Read Fulfulded 2 Makabe 15 Bible Online

2 Makabe 15 - Fulfulded bible

2 Makabe 15

¹Nikanor nani Yahuuda e yimɓe mum ɗonno haa lesdi Samariya. O taaski hippaago ɓe nyalaade siwtorde bee tammaago o hisan fitineego.

²Yahuudu'en ɓe o dooli ɓe tokko sooje'en maako, mbi'i mo: “Taa war ɓe bee halleende! Neɗɗin nyalaade siwtorde nde Allah hormini e nde o seni caka nyalaaɗe! Taa yejjitit boo, Allah ɗon yi'a koo ɗume fuu!”

³Ammaa mbaroowo ko'e oo ƴami: “Woodi haa asama laamiiɗo umruɗo ɓe ngaɗa siwtorde na?”

⁴Yahuudu'en njaabi mo: “Ooho, Jawmu asama ɗum Jawmiraawo geeto, kaŋko umri bee hoore mum, yimɓe neɗɗina nyalaade joweeɗiɗaɓre.”

⁵Nikanor jaabi: “Min boo, mi laamiiɗo haa lesdi, mi umri on kooca balmi, on kuuwa kuugal bana laamiiɗo yiɗi.” Ammaa o waawaay humtugo anniya maako kalluka.

⁶Nikanor, keewɗo mawnitaare, ɗonno fantina manti bee wi'go, o darnan lawru jaalorgal bee balmi Yahuuda e yimɓe mum.

⁷Ammaa Yahuuda Makabe ɗon bee hoolaare mawnde. O anndi fakat, Jawmiraawo waddanan mo walliinde.

⁸Kanjum waɗi o suusɗini yimɓe maako taa ɓe kultora kippol heefeerɓe. Sey ɓe ciftora haa ko saali, no Allah hisniri ɓe, ɓe tabitina tammunde maɓɓe, jonta boo Allah Baawɗo hokkan ɓe jaalorgal.

⁹Yahuuda semmbiɗini ɓe bee jaŋngugo nder deftere Tawreeta e annabi'en, o siftinori ɓe konuuji caaliiɗi ɗi ɓe ngaɗi e ɗi ɓe njaali, nii non o semmbiɗini cuusal maɓɓe.

¹⁰Nde o suusɗini ɓe, o timmitini bee waŋgingo sooynde amaana heefeerɓe ɓe'e ɓe kiɓɓintaa iinaaji maɓɓe.

¹¹Bana nii Yahuuda jogni koo moy fuu balmol naa ngol sulke hokkata, ammaa ngol wolde gooŋgaare hokkata. Nden o limtani ɓe koyɗol gooŋgaawol, bee maagol o seynirta ɓe fuu.

¹²Ndaa ko Yahuuda yi'i e maagol: O yi'no Oniyas limanjo mawɗo, goɗɗo mo kuuɗe booɗɗe, giɗaaɗo yimɓe, jaŋkinaaɗo, marɗo boliiɗe keewɗe hikma, ekkitiiɗo diga nderkaaku mum gooŋga e adilaaku. Oniyas ɓaŋgti juuɗe mum, torani jama'aare Yahuudu'en fuu.

¹³Ɓaawoɗon, Yahuuda yi'i nder koyɗol ngo'ol fahin, goɗɗo tedduɗo marɗo gaasa ndaneeha, mayganaajo marɗo sumsum.

¹⁴Oniyas wi'i: “Ndaa Yeremiya, annabiijo Allah, giɗɗo en, enen deerɗiiko'en, o ɗon toro ɗuuɗɗum ngam jama'aare men non boo ngam Urusaliima wuro seniiŋgo.”

¹⁵Nden bee juŋngo maako nyaamo, Yeremiya lii'ani Yahuuda kaafahi kaŋŋeeri. O wi'i mo yaake o hokki mo ki:

¹⁶“Kaafahi ceniiki ki'i, ɗum caahu ngu Allah waɗani ma, hoocu ki, bee maaki a sampitan konne'en ma fuu.”

¹⁷Boliiɗe Yahuuda belɗe ke'i semmbiɗingo sooje'en maako, ke'i suusɗingo ɓe e ke'i boo wartirgo derke'en worɗuɓe bana mawɓe. Urusaliima, diina e haykaliiru ɗonno yeeso joote. Ngam daliila man Yahuudu'en fuu ndawri, taa ɓe ngaɗa saŋngeere ammaa ɓe kippoya konne'en tan e ɓe nasta haɓre bee semmbe maɓɓe fuu.

¹⁸Ko ɓillata ɓe seɗɗa ɗum haala rewɓe maɓɓe e ɓikkoy maɓɓe, deerɗiraaɓe maɓɓe e saaro'en maɓɓe. Ɓurna fuu ɗum haala haykaliiru seniindu.

¹⁹Luttuɓe haa Urusaliima kultori jamum e ɓe ndiwni to ɓe numi dow konu tammiiŋgu waɗgo haa ladde.

²⁰Ɓe fuu ɓe ɗon ndeena wakkati ɓadiiɗum tukus. Konne'en ndari, taaski ndeena haɓre. Nyiibi njahraama haa babe konu ɓoociiɗe, pucci boo ndarino haa bakeeje ɗiɗi fuu.

²¹Yahuuda Makabe laari mooɓre konne'en bee balmi feere-feere e nyiibi kulnooji. Nden o ɓaŋgti juuɗe haa asama, o tori Jawmiraawo baawanɗo waɗgo kaayeefiiji. Yahuuda anndi fakat, jaalaago kam laaranaay semmbe balmi, ammaa ko Allah hoddiri, ngam kaŋko hokkata jaalorgal haa ɓen ngal haanani.

²²Yahuuda tori bana nii: “Yaa Jawmiraawo, yaake Ezekiyas ɗonno laamani Yahudiya, an neli malaa'ikaajo ma, o mbari sooje'en ujine teemerre e cappanɗe njoweetato e njowo caka sooje'en Sennakerib.

²³Jonta boo, Jawmu asama, neldan min malaa'ikaajo booɗɗo, o ardo min, o hulna jabbi konne'en amin.

²⁴Huuwtinir baawɗe ma, faɗɗu huɗooɓe ma e warɓe toonyaago jama'aare ma seniinde.” Bee boliiɗe ɗe'e, Yahuuda timmini do'a mum.

²⁵Mooɓe Nikanor ɗonno ngara bee bawɗi e algaytaaji, bee gimi ɗi konu.

²⁶Gal wakeere maɓɓe, Yahuuda e yimɓe mum tiiti konne'en bee toraago Allah ngam o walla ɓe.

²⁷Ɓe ɗon kaɓa bee juuɗe maɓɓe e ɓe ɗon toro Allah bee ɓerɗe maɓɓe. Ɓe mbari sooje'en ko waɗata ujine cappanɗe tato e njowo. Baŋguki baawɗe Allah seyni ɓe masin.

²⁸Nde konu timmi, Yahuudu'en ceyi masin. Nde ɓe ɗon ngurto pellel konu go, ɓe tawi Nikanor maayi, balmi maako fuu ɗon kommbi maako.

²⁹Ɗum waɗi hooloore e ciikaali! Ɓe fuu, ɓe ngetti Allah, koo moy fuu bee wolde kaakiraaɓe mum.

³⁰Yahuuda aartuɗo hokkugo ɓanndu e yoŋki mum ngam yimɓe wuro mum diga nderkaaku mum, accaay yiɗgo jama'aare mum. O umri ɓe ta'a hoore Nikanor e juŋngo maako nyaamo, ɓe njahra ɗum haa Urusaliima.

³¹kaŋko bee hoore maako o yehi ton, o mooɓti yimɓe fuu haa haykaliiru, o jo'ini liman'en yeeso hirsirde. Nden o neli ɓe tefa sooje'en wonɓe nder suudu semmbiɗndu.

³²O holli ɓe hoore Nikanor kalluɗo e juŋngo ngo o forti bee mawnitaare nde o huɗi Allah e haykaliiru mum seniindu.

³³O umri fahin, ɓe ta'a ɗemŋgal kalluɗo oo, ɓe campita ngal pete pete haa colli. O ɓili juŋngo Nikanor yeeso haykaliiru ngam hollugo haa toy nginnaaku yahrata.

³⁴Nden wonɓe ton fuu, tijji asama, ɓe ngetti Jawmiraawo tedduɗo bee wi'go: “Yettoore woodani kisnuɗo haykaliiru mum bee laɓɓingo ndu.”

³⁵Yahuuda ɓili hoore Nikanor haa mahol suudu semmbiɗndu go ngam hollugo hujja laaɓka dow walliinde nde Jawmiraawo walliri jama'aare mum.

³⁶Kawtal dawri, suɓi hawtaade nyalaade nde'e taa nde yejjite haa foroy. Ɓe ciftora nde hitaande fuu, nyalaade dala-berniwol nde Mardokay, waato nyalde sappo e tataɓre lewru wi'eteendu Adar bee aramiyaare.

³⁷Ndaa ko waɗi Nikanor haa timmoode balɗe mum. Diga nden, wuro Urusaliima ɗon haa juuɗe Yahuudu'en, ngam maajum mi ɗon darna taariha am haa ɗo.

³⁸To ka winndaama booɗɗum e ka weli, nden mi yottake haa marmi haaje e to ka welaa e ka walaa batte boo, mi waɗi deydey ko mbaawmi.

³⁹Ammaa, bana en anndi, ɗum wooɗaay yargo inaboojam nyaaɗɗam malla boo yargo ndiyam tan. Ammaa jillindirgo inaboojam bee ndiyam laatan njaram mbelɗam. Bana non boo, waawgo winndugo taariha, ɗon welana nanooɓe e jaŋngooɓe ka. Bee bolle ɗe'e mi timmini.