Read Fulfulded 2 Makabe 5 Bible Online

2 Makabe 5 - Fulfulded bible

2 Makabe 5

¹Saa'i maajum Antiyokus ɗon taaskano konu mum ɗiɗaɓu bee Misra.

²Baakin balɗe cappanɗe ɓe ɗon ngi'a nder berniwol Urusaliima wa'iiɓe pucci bee alkibbaaje tuppitaaɗe bee kaŋŋeeri e sooje'en jogiiɓe labbe ɗon caalo nder wuro.

³Ɓe ɗon ngi'a kaafaaje losaaɗe, caffuuji pucci ɗon ndari ngam konu, kippol e haɓtuki e dimmbuki ndarganaaje, kuri piɗaaɗi, jalbugo sulkeeji kaŋŋeeri e goɗɗum ɗum jamɗe konu.

⁴Yimɓe berniwol fuu ɗon toro ɗum laato alaamaaji booɗɗi.

⁵Fewre dow maayde Antiyokus saŋkitaama. Nden Yason mooɓti sooje'en deydey ujineere ngam ɓe kippoya Urusaliima bee juhuki. Aynooɓe wonɓe dow mahi partaama, ragare man berniwol nyaamaama. Menelas suuɗi nder suudu semmbiɗndu ɓurndu haykaliiru towgo.

⁶Yason mbardi yimɓe lesdi mum bilaa enɗam. O faamaay no heɓgo jaalorgal dow banndiraaɓe kam, ɗum sarru. O tammono konne'en o jaalaata naa yimɓe lesdi maako.

⁷Ammaa o waawaay jaɓtugo laamu man. Ragare man fuu, ɗum warti semteende dow maako, o safti o eggi fahin haa lesdi njananndi, haa lesdi Ammaniti.

⁸O maayi nder jurumɗum daliila halleende maako. Aran kam, laamiiɗo Arabiya bi'eteeɗo Aretas naŋngi mo, nastini mo fursina. Ɓaawoɗon o doggi diga berniwol ngol haa berniwol ngola. Haa toy fuu, ɓe ɗon parta mo, ɓe nganyi mo ngam o luuti umrooje jama'aare maako ngam o warti nder lesdi maako, mbaroowo yimɓe lesdi maako. Bana nii, ɓe parti mo haa o yotti Misra.

⁹Diga ton o nasti koommbowal, o dilli haa lesdi Yunaniŋke'en ngam o suuɗoya kommbi Lakedamoni'en, banndiraaɓe Yahuudu'en. Kaŋko dooluɗono yimɓe ɗuuɗɓe eggugo, maayi nder lesdi njananndi.

¹⁰kaŋko ɗalɗo maayɓe haa lesdi uwaaka, yimɓe njooɗaay maayiti maako, o heɓaay uweego haa yenaande lenyol maako.

¹¹Nde laamiiɗo Antiyokus heɓi habaru dow ko saali haa Urusaliima, o tammino lesdi Yahudiya fuu tuurtino. O warti bee jaawal diga Misra, ɓernde maako heewi tikkere, bee mooɓre konu maako, o nyaami berniwol.

¹²Nden o umri sooje'en maako mbara mo ɓe potti fuu e ɓe kirsa boo suuɗiiɓe nder calaaje bilaa enɗam.

¹³Sooje'en mbari derke'en e ndotti'en, ɓe nattini rewɓe e ɓikkoy, ɓe mbari budurwa'en e musinankoy.

¹⁴Nder balɗe tati tan, yimɓe Urusaliima ujine cappanɗe njoweetato maayi: Ujine cappanɗe nayo mbaraama bee piyɗe ɗuuɗɗe, luttuɓe boo coorraama bana maccuɓe.

¹⁵Bana to ɗum he'aayno, Antiyokus hulaay nastugo nder haykaliiru ɓurdanndu senaago haa duniyaaru fuu, Menelas luutɗo umrooje ceniiɗe e lesdi mum ɗofti mo.

¹⁶Bee juuɗe maako coɓɗe, Antiyokus jaɓti kuuje ceniiɗe, o hooci dokke ɗe laamiiɓe woɗɓe njo'inino nder nokkuure seniinde ngam teddingo nde e ngam fawnugo nde.

¹⁷Nder mawnitaare maako, o faamaay Jawmiraawo ɗon tikkani yimɓe wuro man ngam wakkati seɗɗa ngam aybeeji maɓɓe. Daliila man Jawmiraawo sali aynugo haykaliiru.

¹⁸To yimɓe Urusaliima ngaɗaayno aybeeji ɗuuɗɗi, Antiyokus torreteno saa'i o yotti e ɓe cottinanno mo diga anniyaaji maako yinnaaɗi bana Eliyodor mo laamiiɗo Selewkus nelno ngam waɗgo lisaafi jawle gonɗe nder haykaliiru.

¹⁹Ammaa Jawmiraawo suɓaay jama'aare mum ngam daliila haykaliiru, ammaa o yiɗi haykaliiru ngam daliila jama'aare maako.

²⁰Kanjum waɗi haykaliiru yiidi bee sarruuji ukkiiɗi dow jama'aare. Ɓaawoɗon, ndu heɓi riba mo'e ɗe jama'aare man heɓi. Nder tikkere maako, Allah Baawɗo ɗalno haykaliiru bilaa walliinde, ammaa nde Jawmu tagle narridi bee jama'aare mum, haykaliiru boo heɓti tedduŋgal maaru bana naane.

²¹Antiyokus hooci cardi ko waɗata deydey kilo ujine cappanɗe nayi e joweetati nder haykaliiru. Nden o huuci bee jaawal haa Antakiya. O ɗon heewi mawnitaare, o hoociri hoore maako bana walaa ko salorta mo, koo bana doggingo koommbooje dow lesdi malla boo o waawan waɗgo sooje'en njaha dow ndiyam.

²²O ɗali ɓaawo maako mawɓe sooje'en ngam ɓe torra jama'aare Yahuudu'en. Haa Urusaliima, o ɗali Filip mo asŋgol Firiji, marɗo gikku kalluŋgu tulluŋgu ngu Antiyokus,

²³haa hooseere Garizim, o ɗali Andronikus. Menelas boo ɗon ɓilla Yahuudu'en bee halleende tullunde nde ɓeya. Antiyokus wanyino Yahuudu'en jamum

²⁴haa o neli dow maɓɓe haa Urusaliima, Apolloniyus, mawɗo sooje'en wuro Misiya bee sooje'en baakin ujine noogas e ɗiɗo. O umri mo o mbarda worɓe wuro man fuu e o soorra rewɓe e ɓikkoy bana maccuɓe.

²⁵Yaake Apolloniyus yotti Urusaliima, o waɗi bana o goɗɗo giɗɗo jam. O reeni nyalaade siwtorde, nyalaade seniinde nde Yahuudu'en. Nde ɓe ɗon ciwti nyannde man, o wurtini sooje'en maako dow laawol, ɓe ɗon ngaanca nder berniwol.

²⁶Nde yimɓe ngurti haa ndaara ko ɗon saalo, o umri sooje'en maako mbara gurtiiɗo ngam laargo fuu. Ɓaawoɗon boo o nasti nder wuro boo bee sooje'en maako, o mbari yimɓe ɗuuɗɓe.

²⁷Ammaa Yahuuda bi'eteeɗo Makabe wurtodi bee yimɓe mum njoweenayo, ɓe cuuɗoyi dow hooseere. kaŋko e yimɓe man, ɓe ɗon ngeeɗa bana dabbaaji ladde. Ɓe ɗon nyaama ɓiɓɓe leɗɗe tan ngam taa ɓe coɓna ko'e maɓɓe.