Jawmiraawo mo ɓe kooli, luttuɓe boo ko fooɗata ɓe fuu nder haɓre, ɗum haa'inaare.

²⁹Haa caka haɓre ton, konne'en maɓɓe ngi'i wa'iiɓe pucci njowo jalbitanɓe mbaŋgi diga asama, ɓe ɗon mba'i pucci marɗi pawne kaŋŋeeri, ɓe ardani Yahuudu'en.

³⁰Ɓe ndarni Yahuuda caka ɗiɗo maɓɓe, ɓe ɗonno padda mo bee balmi maɓɓe taa ɓe naawna mo. Ɓe ɗonno cakkina ma'e bana kuri dow konne'en Yahuudu'en, haa ɓe laati bana wumɓe, ɓe kultori, ɓe caŋkiti nder jiiɓotiral maŋngal.

³¹Yimɓe baakin ujine noogas e teemeɗɗe njowo fuu mbaraama, onon boo wa'iiɓe pucci teemeɗɗe njoweego.

³²Timote bee hoore mum suuɗoyi haa babal koolɗiniiŋgal haa Gezer ngal Kereyas ardi.

³³Yahuuda e sooje'en mum kippi babal man balɗe nayi fuu.

³⁴Hippaaɓe boo ɗon kooli babal muuɗum'en cemmbiɗŋgal haa ɓe njanci Allah e Yahuudu'en, ɓe ɗonno mbolwa laakiiri dow hippuɓe ɓe.

³⁵Subaha nyannde jowaɓre, sukaaɓe noogas caka sooje'en Yahuuda, haarɓe mone bee laakiiri ndi'i, tuurti kippoyi mahi cemmbiɗɗi bee cuusal maŋngal. Bee haa'inaare ndabbaawa tuurtuŋga, ɓe mbari mo ɓe tawi fuu.

³⁶Woɗɓe fahin tokki ɓe, taari suudu semmbiɗndu go, ngam hippaago wonɓe nder maaru gal nokkuure feere. Ɓe nguli cuuɗi aynorɗi e ɓe nguli boo jancooɓe Allah. Woɗɓe maɓɓe pusi mahol e maɓɓitani luttuɓe laawol nastugo nder wuro man. Wuro man jaalaama bee ko yaawi.

³⁷Timote suuɗi nder sigordu ndiyam, ammaa nde ɓe keɓti mo, ɓe mbari mo, kaŋko bee deerɗiiko'en Kereyas e Apollofan.

³⁸Nde jaalorgal maɓɓe tabiti, Yahuudu'en ɓaŋgti gime ngam yettugo Jawmiraawo, ɓe ngetti Allah ngam mo'e ɗe o mo'ani Isra'iila e ngam o hokki ɓe jaalorgal.