Read Fulfulded 2 Makabe 11 Bible Online

2 Makabe 11 - Fulfulded bible

2 Makabe 11

¹Lisiyas o na'ibiijo laamiiɗo, o “saaro laamiiɗo”, kaŋko boo mawnini laamiiɗo, o jogori bee gooŋga ko saali. Wakkati seɗɗa ɓaawoɗon,

²o mooɓti sooje'en ko dillani ujine cappanɗe njoweetato e wa'ooɓe pucci maako fuu, nden o dillidi bee maɓɓe hongo Yahuudu'en. O annini wartirgo Urusaliima, joonde Yunaniŋke'en.

³O yiɗno haykaliiru yoɓa garaama bana cuuɗi dewe ummaatooje goɗɗe, o yiɗno boo soorrugo kuugal mawɗo limanjo hitaande fuu.

⁴Walaa ko yaali mo bee baawɗe Allah sam, ammaa o hoolɗini hoore maako dow sooje'en maako ujineeje e wa'ooɓe pucci maako e nyiibi maako cappanɗe joweetati.

⁵O nasti nder Yahudiya haa o yotti Ɓayti-Sur, nokkuure semmbiɗnde wonnde baakin kilomeetir noogas e joweetati haa fombina Urusaliima, o hippi ngo.

⁶Nde Yahuuda Makabe e yimɓe mum keɓi habaru o taarino cuuɗi maɓɓe cemmbiɗɗi, ɓe mooɓti jama'aaje, bee hunnduko wooto ɓe tori Jawmiraawo bee bojji e gonɗi o nelda ɓe malaa'ikaajo booɗɗo ngam hisnugo lesdi Isra'iila.

⁷Ɓaawoɗon, Yahuuda aarti hooci balmi, o fuufi luttuɓe boo daraago yeeso joote bana maako ngam ɓe kisna deerɗiraaɓe maɓɓe. Ɓe ndillidi fuu bee tiiɗal.

⁸Nde ɓe ndaayaaki bee Urusaliima, ɓe ngi'i ba'iiɗo puccu ɓorniiɗo limce daneeje waŋgi, o losi balmi ɗi kaŋŋeeri, o ardi yeeso honooɓe.

⁹Nden ɓe fuu maɓɓe ɓe ngetti Allah ngam mbooɗeeŋga mum. O hokki ɓe cuusal sampititgo naa yimɓe tan, ammaa koo dabbaaji kulniiɗi e koo mahi ɗi jamɗe fuu.

¹⁰Ɓe ardi, ɓe taaski caffuuji maɓɓe ngam haɓre, ɓe ɗon yeeso goɗɗo mo Allah nder mbooɗeeŋga mum neldi ɓe ngam o honoda bee maɓɓe.

¹¹Nden bana barooɗe, ɓe kippi konne'en, ɓe carri sooje'en yahooɓe bee kosɗe baakin ujine sappo e ngo'o e wa'iiɓe pucci ujineere e teemeɗɗe njoweego, ɓe parti luttuɓe boo.

¹²Ɓurna dogguɓe fuu naawni e cakkini balmi muuɗum'en boo. Lisiyas bee hoore mum hisni yoŋki mum daker, o hisni ki bee doggugo, cemtuɗum meere.

¹³Nde Lisiyas ɗon bee hakkiilo, o numi dow jaaleeki ki ɓe njaali mo. O faami Yahuudu'en ɓe njaalataake ngam Allah baawɗo ɗonno hona ngam maɓɓe. O neli dow maɓɓe nelaaɓe

¹⁴ngam ɓe ngaɗa sulhu laaɓŋgu bee sarɗiiji adiliiji. O iini boo o doolan laamiiɗo laataago soobaajo maɓɓe.

¹⁵Yahuuda kanyum boo, nde o yiɗno ko nafata yimɓe mum, o jaɓi sarɗiiji Lisiyas fuu. Laamiiɗo gal wakeere mum boo jaɓi ƴamɗe Yahuudu'en ɗe Yahuuda ƴami nder bataakewol ngol o winndani Lisiyas.

¹⁶Lisiyas winndani Yahuudu'en bataakewol ngo'ol: “Lisiyas hoofni jama'aare Yahuudu'en.

¹⁷Nelaaɓe mon Yuhanna e Absalom ndokki yam bataakewol man, ɓe tori yam mi hooca anniya dow nufayeeje binndaaɗe nder maagol.

¹⁸Mi yottini haa laamiiɗo ƴamɗe mooɗon fuu, o duŋi ko haani fuu.

¹⁹To on ɗon bee anniyaaji booɗɗi heedi ngomna, nder garanɗum mi haɓdan waɗgo ko nafata jama'aare mon fuu.

²⁰Ko laarani toɓɓe pamare nder ƴamɗe mooɗon boo, nelaaɓe mon e ɓe am fuu carwootiran bee mooɗon.

²¹Mi ɗon yelana on hayru e jam. Winndaama nyalaade noogas e nayaɓre nder lewru Zes-Korinti'en nder hitaande 148.”

²²Ndaa ko laamiiɗo winndani Lisiyas: “Laamiiɗo Antiyokus hoofni deerɗum Lisiyas.

²³Diga baaba am maayi, hawtoyi bee labbi amin, mi ɗon yelo jama'aare wonnde les am fuu suklano kuuɗe mum bilaa ɓilla.

²⁴Ammaa mi ɗon bee habaru no Yahuudu'en njaɓataa huuwtinirgo al'aadaaji Yunaniŋke'en ɗi baaba am yiɗi nastingo haa lesdi ndi'i. Ɓe ɓuri yiɗgo al'aadaaji maɓɓe e ɓe tori ɓe ɗala ɓe ɓe ɗowtano umrooje maɓɓe.

²⁵Nde mi yiɗi ummaatoore nde'e jooɗo nder jam bilaa ɓilla, mi umri ɓe ndokkita ɓe haykaliiru maɓɓe e ɓe acca ɓe ɓe ngeeɗa bana no al'aadaaji kaakiraaɓe maɓɓe.

²⁶Maatin ɓe anniya am, hoolɗin ɓe dow anniyaaji am laaɓɗi, ɓe cuklano kuuɗe maɓɓe nder de'ere.”

²⁷Ndaa boo bataakewol ngol laamiiɗo winndani jama'aare Yahuudu'en: “Laamiiɗo Antiyokus hoofni dawrooɓe ndotti'en e Yahuudu'en luttuɓe fuu.

²⁸Mi ɗon yelana on njamu. Min boo mi jamo.

²⁹Menelas maatini yam on ngiɗi huucugo e suklanaago kuuɗe mon.

³⁰Min boo, mi ɓillaataako kuucuɗo haa saare mum hiddeko lewru zantik cika nyalde cappanɗe tati.

³¹On duŋanaaɓe ɗowtanaago umrooje mon ko laarani nyaamdu e kiitaaji feere bana ɓooyma. Gaɗɗo aybe caka mon bilaa anndaaŋgal ɓillataake.

³²Mi neli on Menelas ngam tabitingo ko mbi'mi.

³³Mi yelani on hayru e jam. Winndaama nyalaade sappo e jowaɓre lewru zantik nder hitaande 148.”

³⁴Gal wakeere maɓɓe, ndaa ko Roma'en mbinndani Yahuudu'en: “Kintus Memmiyus e Titus Manyus wakiili'en Roma'en koofni jama'aare Yahuudu'en.

³⁵Min ngerdi ko Lisiyas, “saaro laamiiɗo” duŋani on fuu.

³⁶Dow ko o sarwootiri bee laamiiɗo, linye ɗum bee hakkiilo e ndokke min jaawaabu mon bee ko yaawi ngam min keɓa min mbi'a ɗum laamiiɗo bee boliiɗe marɗe nafuuda ngam mooɗon. Nii non boo, min njahan Antakiya,

³⁷kanjum waɗi, onon boo sey njaawɗon nelgo min wakiili'en mon, ngam min paama, minin boo numo mooɗon.

³⁸Njaɓe yelooji amin marɗi barka. Winndaama nder lewru zantik nyalaade mum sappo e jowaaɓre nder hitaande 148.”