Read Fulfulded 2 Makabe 3 Bible Online

2 Makabe 3 - Fulfulded bible

2 Makabe 3

¹Nder zamanu limanjo mawɗo bi'eteeɗo Oniyas, yimɓe wonɓe nder Urusaliima, berniwol ceniiŋgol, ceyori joonde jam. Ɓe ɗon ɗowtano umrooje, ngam Oniyas ɗon ɗowtano Allah e o ɗon wanya halleende.

²Laamiiɓe maa ɗon camɗina haykaliiru, ɓe ɗon ngaddana ndu caahuuji marɗi saman.

³Bana nii Selewkus laamiiɗo lesdi Asiya ɗon yoɓa bee ceede maako halal ko ɓe kirsata ton fuu.

⁴Woodi limanjo feere bi'eteeɗo Simon, nder yeɓre Bilga, kaŋko suklani ardaaŋgal haykaliiru. Nden o narraay bee limanjo mawɗo Oniyas dow garamaaji luuɓe berniwol maɓɓe.

⁵Nde o tawi o waawataa jaalaago Oniyas, o yehi o tawoyi Apolloniyus ɓii Tarseyas, kanyum wonno wakiiliijo mawɗo mo lesdi Siriya maŋngo e Finisiya.

⁶Ndaa ko o limti: Jawle ɗuuɗɗe ɗon nder haykaliiru haa Urusaliima. Woodi maa ceede ɗuuɗɗe ɗe limataake, ɗe ɓuri ceede kirseteeɗi. En poti jooɗoraago ɗe bana baytal laamu.

⁷Nde Apolloniyus yiidi bee laamiiɗo, o anndini mo habaru jawle ɗe Simon tinndini mo. Nden laamiiɗo neli wakiiliijo muuɗum ɓurduɗo mawnugo bi'eteeɗo Eliyodor. O umri mo o yaha haa Urusaliima, o wartira jawle ɗe'e.

⁸Eliyodor dilli law bee wi'go o yahan laartoygo berniiji Siriya maŋngo e Finisiya, alhaali boo o ɗon yaha ngam huuwugo anniyaaji laamiiɗo.

⁹Nde o yotti Urusaliima, limanjo mawɗo e yimɓe berniwol man njaɓɓi mo booɗɗum. O anndini ɓe ko waddi mo haa maɓɓe, o yecci ɓe ko ɓe mbi'ata dow ndesaari haykaliiru. Nden o ƴami ɓe to ko ɓe mbi'i man ɗum gooŋga.

¹⁰Limanjo mawɗo holli mo no bolle ɗe Simon faasikiijo wi'i ɓe fuu ɗum fewre. Fakat woodino jawle nder haykaliiru, ammaa ɗum jawle cigaaɗe ngam rewɓe yurumɓe e atiime'en. Woodino boo ceede ɗe Hirkam ɓii Tobiyas mari, kaŋko o goɗɗo mawɗo. Lisaafi maajum fuu waɗi cardi kilo ujine sappo e go'o e kaŋŋeeri kilo ujine jowi.

¹²Ammaa meemgo jawdi man, ɗum toonyaare mawnde dow hooliiɓe nokkuure seniinde e ɗum derfugo tedduŋgal haykaliiru mawndu teddinaandu haa duniyaaru fuu.

¹³Ngam daliila umrooje laamiiɗo, Eliyodor tokki wi'go sey jawle ɗe ndufe haa ndesaari laamiiɗo.

¹⁴Nyalaade nde o ta'ani ɓe sarti, o yehi haykaliiru ngam waɗgo lisaafi jawle gonɗe ton. Mettamɓeram hippi wuro fuu.

¹⁵Liman'en, ɓorniiɓe limce ceniiɗe, cujidi yeeso hirsirde. Ɓe ɗon toro Allah, binnduɗo umroore dow sigaaji, o ayna jawle ngam siguɓe ɗe.

¹⁶Ɓerɗe yimɓe laarɓe limanjo mawɗo fuu metti masin: Ngam yeeso maako sannji, waŋgini mettamɓeram.

¹⁷Kulol naŋngi mo, ɓanndu maako ɗon diwna, ɗon holla naawreeŋga nga o wontiri yeeso yimɓe fuu.

¹⁸Yimɓe ngurti diga calaaje muuɗum'en geɓe geɓe ngam toraago Allah dunca sarru kippotooŋgu haykaliiru.

¹⁹Rewɓe ɗuuɗɓe ɗon ɓorni leppi buhuuje, enɗi haa yaasi, ɓe ɗon ngiilo dow laabi. Budurwa'en, suuɗaaɓe nder calaaje, ndoggi haa dammuɗe malla haa feneetir.

²⁰Ɓe fuu maɓɓe ɓe ɓaŋgti juuɗe gal asama, ɓe ɗon toro Allah ngam o hisna ɓe.

²¹Ɗum huunde yurumnde laargo yimɓe wuro ngo'o ngam ɓe ɗon tallo haa lesdi, ɗon njillindiri, ɗon toro, limanjo mawɗo ɗon nder suno saatuŋgo.

²²Yaake nde koo moy ɗon toro Jawmiraawo baawɗo hisna jawle ɗe'e, o ayna ɗe ngam siguɓe ɗe nder haykaliiru,

²³Eliyodor gal wakeere mum boo, ɗon taasko huuwugo ko ɓe umri mo.

²⁴Nde o ɗonno baŋnge ndesaari haykaliiru bee aynooɓe maako, Jawmu ruuhuuji asama, marɗo baawɗe dow koo ɗume waŋgini huunde hayɗiniinde. Yimɓe marnooɓe cuusal nastugo nder haykaliiru fuu kultori daliila baawɗe Allah ɗe ɓe ngi'i. Ɓe ɗon ndari bana to ɓe ngalaa semmbe, kultoreeŋgol mbari ɓe jokke.

²⁵Ɓe ngi'i puccu ɓorniiŋgu pawne. Ba'iiɗo ngu o kulniiɗo, o ɗon ɓorni sulke kaŋŋeeri. Puccu man diwi bee semmbe e ngu ɓaŋgti kosɗe maagu yeesooje dow Eliyodor.

²⁶Saa'i man nden sukaaɓe ɗiɗo mbaŋgi, semmbiɗɓe, wooɗɓe jamum, ɓorniiɓe limce booɗɗe, ɓe ndari kommbi Eliyodor, gooto gal nyaamo maako, gooto boo gal nano maako, ɓe ɗonno piya mo piyɗe caatuɗe.

²⁷Law Eliyodor do'i haa lesdi, o wonaay nder hakkiilo maako fahin. Ɓe efti mo, ɓe njo'ini mo dow daago.

²⁸Nastuɗo nder suudu ndesaari bee ɗoftooɓe e aynooɓe maako ɗuuɗɓe, o nafataa sam. Yimɓe maako efti mo, ngurtini mo, bana nii koo moy caka maɓɓe annditi maŋngu Allah laaɓɗum tal.

²⁹Bee fiyannde Allah, Eliyodor ɗon waali, wolwataa, o walaa tammunde daɗgo maayde.

³⁰Ammaa yimɓe berniwol maŋgti Allah ngam o hisni babal maako ceniiŋgal. Naane kam, ɓe fuu ɓe ɗon kultori nder haykaliiru, jonta boo, ɓe ɗon bee seyo maŋngo daliila walliinde Jawmiraawo Baawɗo.

³¹Ammaa ɓaawoɗon yimɓe seɗɗa nder ɗoftuɓe Eliyodor tori limanjo mawɗo bi'eteeɗo Oniyas, o toro Allah Baawɗo ngam Eliyodor gonɗo daande maayde.

³²Oniyas lii'ani Allah kirseteeŋga ngam o yamɗitina Eliyodor. O ɗonno hula taa laamiiɗo seka Yahuudu'en ngiɗi mbargo nelaaɗo maako.

³³Saa'i limanjo mawɗo ɗon lii'ano Allah kirseteeŋga ngam heɓgo yaafuye Allah, sukaaɓe waŋgunooɓe haa haykaliiru, ɓorniiɓe limce booɗɗe go, mbaŋgani Eliyodor fahin. Ɓe ndari kommbi maako, ɓe mbi'i mo: “Sey ngetta Oniyas, limanjo mawɗo, ngam barka maako Jawmiraawo yamɗitini ma.

³⁴Ɓaawo elto wooɗŋgo ngo Allah eltiri ma, yah yeccu yimɓe fuu no baawɗe maako mawniri.” Ɓaawo bolle ɗe'e, ɓe majjiti.

³⁵Nden Eliyodor lii'ani Allah kirseteeŋga, o annini waddango mo dokke ɗuuɗɗe ngam o hisni yoŋki maako. Nden o jaɓɓiti Oniyas, o lortidi bee yimɓe maako haa laamiiɗo.

³⁶O yecci yeeso yimɓe fuu ko Allah baawɗo waɗi, no o yi'i mo bee gite maako.

³⁷Laamiiɗo ƴami mo, moy o foti nelgo haa Urusaliima fahin. Eliyodor jaabi mo:

³⁸“To a ɗon bee konneejo malla goɗɗo toonyuɗo laamu ma, nel mo ton. To o daɗi, o warti a yi'an ɓanndu maako fuu ɓocci, ngam fakat baawɗe Allah ɗon haa nokkuure maajum.

³⁹Allah mo asama ɗon ayna haykaliiru ndu'u, o ɗon hisna ndu, o faɗɗan ndu, o ɗon mbara yiɗɓe nastugo nder maaru bee anniyaaji kalluɗi fuu.”

⁴⁰Ndaa ko heɓi Eliyodor e no jawdi njo'inaandi nder haykaliiru hisri luuweego.