Read Fulfulded 2 Makabe 14 Bible Online

2 Makabe 14 - Fulfulded bible

2 Makabe 14

¹Duuɓi tati ɓaawoɗon, Yahuuda e yimɓe mum keɓi habaru no Demetiriyus ɓii Selewkus jippori haa daande maayo haa Tiripoli bee sooje'en mum e koommbooje mum.

²O honi lesdi man e o mbari Antiyokus bee Lisiyas fuu, mawninoowo laamiiɗo.

³Woodi goɗɗo bi'eteeɗo Alkime, limanjo mawɗo aran, ammaa o soɓno bee ɗowtanaago al'aadaaji Yunaniŋke'en, yaake tuurtol Yahuudu'en. O faami walaa tammunde joonde maako, Yahuudu'en boo, ɗalataa mo fahin o ɓadito hirsirde seniinde.

⁴Ngam daliila man, o tawoyi laamiiɗo Demetiriyus haa hitaande 151, o waddani mo meetaleewol kaŋŋeeri e lisal dibinoohi, bee lice leɗɗe jaytunje ɗe haykaliiru. Nyalde man o jeeɗi, o wi'aay ko waddi mo.

⁵Ammaa o heɓi dabare haa o humta anniya maako kalluka: Nde Demetiriyus ewni mo haa faama anniyaaji Yahuudu'en, kanyum e faada mum. Alkime jaabi mo bana nii:

⁶“Woodi caka Yahuudu'en yeɓre yimɓe wi'eteeɓe Hasidi'en nde Yahuuda Makabe ardani, tum ɓe ɗon taaski konu malla boo tuurtol, ngam taa laamu de'a.

⁷Daliila maɓɓe mi haɗaama huuwgo kuugal am tedduŋgal ngal ndonmi, waato limanjo mawɗo. Kanjum waɗi ngarmi haa ɗo.

⁸Min, ko suklata yam fuu, ɗum ko nafata laamiiɗo, ammaa mi ɗon neɗɗini mbooɗeeŋga yimɓe lesdi am, ngam sooynde hakkiilo yimɓe ɓe mbolwanmi ɗo, ɗon nastina jama'aare men nder ɓilla caatuka.

⁹Mi ɗon ƴama laamiiɗo linya haala man booɗɗum, o suklano ɓaawoɗon lesdi men e jama'aare men ɓillaande, o waŋgina mbooɗeeŋga e feecaare maako haa koo moy fuu.

¹⁰To Yahuuda ɗon bee yoŋki fuu laamu heɓataa jam.”

¹¹Nde Alkime timmini bolle mum, “soobiraaɓe laamiiɗo”, wanyɓe Yahuuda, njaawɗi ummingo tikkere Demetiriyus.

¹²Law o suɓi Nikanor, ardiiɗo yeɓre marnde nyiibi konu, ngam o laato ngomnaajo haa Yahudiya, o neli mo ton.

¹³O umri mo mbargo Yahuuda, o saŋkita yimɓe maako e o jo'itina Alkime nder kuugal limanjo mawɗo haa haykaliiru ɓuranndu teddugo nder duniyaaru.

¹⁴Heefeerɓe wonɓe nder Yahudiya, doggunooɓe yeeso Yahuuda kawtani sooje'en Nikanor. Ɓe ɗon tammi ɓe naftorto masiibooji ukkantooɗi Yahuudu'en.

¹⁵Yahuudu'en nani Nikanor tiiti dow maɓɓe e heefeerɓe lesdi ɗon ngarda bee maako. Nden ɓe ndufi ndoondi dow ko'e maɓɓe, ɓe tori Allah cuɓɗo ɓe bana jama'aare mum haa foroy, o accaay boo wallugo yimɓe maako bee kuuɗe baŋguɗe.

¹⁶Ɓaawoɗon, ardiiɗo maɓɓe Yahuuda hokki umroore dillugo. Ɓe naŋngi laawol law e ɓe kaɓi bee sooje'en konne'en les wuro wi'eteeŋgo Hadasa.

¹⁷Simon, deerɗiraawo Yahuuda foondino haɓgo bee sooje'en Nikanor, ammaa konne'en njuhi mo, nden o jaalaama jaalorgal pamaral.

¹⁸Ammaa nde Nikanor faami cuusal Yahuuda e sooje'en mum, tiinaare nde ɓe kaɓirta ngam lesdi maɓɓe, o seki o waawataa jaaloraago bee balmi.

¹⁹Ngam maajum o neli Posidoniyus, Tewdot e Matatiyas ɓe tefa sulhu bee Yahuuda.

²⁰Nde ɓe linyi nufayeeje ɗe ɓe keɓi, Yahuuda lornani ɗum sooje'en mum, ɓe fuu ɓe njaɓi waɗgo alkawal sulhu man.

²¹Ɓe ta'i sarti ardiiɓe man kawtata. Yeɓre fuu yerɓi moota konu ngoota, ɓe njo'ini koromje tedduɗe.

²²Yahuuda kam jo'inno haa nokkuuje ɓoociiɗe sooje'en maako marɓe balmi, taaskitiiɓe haɓgo to konne'en faasikorake mo. Ammaa carwootiral ardiiɓe ɗiɗo saali jam saliiman.

²³Ɓaawoɗon, Nikanor faɓɓi seɗɗa haa Urusaliima bilaa waɗgo koo ɗume. O yerɓi sooje'en iwɓe lesɗe goɗɗe, tokkiiɓe mo haa Yahudiya.

²⁴O ɗon jooɗi tum bee Yahuuda ngam o yerdi soobiraaku maako.

²⁵Nikanor sarwi mo o ɓaŋga e o heɓa ɓikkoy. Yahuuda te'i e o fuɗɗi seyoraago ngeendam bee de'ere.

²⁶Alkime heɓi habaru narral booɗŋgal gonŋgal hakkunde Nikanor e Yahuuda. Nden o heɓi bataakewol ngol ɓe mbinndi, o yehi bee maagol haa Demetiriyus. O holli laamiiɗo siyaasa ka Nikanor tokki ɗon luuta ka lesdi maɓɓe ngam o suɓi Yahuuda, konneejo laamu, ngam o jooɗo haa koromwal laamu ɓaawo maako.

²⁷Tufle kalluɗo oo, mettini ɓernde laamiiɗo dow Yahuuda. Nder ɓernuki maako, o winndani Nikanor, o wi'i mo o wondaay bee maako nder alkawal ngal o haɓɓi, o umri mo o naŋnga Yahuuda Makabe, o nelda mo haa Antakiya.

²⁸Nde Nikanor heɓi bataakewol man, ɗum mettini mo ɓernde. O tawi o waawataa yewgo alkawal bee goɗɗo mo walaa aybe koo peetel.

²⁹Nden boo, o anndi o waawataa salaago umroore laamiiɗo. Ngam maajum o reenni wakkati no o huuwra ko laamiiɗo umri mo bee ƴoƴre.

³⁰Yahuuda boo faami Nikanor daayti mo e ɗon jaɓɓo mo bilaa feecaare bana ko woowa. O mooɓti yimɓe maako ɗuuɗɓe, o dilli o suuɗoyi ngam o hisa Nikanor.

³¹Nde Nikanor faami no Yahuuda ƴoƴrori mo bana o ƴoyruno mo, o dilli haa haykaliiru ɓuranndu teddugo e senaago haa duniyaaru, saa'i wakkati liman'en lii'oto kirseteeɗi, o umri ɓe ndokka mo Yahuuda.

³²Ammaa liman'en kuni ɓe anndaa haa innu mo o ɗaɓɓititta woni.

³³Nden Nikanor forti juŋngo haa haykaliiru, o huni, o wi'i: “To on ndokkitittaa yam Yahuuda naŋngaaɗo, mi wilan haykaliiru Allah ndu'u, mi sampitan hirsirde nde'e e haa babal man mi nyiɓan suudu lawru wi'eteendu Diyonisos.”

³⁴Nde o wi'i bana nii, o dilli. Liman'en ɓaŋgti do'a haa asama e ɓe tori kisnoowo jama'aare maɓɓe. Ɓe mbi'i mo:

³⁵“Yaa Jawmiraawo, walaa ko marɗa haaje. Bee man fuu, a jo'ini haykaliiru ndu'u ngam tabitingo joonde ma caka amin.

³⁶Yaa Jawmiraawo ceniiɗo, neeɓaay min laɓɓini suudu ma, useni haɗ taa ndu soɓne fahin.”

³⁷Caka ndotti'en Urusaliima, woodi goɗɗo bi'eteeɗo Razis. O suklani ɓiɓɓe wuro maako booɗɗum, yimɓe fuu ngerdi mo jamum. Ɓe ɗon ewna mo “baaba Yahuudu'en” ngam mbooɗeeŋga maako heedi maɓɓe. Nden boo, ɓe tufli mo haa Nikanor.

³⁸Yaake tuurtol aranol, ɓe kaadani mo o accaay tokkaago al'aadaaji Yahuudu'en. Bee dartaare mawnde o soorri yoŋki maako ngam faddaago ɗi.

³⁹Nikanor neldi sooje'en ko ɓurata teemeɗɗe njowo ngam naŋngugo mo, ngam o holla Yahuudu'en noy o wanyiri ɓe.

⁴⁰Nii kam, o tammino o torran ɓe to o naŋngi goɗɗo oo.

⁴¹Nde sooje'en ɓadake hippaago nokkuure nde Razis woni, ɓe ɗonno nasta zawleeru e ɓe keɓi umroore ɓe ngula dammuɗe man. Razis laari walaa no o daɗra, sey o diwi o mbarti bee kaafahi maako:

⁴²o yerdi maaygo bee daraja dow naŋngeego nder juuɗe halluɓe e yiidugo bee torraaji derfanɗi daraja innu.

⁴³Ammaa nde o ɗonno yaawa, o heɓaay o mbarti. Wakkati sooje'en njaawa nastugo nder saare man, o doggi haa dow mahol saare man, o diwi haa lesdi. Sooje'en wonɓe haa les

⁴⁴lori ɓaawo, ɗali babal haa Razis do'i.

⁴⁵Bee non fuu o maayaay, o ummi fahin bee semmbe, o fuu o ƴiiƴam, bee naawnanɗe maako fuu, o saali caka sooje'en, o wa'i dow tapaare townde.

⁴⁶Nde ƴiiƴam maako fuu rufdi, o wurtini teteki maako, o jogi ɗi juuɗe ɗiɗi, o sakkini ɗi dow sooje'en. Nden o tori Jawmiraawo, marɗo ngeendam e poofɗe, lornitana mo ɗi nyalde wonnde. Bana nii Razis maayri.