Read Fulfulded 2 Makabe 4 Bible Online

2 Makabe 4 - Fulfulded bible

2 Makabe 4

¹Min kolli naane no Simon zammbori jama'aare muuɗum, no o yeewtiri Apolloniyus dow ndesaari haykaliiru. Fahin, Simon nasti waɗi tufle dow Oniyas bee wi'go: “Kaŋko yarni Eliyodor bone, kaŋko roondoto masiibooji man!”.

²O semtaay haadango Oniyas bee wi'go o yiɗi jaɓtugo laamu. Oniyas, nafanɗo berniwol, cuklantooɗo yimɓe wuro mum e koocanɗo wakkati mum ngam aynugo haa yimɓe fuu ɗowtano umrooje!

³Nganyŋgu man saŋkiti haa gooto nder tokkiiɓe Simon mbari yimɓe.

⁴Oniyas faami jokkirgol maajum yehi daayiiɗum nde o laari Apolloniyus ɓii Meneste wakiiliijo, wuro Siriya maŋngo e Finisiya, ɗon walla Simon nder tufle maako.

⁵Nden Oniyas yehi haa laamiiɗo, naa ngam haadango yimɓe maako, ammaa ngam faddugo haajeeji jama'aare fuu.

⁶O faami laaɓɗum tal sonaa to laamiiɗo haɗi fuu, walaa no jam tabitira nder jahargal wuro e Simon boo faasitittaa dow ko o waɗata.

⁷Wakkati seɗɗa ɓaawoɗon, laamiiɗo Selewkus maayi. Antiyokus bi'eteeɗo Epifan roni laamu maako. Nden Yason, deerɗiraawo Oniyas, waɗi rusiya, hoo'i kuugal limanjo mawɗo.

⁸O tefi yiidugo bee laamiiɗo, o wi'i ɗum o hokkan mo ko fotata bee cardi kilo ujine sappo iwndi gal garaama. O ɓesdan boo kilo baakin ujine ɗiɗi bee teemeɗɗe ɗiɗi keɓeteeɗum haa pellel feere.

⁹O waɗi anniya fahin yoɓgo ɗum deydey kilo cardi ujine nayi, to laamiiɗo duŋani mo o maɓɓita babal fijirde e jaŋngirde nde derke'en, o annini winndugo innde yimɓe Urusaliima heƴiiɓe laataago yimɓe lesdi Antakiya.

¹⁰Laamiiɗo jaɓi sawariiji maako ɗi'i. Nde Yason hooci laamu, o dooli yimɓe lesdi maako, ɓe nanndina al'aadaaji maɓɓe bee ɗi Yunaniŋke'en.

¹¹O wili ko laamiiɗo hokkino Yahuudu'en ngam daliila Yuhanna, baaba Epolem. Epolem man, ɓe nelan mo yeeso ɗo bana wakiiliijo mawɗo haa lesdi Roma, ngam o timmitina haɓɓugo alkawal soobaaku bee Roma'en. Yason wili fahin ko Tawreeta Allah tabitini, o waddi al'aadaaji ɗi nanndaay bee Tawreeta sam.

¹²O seyori nyiɓgo suudu fijirde derke'en baŋnge towndiire haykaliiru, o fuufi derke'en waawɓe fijugo, ngara pija bana Yunaniŋke'en.

¹³Bana nii tokkaago al'aadaaji Yunaniŋke'en laati ɗum ferdu, yimɓe tokki al'aadaaji jananɗi, ngam daliila Yason, goɗɗo kalluɗo, konneejo Allah e mo haanaay laataago limanjo mawɗo.

¹⁴Ɗum waɗi haa liman'en ngiɗaa kuugal muuɗum'en: Ɓe teddintaa haykaliiru, ɓe ngeebi kuuɗe kirseteeɗi, to ɓe puufi fuufordu, ɓe ɗon njaawana yahgo babal suudu fijirde, ɗum ko Allah haɗi haa Tawreeta mum.

¹⁵Ɓe acci sam tokkaago ko kaakiraaɓe maɓɓe kuuwata. Ɓe ɗon ndarjiɗina ko Yunaniŋke'en manata.

¹⁶Ngam maajum ɗum fooɗani ɓe saklere naawnde. Yimɓe ɓe ɓe mantori yahdu maɓɓe e ɓe ngiɗi tokkaago, laati konne'en maɓɓe e ɓe njarni ɓe bone.

¹⁷Ɓe njawataako Tawreeta Allah meere! Tokkindirki taariha hollitan ɗum.

¹⁸To duuɓi nayi waɗi fuu, ɓe ɗon ngaɗa nder wuro Tir, pijirle daɗdaɗtirgo, laamiiɗo ɗon tawe haa babal man.

¹⁹Yason kalluɗo, neldi ton wakiili'en Urusaliima, yimɓe lesdi Antakiya ɓe o laatini ɓiɓɓe wuro. Ɓe ngaddi suleyje cardi teemeɗɗe tati ngam lii'anaago kirseteeŋga haa ɗowanteeɗo Herakiles. Ammaa yimɓe man tawi ɗum haanaay huuwtinirgo ceede ɗe fuu ngam kirseteeŋga. Nden kam ɓe kuuwtiniri ceede man ngam kuugal feere.

²⁰Kanjum waɗi, nde Yason hokki ceede ɗe ngam kirseteeŋga haa Herakiles, yimɓe yahruɓe ceede man boo, njahri ɗe ngam waɗgo koommbooje konu.

²¹Antiyokus nelino Apolloniyus ɓii Meneste haa Misra ngam o tawe haa meetugo laamiiɗo Filometor. Saa'i maajum, Antiyokus heɓi habaru laamiiɗo keso wondaay bee maako nder siyaasa. O sukli bee faddaago laamu maako, o dilli haa Jaffa, nden diga ton o dilli Urusaliima.

²²Yason bee yimɓe wuro mum njaɓɓi mo bee tedduŋgal maŋngal. Ɓe nastini mo haa Urusaliima bee pittirlaaji, bee kelle e ilinaali boo. Ɓaawoɗon, Antiyokus lorti haa Finisiya kaŋko bee honooɓe mum.

²³Ɓaawo duuɓi tati, Yason neli Menelas haa laamiiɗo. Menelas ɗum deerɗiraawo Simon mo min mbolwino dow maako naane. Yason neli mo, o yahra ceede haa Antakiya, o heɓa duŋayeeje dow kuuɗe tedduɗe.

²⁴Ammaa nde Menelas yotti haa laamiiɗo, o holli ɗum bee dabare o goɗɗo tedduɗo. O heɓani hoore maako meetaleewol limanjo mawɗo. Ngam maajum o hokki laamiiɗo kilo cardi ujine joweetati dow ko Yason hokki.

²⁵Nde o heɓi bataakewol tabitinanŋgol limanku maako, o lorti haa Urusaliima. Ammaa o he'aay laataago limanjo mawɗo ngam gikku maako halli, o toonyoowo caatuɗo, to o ɓerni o warta bana ndabbaawa ladde.

²⁶Bana nii Yason mo ittino deerɗum bee rikici haa limanku, kanyum boo ittaama haa limanku man. Ɓe ndooli mo dillugo, o yehi o suuɗoyi haa lesdi Ammaniti.

²⁷Menelas heɓi meetaleewol laamu, bee man fuu o suklanaaki hokkugo laamiiɗo ceede ɗe o iinanino mo.

²⁸Sostirat, ardiiɗo suudu Urusaliima semmbiɗndu ɗon ƴamta mo ceede man, ngam kaŋko suklanta jaɓgo garamaaji. Nii non, laamiiɗo ewni ɓe ɗiɗo fuu ngam daliila man.

²⁹Hiddeko o dilla, Menelas darni deerɗum Lisimak bana limanjo mawɗo, Sostirat boo halfini Karates mawɗo sooje'en lesdi Kiprus.

³⁰Nder hitaande man, yimɓe lesdi Tarsis e Mallos tuurti ngam laamiiɗo saahi berniiji maɓɓe haa debbo mum culaaɗo bi'eteeɗo Antiyokis.

³¹Nden laamiiɗo dilli bee jaawal haa ton ngam mo'itingo haala man. O halfini Antakiya haa Andronikus gooto nder saraaki'en.

³²Menelas numi naftorgo wakkatiire man: O wujji kaŋŋeeri seɗɗa nder haykaliiru, o saahi ɗum Andronikus. Luttuɗum boo o soorroyi ɗum haa Tir e haa berniiji ɓadiiɗi.

³³Nde Oniyas nani ɗum, o suuɗoyi haa suudu dewal Dafne kommbi Antakiya, diga ton o fuɗɗi felgo Menelas.

³⁴O sarwootiri bee Andronikus, o waawti mo o mbara Oniyas. Andronikus yehi tawoyi Oniyas, o de'itini mo bee caaŋgal booɗŋgal e bee tammingo mo ko wooɗi. Bana nii Oniyas jaɓi wurtaago hisrude mum, koo nde o ɗonno seka mo. Ammaa nde o wurti, Andronikus mbari mo, bee meeriɗingo adilaaku fuu.

³⁵Nyidduɗum mbar-hoore man mettini yimɓe fuu ɓerɗe, ɗum tuurtini Yahuudu'en e asli feere fuu.

³⁶Nde laamiiɗo warti diga Siliisiya, Yahuudu'en jooɗiiɓe haa Antakiya ngari, tawi mo, ngam ɓe ciŋkana mo daliila mbareeki Oniyas. Yunaniŋke'en boo kolli kanyum'en boo ɗum naawi ɓe.

³⁷Laamiiɗo Antiyokus yiidi bee mettamɓeram e suno maŋngo haa gonɗi keewi mo gite to o siftori hikma e adilaaku maayɗo oo.

³⁸Nden o ɓerni masin, o umri ɓe ɓorta limce boɗeeje Andronikus ɗe limanku, o umri fahin ɓe ɓorta mo limce fuu, ɓe taarna mo wuro fuu, ɓe njahra mo haa babal o mbarno Oniyas. Ɓe mbari mo haa babal man. Nii Jawmiraawo torriri Andronikus bee torra ka haandani mo.

³⁹Saa'i maajum Lisimak wujji nde ɗuuɗɗum nder haykaliiru Urusaliima nder narral bee deerɗiiko Menelas. Kuuje ɗuuɗɗe ɗe kaŋŋeeri caŋkitaama. Habaru man saŋkiti nder berniwol, yimɓe wuro tuurtani Lisimak.

⁴⁰Nde Lisimak laari yimɓe tuurtuɓe e haarɓe mo mone, o darni sooje'en baakin ujine tato, o umri ɓe ɓe caŋkita ɓe bee semmbe. Awranos ardiiɗo sooje'en go, o nayeejo, hakkiilo maako boo famɗi.

⁴¹Nde yimɓe wonɓe haa haykaliiru ngi'i no Lisimak ɗon yerɓa sooje'en mum kippo ɓe, ɓe kooci kaa'e malla cabbi loorɗi malla ndoondi hirsirde, ɓe cakkini ɗum fuu dow Lisimak e yimɓe mum.

⁴²Bana nii ɓe naawni sooje'en ɗuuɗɓe, ɓe mbari woɗɓe maɓɓe, luttuɓe boo ndoggi. Lisimak, gujjuɗo kuuje ceniiɗe, ɓe mbari ɗum kommbi suudu sigordu ndesaari.

⁴³Daliila kuuje ɗe'e, ɓe ngulli Menelas.

⁴⁴Nde laamiiɗo yehi haa Tir, mooɓtirde ndotti'en Urusaliima neli dow maako wakiili'en tato ngam wullaago mo.

⁴⁵nde Menelas faami o do'eteeɗo haa kiita, o tammini Potolome ɓii Dorimen ceede ɗuuɗɗe to o waawi sannjugo anniya laamiiɗo dow kiita do'anka mo.

⁴⁶Potolome yahri laamiiɗo sera, o yahri mo haa daŋki bana haa o hena seɗɗa, o waawti mo o sannji kiita maako.

⁴⁷Bana nii laamiiɗo yoofi Menelas laatiiɗo daliila aybeeji man fuu, o hiiti nelaaɓe go kiita maayde. Ammaa koo Sikuti'en maa njooftanno ɓe ngam ɓe ngalaa aybe.

⁴⁸Nelaaɓe tato mballunooɓe Urusaliima e jama'aare Yahuudu'en e kuuje ceniiɗe ɗe haykaliiru, mbaraama.

⁴⁹Kiita ka'a naawi yimɓe Tir, ɓe ngaɗani nelaaɓe tato go maayiti mawɗo.

⁵⁰Menelas jogi kuugal mum ngam daliila suuno jawdi ardiiɓe laamu. Halleende maako ɓesdi o warti konneejo mawɗo dow yimɓe lesdi maako.