Read Fulfulded 2 Makabe 13 Bible Online

2 Makabe 13 - Fulfulded bible

2 Makabe 13

¹Nder hitaande 149, Yahuuda e yimɓe mum keɓi habaru no Antiyokus Epator ɗonno yaha hippaago Yahudiya bee sooje'en ɗuuɗɓe.

²Laamiiɗo e Lisiyas, arano nder wakiili'en ngomna maako, cuklaniiɗo mawningo mo, ɗonno ɗofta mo. Koo moy maɓɓe ardini sooje'en Yunaniŋke'en yahooɓe bee kosɗe ko dillanta ujine teemerre e sappo e wa'iiɓe pucci boo ujine njowo e teemeɗɗe tato, nyiibi boo noogas e ɗiɗi e mootaaji kuno boo teemeɗɗe tati marɗi balmi.

³Menelas hawtani ɓe e bee faasikaare ɗuuɗnde o fuufi laamiiɗo yahgo. O tammino numo ngo'o wooɗi ngam lesdi maako, asee boo o yiɗno lorniteego haa kuugal maako ngal hooreejo liman'en.

⁴Ammaa Jawmiraawo laamiiɗo laamlaamɓe ummini tikkere Antiyokus dow Menelas. Nde Lisiyas waŋgini no mbaroowo ko'e oo woni bososel sarruuji ɗi ngonduɗen, laamiiɗo umri ɓe njahra Menelas haa Beere e ɓe mbara mo fodde al'aadaaji nokkuure man.

⁵Haa wuro man, woodino suudu aynirdu towndu, darnde maaru waɗi meetir noogas e jowi, ndu ɗon heewi ndoondi. Dow maaru woodi girlirɗum e nder mum ɓe moostoto gal toy fuu nder ndoondi.

⁶Haa ton ɓe mba'inta yimɓe ɓoftooɓe kuuje nder cuuɗi dewe malla waɗɓe hakkeeji naawɗi: Ɓe ngerɓa ɓe, ɓe maaya nder ndoondi.

⁷Ndaa ko tawi Menelas keefeero, o maayi, o heɓaay uweego.

⁸Ɗum haandani mo ngam o waɗi hakkeeji ɗuuɗɗi heedi hirsirde Jawmiraawo, nde yiite mum e ndoondi mum ceniiɗum, nder ndoondi man o maayi boo.

⁹Laamiiɗo Antiyokus tokki jahaaŋgal mum, nafsu maako heewi numooji kalluɗi: O nufi yarnugo Yahuudu'en torraaji ɓurɗi naawgo ɗi baaba maako yarnino ɓe.

¹⁰Nde Yahuuda nani haala nan, o ewni yimɓe jama'aare maako, ɓe toro Jawmiraawo jemma e naaŋge, ngam o walla ɓe fahin ko ɓuri naane.

¹¹Ɓe ngiɗno haɗgo ɓe huuwtinirgo Tawreeta, haɗgo ɓe lesdi maɓɓe e haykaliiru maɓɓe seniindu. Yaake man yimɓe jama'aare puɗɗino feecaago seɗɗa, ɓe kuli taa Allah ɗala ɓe ɓe lorto haa juuɗe heefeerɓe halluɓe ɓe'e.

¹²Ndaa ko ɓe ngaɗi hawtaade: Nder nyalɗe tati, ɓe cujidani Allah bilaa ummaago sam, ɓe tori mo, ɓe ilni gonɗi e ɓe cuumi. Ɓaawoɗon, Yahuuda wolwani ɓe, o umri ɓe ɓe taaskano konu.

¹³Nde o sarwootiri bee ndotti'en, Yahuuda ummini jahaaŋgal ngam waɗgo konu bee baawɗe Allah, o reenaay sooje'en laamiiɗo kippo Yahudiya malla njaɓta Urusaliima.

¹⁴Nii non, o waati hoolaare maako haa Allah tagɗo duniyaaru. O umri yimɓe maako, ɓe kaɓana al'aadaaji maɓɓe e ladabuuji maɓɓe bee cuusal sey yotto maayde, ɓe kaɓa ngam Urusaliima e haykaliiru mum e ngam lesdi maɓɓe. Yahuuda saŋngini sooje'en mum les wuro Moodin,

¹⁵o umri sooje'en maako ɓe njogo kalimawol “Allah jaaloto!” O suɓtindiri caka suka'en, ɓurdanɓe margo ngorgu e bee jemma o hippoyi nokkuure weerde konne'en, gal wakeere daŋki laamiiɗo, o mbari yimɓe ko dillani ujine ɗiɗo. Fahin ɓe mbari nyiiwa ɓurduŋga mawnugo bee ba'otooɗo nga.

¹⁶Kultoreeŋgol naŋngi konne'en haa saŋngeere maɓɓe. Ɓaawo jaaleeki man Yahuuda e yimɓe mum ummi ndilli,

¹⁷subaha. Ɓe keɓi jaalorgal man ngam Jawmiraawo walli ɓe, faddi ɓe.

¹⁸Hujja kaaɗka kollanka cuusal Yahuudu'en he'i laamiiɗo Antiyokus. O tefi nyaamgo babe maɓɓe bee dabare.

¹⁹O hippoyi Bayti-Sur, suudu Yahuudu'en semmbiɗndu aynaandu booɗɗum, ammaa ɓe parti mo. O lorti, ɓe njaali mo fahin.

²⁰Yahuuda heɓi yerɓango Yahuudu'en hippaaɓe ko ɓe marata haaje.

²¹Nden soojeejo Yahuuduujo bi'eteeɗo Rodukus fefti sirriiji konu haa konne'en maɓɓe. Ɓe tefi mo, ɓe naŋngi mo, ɓe mbari mo.

²²Laamiiɗo tefi wolididgo bee aynooɓe Bayti-Sur ɗiɗawre, o hokki ɓe sulhu nder jam, ɓe njaɓi, o sottini sooje'en maako.

²³Nden o wayliti sooje'en maako, o tiiti Yahuuda e yimɓe mum, ammaa o jaalaama. Laamiiɗo ɗalno Filip haa Antakiya, ngam o suklano kuuɗe laamu. Nde o nani Filip tuurtani mo, o sakli jamum, o safti, o tefi sulhu bee Yahuudu'en, o hokki ɓe ko ɓe ƴami fuu. O huni o acca ɓe ɓe tokko Tawreeta maɓɓe. Haa o holla ɓe sulhu man, o lii'i kirseteeŋga e o teddini haykaliiru bee hokkugo dokke ɗuuɗɗe,

²⁴o jaɓɓi Yahuuda Makabe jaɓɓaama mbooɗŋga. Ɓaawoɗon, laamiiɗo suɓi Ejemonid ngam o laato ngomnaajo haa taƴre lesdi man njaasndi diga Potolemayis haa yotti Gerra.

²⁵O yehi bee hoore maako haa Potolemayis, yimɓe wuro man ɓernino daliila alkawal ngal o haɓɓi bee Yahuudu'en, ɓe ɓerni jamum haa ɓe ƴami ɓe piista alkawal nga'al.

²⁶Nden Lisiyas wolwi yeeso yimɓe fuu, o holli booɗɗum alkawal man, o wafti yimɓe wuro man, o de'itini ɓe. Nden o dilli haa Antakiya. Ndaa ko saali yaake kippuki Antiyokus e noy o wurtiniri hoore maako.