Read Fulfulded 2 Makabe 7 Bible Online

2 Makabe 7 - Fulfulded bible

2 Makabe 7

¹Woodi wakkati feere deerɗiraaɓe njoweeɗiɗo e daada mum'en naŋngaama. Laamiiɗo yiɗno doolgo ɓe, ɓe nyaama kusel gaduuru ngel Tawreeta Allah haɗi. Ngam maajum o umri ɓe ɓocca ɓe bee ngabbuwol nagge.

²Gooto caka maɓɓe wolwi dow innde luttuɓe, o wi'i laamiiɗo: “Ɗume ngiɗɗa ƴamgo malla heɓgo haa amin bee waɗgo min bana nii? Faam, ndikkana min maaygo dow luutgo umrooje kaakiraaɓe amin.”

³Laamiiɗo ɓerni ɓernuki caatuki, o umri ɓe njo'ina goŋgoŋji haa yiite.

⁴Nde ɗi nguli, o umri ɓe ta'a ɗemŋgal bolwuɗo bee innde luttuɓe go. O umri boo ɓe ɓola laral hoore maako, ɓe ta'a mo kosɗe e juuɗe yeeso deerɗiraaɓe maako e daada maako.

⁵Nde ɓe ngudditi mo, laamiiɗo umri ɓe ɓaditina mo yiite, ɓe cakkina mo o geeto nder maage. Nde kacceeŋga kusel maako saŋkiti haa taarde jamɗe gonɗe dow yiite, deerɗiiko'en luttuɓe e daada maako caatini ɓerɗe muuɗum'en bee maaygo nder cuusal. Ɓe ɗon mbi'a:

⁶“Jawmiraawo, Allah amin ɗon yi'a min, o ɗon yurmina min. Ngam Muusa wi'i nder yimre nde o aybini jama'aare maako: Jawmiraawo enɗan jagganiiɓe mo.”

⁷Nde arano deerɗiraaɓe go maayi bana nii, ɓe ngaddi ɗiɗaɓo haa ɓe torra ɗum kanyum boo. Ɓaawo ɓe ɗoofi ngaasa maako bee laral gumbal hoore fuu, ɓe ƴami mo: “Noy kadi, a nyaaman kusel gaduuru ndu na malla min campite pete-pete?”

⁸O jaabi bee wolde kaakiraaɓe maako: “Aa'a, mi nyaamataa”. Ngam maajum ɓe njarni mo bone bana arano go.

⁹Saa'i o ɓadi maayugo, o wi'i laamiiɗo: “Mbaroowo ko'e! A ɗon itta ngeendam amin jontaajam. Ammaa Laamiiɗo duniyaaru yeeɗitinan min ngam ngeendam kesam, nduumiiɗam, ngam min ɗon maaya daliila min ɗowtani umrooje maako.”

¹⁰Ɓaawo maako, ɓe njarni tataɓo bone bana ɓeya. Nde ɓe umri mo o wurtina ɗemŋgal maako, o wurtini ngal law, nden o forti juuɗe maako, o diwnaay sam.

¹¹O wi'i bee semmbe: “Ɗum Allah mo asama hokki yam terɗe ɗe'e. Nde mi ɗon ɗowtano umrooje maako, mi yerdi ɗe ta'e, ngam mi mari tammunde mawnde, o hokkitittam ɗe”.

¹²Laamiiɗo bee hoore muuɗum e taariiɓe ɗum kayɗini daliila cuusal derkeejo oo mo faalaay boneeji ɗi o ɗonno yara.

¹³Nde o maayi, ɓe njarni nayaɓo bone bana ɓeya boo.

¹⁴Nde o ɓadake maaygo, o wi'i laamiiɗo: “Ɗum booɗɗum margo tammunde to ɗum yimɓe mbari ma! Allah tammi ummitingo min ɓaawo maayde! Ammaa an, walaa ummitineeki, walaa ngeendam kesam ngam ma.”

¹⁵Ɓaawoɗon ɓe ngaddi njowaɓo haa ɓe torra mo kanyum boo.

¹⁶O suti laamiiɗo, o wi'i: “A mari baawɗe waɗgo ko ngiɗɗa fuu dow yimɓe, koo to an boo a maayoowo bana maɓɓe. Ammaa taa num Allah wudini jama'aare amin!

¹⁷A tammi laargo baawɗe maako mawɗe, o torran on an e ruutu ma.”

¹⁸Nden njoweegoojo boo yotti. Hiddeko o maaya, o wi'i laamiiɗo: “A ɗon sakla hoore ma meere! To min ɗon njara bone bana nii, ɗum minin toonyi, ngam jama'aare amin waɗi hakke dow Allah. Kanjum waɗi sarruuji mawɗi ɗi ukkani min.

¹⁹Ammaa taa num a jooɗoto bilaa kiita, an tuurtanɗo Allah bee hoore mum!”

²⁰Daada maɓɓe o darjiɗinaaɗo masin, haani ciftoren mo. Nder nyalaade woore, o laari no ɓe mbardi ɓikkoy maako njoweeɗiɗo. Bee man fuu, o ɗon munyi, o ŋati nyii'e maako ngam o hooli Allah.

²¹Bee semmbe, o suusɗini ɓikkoy maako fuu bee wolde kaakiraaɓe maɓɓe. Bolle ɗe o wolwani ɓe ɗon kolla enɗam debbo e cuusal gorko. O wi'i ɓe:

²²“Mi anndaa noy ngeendam mon fuɗɗiri nder reedu am. Naa min waatani on poofɗe ngeendam, naa min njo'ini terɗe ɓanndu mon.

²³Tagɗo duniyaaru woni fuɗɗam koo ɗume fuu, kaŋko tagi ɓiɓɓe Aadama nder reedu daada maɓɓe. Fakat, o yurminan on, o hokkitan on yoŋki mon, ngam on njaɓi maaygo jonta, daliila ngam on ɗowtani umrooje maako.”

²⁴Laamiiɗo Antiyokus tammino o ɗon janca mo, boliiɗe ɗe debbo oo wolwi laati bana kuudi. Ngam maajum laamiiɗo tefi haa waylita hakkiilo gaajiijo debbo go, bee boliiɗe e kunayeeje: O huni riskingo mo, hokkugo mo hayru ngam o laato “soobaajo laamiiɗo”, o halfinan mo ardaaŋgal haa yolnde, to o acci al'aadaaji kaakiraaɓe maako.

²⁵Ammaa derkeejo oo faalaay ko laamiiɗo wi'i. Nden laamiiɗo ɓaditini daada maako ngam o sarwa ɓiyiiko ngam taa saa'a kisndam daɗa mo.

²⁶O tokki wolwango daada derkeejo go haa duuri, nden o jaɓi wolwango ɓiyiiko.

²⁷Daada ɓaditi ɓiyum, faamtini mo bee wolde kaakiraaɓe mum no laamiiɗo halliri, o wi'i mo: “Ɓiŋngel am, yurminam, siftor mi roondi ma nder reedu am lebbi joweenay, a musini kosam am duuɓi tati. Mi hakkilani ma, mi nyaamni ma, mi mawnini ma haa wargo hannde.

²⁸Mi tori ma ɓiŋngel am, laar asama e lesdi, laar ko woni haa maajum. Annditit Allah waɗi ɗum diga ɗum walaa, non o tagri ɓiɓɓe Aadama.

²⁹Taa hul mbaroowo oo, ammaa yerda maaygo bee cuusal bana deerɗa'en. Mi heɓtete bee deerɗa'en fuu saa'i to Allah waɗi mbooɗeeŋga mum.”

³⁰Nde o timmini wolwugo, derkeejo go wi'i bee semmbe: “Ko ndeenoton fahin, onon boo? Mi ɗowtantaako umroore laamiiɗo, ammaa mi ɗowtanto umrooje Tawreeta ka Allah hokki kaakiraaɓe amin bee juuɗe Muusa.

³¹An laamiiɗo Antiyokus, jarnuɗo jama'aare amin bone, a daɗataa kiita Allah!

³²Minin kam, min ngaɗi hakke, kanjum waɗi min ɗon njara bone jonta.

³³Jawmiraawo amin, Allah geeto, tikkani min seɗɗa, ngam o elta min e o jaŋngina min ko haani. Ɓaawoɗon, o narritan bee amin, jagganiiɓe mo.

³⁴Ammaa an, konneejo Jawmiraawo, ɓurduɗo nyiddugo haa tagle fuu, taa mawnita. An ɓaŋgtuɗo juŋngo ma dow ɓiɓɓe Allah, taa tamma a heɓan de'eende!

³⁵Ngam Allah baawɗo ɗon laara koo ɗume fuu, a daɗataa kiita maako.

³⁶Deerɗam'en, ɓaawo ɓe ngiidi bee bone wakkati seɗɗa, ɓe mbaraama ngam ɗowtaare maɓɓe heedi alkawal Allah, ngeendam nduumiiɗam ɗon reeni ɓe. Ammaa an, Allah hiitete e o torrete deydey mawnitaare ma.

³⁷Bana deerɗam'en, min boo mi ɗon taaski hokkugo ɓanndu e yoŋki am daliila umrooje kaakiraaɓe am. Mi ɗon toro Allah o yurmina jama'aare amin. An boo o yarne bone, o jarribe ngam haa keɓta kaŋko tan woni Allah.

³⁸Min laato min bee deerɗam'en, ragare'en yargo bone ngam tikkere Allah Baawɗo ukki dow jama'aare amin fodde adilaaku mum.”

³⁹Haala ka'a mettini laamiiɗo jamum. O tuurti, o torri derkeejo oo ko ɓuri dow no o torruno ɓeya.

⁴⁰Derkeejo oo tabiti nder adilaaku mum, o hooli Jawmiraawo haa yotti maayde.

⁴¹Haa ragare boo, ɓe mbari daada ɓaawo ɓiyum'en.

⁴²Ndaa ko mbolwumi ko ɗuuɗɗi dow nyaamduuji karminaaɗi e dow torraaji ɗi tammaaki waɗeego.