Read Fulfulded 2 Makabe 2 Bible Online

2 Makabe 2 - Fulfulded bible

2 Makabe 2

¹Haa nder defte ɓooymaaje, en paami no annabi Yeremiya umri dillanɓe lesɗe jananɗe ɓe njo'ina yiite hirsirde haa nokkuure nyukkiinde bana mi wi'i naane.

²Nde annabi Yeremiya hokki ɓe deftere Tawreeta boo, o umri ɓe taa ɓe majja bee laargo labbi kuuwraaɗi kaŋŋeeri malla cardi e fawneeji mum'en fuu.

³O hokki ɓe sawariiji goɗɗi nannduɗi bee maaji, o tiɗɗini ɓe ɓe njogo Tawreeta bee ɓernde woore.

⁴Nder deftere woore caka maaje, en njaŋngi no Allah umri annabiijo hoocugo nder haykaliiru laymaaru fottirde bee sundukru seniindu, ngam o yahda bee maajum haa dow hooseere haa Muusa laarino lesdi ndi Allah tammini hokkugo jama'aare muuɗum.

⁵Nde o yotti ton, Yeremiya tawi lowol jaasŋgol, o nastini nder maagol laymaaru, sundukru bee hirsirde uurle, nden o sukki nastirde lowol ngo'ol.

⁶Woɗɓe caka tokkiiɓe mo ngiɗno ɓaawoɗon loraago haa ɓe ngaɗa maandorde dow laawol, ammaa ɓe keɓtaay laawol man fahin.

⁷Nde Yeremiya nani ko ɓe ngiɗno waɗgo, o feli ɓe, o wi'i ɓe: “Nokkuure nde'e anndataake, sey to Allah yurmini jama'aare muuɗum, o mooɓti nde fahin.

⁸Nden Jawmiraawo waŋgitinan kuuje ɗe'e. Tedduŋgal maako waŋganan en bana ruulde nde o holluno zamanu Muusa, ɓaawoɗon wakkati Suleymaanu tori mo ngam sengo haykaliiru”.

⁹“Ɓe ɗon limta boo no Suleymaanu, laamiiɗo marɗo hikma, lii'ani Allah kirseteeŋga ngam timmingo e sengo haykaliiru.

¹⁰Bana no Muusa torino Jawmiraawo, yiite jippi diga asama haa wula kirseteeɗi, non boo Suleymaanu torino Allah, yiite iwi gal dow, wari wuli kirseteeɗi fuu.

¹¹Muusa wi'no: Kirseteeŋga lii'aaŋga ngam ittugo hakke wulaama ngam ɓe nyaamaay nga.

¹²Bana ko woowa, Suleymaanu waɗi juulde deydey balɗe joweetati.”

¹³“Ko limta ɗo fuu ɗon nder defte ɗe'e e nder deftere ciftorki nde Nehemiya winndi. En njaŋnga boo noy Nehemiya mahri suudu sigordu defte. O mooɓti defte taariha laamiiɓe e annabi'en, non boo o mooɓti binndi Daawuda e bataakeeji laamiiɓe dow dokke.

¹⁴Yahuuda boo mooɓti defte caŋkitaaɗe ngam daliila konu ngu ɓe koni min. Defte ɗe'e, min mari ɗe haa jonta.

¹⁵To on mari haaje goɗɗe maaje, nele yimɓe ngara, njahrana on ɗe”.

¹⁶“Nde min ngaɗan juulde cenki haykaliiru, min ɗon mbinndana on ngam haa mbaɗon onon boo bana non.

¹⁷Allah hisni jama'aare muuɗum fuu, o hokkiti haa yimɓe maako lesdi maɓɓe, laamu, limanku e kuuɗe haykaliiru

¹⁸bana no o iini nder Tawreeta maako. Kanjum waɗi min ɗon tammo o yurminan min yeeso seɗɗa, o mooɓtan jama'aare amin saŋkitaande haa lesɗe goɗɗe fuu nder lesdi ceniindi. Fakat o hisni min diga masiibooji mawɗi, o seni haykaliiru boo”.

¹⁹Kuuje ɗuuɗɗe ngaɗaama zamanu Yahuuda Makabe e deerɗiraaɓe muuɗum. Kamɓe ceni haykaliiru mawndu e hirsirde.

²⁰Ɓe kaɓi bee laamiiɗo Antiyokus Epifan e bee ɓiyum Epator.

²¹Baawɗe iwɗe diga asamanji mballi yiɗɓe Tawreeta Yahuudu'en bee cuusal e tiinaare, koo to ɓe ɗuuɗaay, ɓe njaɓti lesdi, ɓe parti mooɓe konne'en.

²²Ɓe koociti haykaliiru nanaandu nder duniyaaru fuu, ɓe ndimɗini Urusaliima, ɓe njo'itini umrooje ɗe konne'en ngiɗno wilgo, ɓe kuuwi ɗum fuu bee mo'ere Jawmiraawo e mbooɗeeŋga mum.

²³Binndoowo taarihaaji bi'eteeɗo Yason mo Siren winndi taarihaaji man nder defte jowi, min boo mi haɓdi waɗgo sammeere maaje nder deftere woore tan.

²⁴Ngam mi tawi nder maaje lisaafiiji ɗuuɗɗi e ɗuuɗeeŋga habaruuji saɗani yiɗɓe ekkitaago taariha maajum.

²⁵Mi suklani welnugo taariha man haa yiɗɓe jaŋngugo ka, mi hoynani yiɗɓe maandaago nder ko'e mum'en ko saali, mi nafa boo yiɗɓe jaŋngugo deftere nde'e fuu.

²⁶Waɗgo sammeere defte ɗe'e hoyanaay yam, kuugal man somni yam e wakkati feere numgo dow maagal haɗi yam ɗaanaago.

²⁷Ɗum caɗɗum defango yimɓe ɗuuɗɓe haa haaje koo moy hiɓɓa. Ammaa mi ɗon taaskani saɗirma kuugal man ngam haa mi heɓa daraja ɗuuɗka haa jaŋnganɓe deftere man.

²⁸Mi ɗali binndoowo taariha winnda bee laaɓɗum ko saalino. Min kam mi suklanto rammitingo ko o winndi.

²⁹Bana to ɓe ɗon nyiɓa saare hesre, mahoowo mawɗo woni kaliifaajo nyiɓaalo saare man fuu, ammaa woodi boo cuklantooɗo ko fawnata saare man: Bana nii ndaaranmi kuugal am.

³⁰Giɗɗo winndugo taariha kam, sey annda haala man fuu, dilla, ƴama, faama ɗaɗi haalaaji fuu.

³¹Ammaa ɓe nduŋanto giɗɗo rammitingo taariha ka'a o rammitina e o acca kuuje fuu.

³²Nden kam ndikka mi fuɗɗa taariha am, taa mi juutina ko mbi'mi. Fakat walaa ko juutingo tinndinoore nafata, ndikka rammitingo taariha man.