Read Fulfulded 2 Makabe 8 Bible Online

2 Makabe 8 - Fulfulded bible

2 Makabe 8

¹Yahuuda Makabe e tokkiiɓe mo caali bee sirri nder gure. Ɓe ewni deerɗiraaɓe lenyol maɓɓe ngam ɓe tokko ɓe, ɓe pooɗi ɗowtaniiɓe nuɗɗinki Yahuudu'en bee gooŋga haa maɓɓe, ɓe mooɓti yimɓe baakin ujine joweego.

²Ɓe tori Jawmiraawo ngam o walla jama'aare maako nde duniyaaru fuu torri e ɓe tori mo o yurmina haykaliiru ndu heefeerɓe coɓni.

³Ɓe tori mo o yurmina wuro ngo konne'en ngiɗi nattingo e wilgo. Ɓe tori mo fahin ngam o nana sawtu ƴiiƴam ndufaaɗam ngiɗɗam,

⁴taa o yejjita ɓikkoy koy ngalaa aybe koy ɓe mbari, o torra huɗɓe mo. Ninnon Allah hollirta o wanyi kalluɗum.

⁵Nde Yahuuda laati ardiiɗo mooɓre, walaa ko heefeerɓe mbaawi waɗgo ngam Allah acci tikkango jama'aare mum, ɗon mo'ana nde.

⁶Yahuuda hippoyi berniiji e gure bee juhuki, o wuli ɗe, o nyaami nokkuuje booɗɗe, o farti konne'en maako ɗuuɗɓe.

⁷Ɓurna fuu, jemma o hipporto gure man, o wallitoro e nyiɓre. Habaru jaalorgal maako saŋkiti haa toy fuu.

⁸Filip, kaliifaajo laamiiɗo haa Urusaliima, faami Yahuuda heɓi nokku seɗɗa seɗɗa, o heɓi jaalorgal dow jaalorgal. Nden o winndani Potolome ngomna lesdi Siriya maŋngo e Finisiya ngam ƴamgo mo o wara o walla laamiiɗo.

⁹Potolome suɓi Nikanor ɓii Patorokol, gooto caka soobiraaɓe laamiiɗo, ngam ardanaago kuugal nga'al bee ko yaawi. O darni mo haa hoore mooɓre sooje'en ko dillani ujine noogas iwɓe lesɗe feere feere, o neli ɓe ngam ɓe nattina jama'aare Yahuudu'en. O umri ardiiɗo sooje'en bi'eteeɗo Gorgiyas ɗofta mo. Gorgiyas oo, o baawɗo konu masin.

¹⁰Roma'en tokkino laamiiɗo Antiyokus nyamaande cardi ko dillani baakin kilo ujine cappanɗe jowi e nayi. Nikanor annini yoɓgo nyamaande maajum fuu bee soorrugo bana maccuɓe Yahuudu'en naŋngaaɓe haa konu.

¹¹O yaawi maatingo berniiji gonɗi sera maaje, o ewni filooɓe ngam ɓe ngara ɓe cooda maccuɓe Yahuudu'en, o iinani ɓe coggu maccuɓe cappanɗe njoweenayo fuu baakin cardi kilo noogas e joweeɗiɗi. O numaay Allah baawɗo taaskani mo torra caatuka.

¹²Yahuuda nani Nikanor naŋngi laawol. Nden o maatini yimɓe maako no konne'en ɓadi.

¹³Hulɓe e yimɓe ɓe koolaaki adilaaku Allah fuu ndoggi ndilli daayiiɗum.

¹⁴Woɗɓe boo coorri ko ɓe mari fuu, ɓe tori Jawmiraawo hisna ɓen ɓe Nikanor kalluɗo soorrino diga haɓre fuɗɗaay.

¹⁵To Jawmiraawo yiɗaa hisnugo ɓe daliila yiide mum ngam maɓɓe, ɓe tori mo o hisna ɓe ngam ɓe ɗowtani alkawal ngal o haɓɓi bee kaakiraaɓe maɓɓe, ngam kaŋko woni Allah ceniiɗo, tedduɗo, ewniiɗo ɓe ngam ɓe laato jama'aare maako.

¹⁶Yahuuda Makabe mooɓti yimɓe muuɗum, limgal maɓɓe waɗi ujine joweego. O umri ɓe taa ɓe kula konne'en, taa ɓe kultora ngam ɓe ndaari ɗuuɗeeŋga limgal heefeerɓe waranɓe dow maɓɓe bee daliilaaji kalluɗi. Sey ɓe kaɓa bee cuusal,

¹⁷ɓe ciftora ko konne'en ngaɗi haa haykaliiru, toskaare nde ɓe ukkani Urusaliima e ɓe ciftora boo no ɓe kaɗiri al'aadaaji Yahuudu'en.

¹⁸Yahuuda ɓesdi wi'go: “Yimɓe ɓe'e ɗon koola balmi muuɗum'en e ngorgu muuɗum'en. Ammaa enen kam, hoolaare men ɗon dari dow Allah baawɗo, to o dimmbi hoore maako, o halkan mooɓe garɗe hippaago en e koo duniyaaru fuu!”.

¹⁹Nden Yahuuda siftinori ɓe no Allah walliri kaakiraaɓe maɓɓe: Bana zamanu Sennakerib, o mbari konne'en maɓɓe ko dillani ujine teemerre e cappanɗe njoweetato e njowo

²⁰malla saa'i haɓre bee Galaatiya'en haa Baabila. Nde Yahuudu'en ujine njoweetato bee Makedoniya'en ujine nayo kawtani ɓe, ɓe kaɓi bee yimɓe ujine teemerre bee noogas, ammaa Makedoniya'en njari bone, ɓe mbaawaay jaalaago. Sey yimɓe ujine njoweetato go keɓi jaalorgal dow maɓɓe daliila ballal iwŋgal diga asama, nden ɓe ngaɗi ndahalaagu ɗuuɗŋgu.

²¹Bee bolle ɗe'e, Yahuuda suusɗini sooje'en muuɗum, ɓe taaski maaygo ngam Tawreeta Allah e ngam lesdi maɓɓe. O sennditi sooje'en maako geɓe nayi,

²²yeɓre fuu ɗon mari ko dillani sooje'en ujineere bee teemeɗɗe njowo, o halfini yeɓre fuu haa deerɗiraaɓe maako, Simon, Yusufu, Yonatan e kaŋko bee hoore maako boo.

²³Ɓaawo o umri Eli'azaaru jaŋnga fasluwol nder deftere seniinde, o hokki ɓe kalimawol ngo'ol: “Bee ballal Allah!” Nden, bee yeɓre arannde, o ardi, o hippoyi Nikanor.

²⁴Allah baawɗo walli Yahuudu'en, bana nii ɓe nattini konne'en ko ɓurata ujine njoweenayo. Ɓe naawni sooje'en Nikanor ɗuuɗɓe, ɓe ta'i terɗe maɓɓe, ɓe ndiiwi jama'aare konu maako luttunde.

²⁵Ɓe koo'i ceede warnooɓe haa sooda ɓe bana maccuɓe. Ɓe taasni dogguɓe daayiiɗum, ammaa ɓaawoɗon, nde ɓadake jeŋngugo, ɓe lori.

²⁶Nde nyalaade siwtorde ɗon fuɗɗa to naaŋge muti, ɓe acci taasnugo ɓe.

²⁷Nde ɓe mooɓti balmi konne'en, ɓe kooci ko woni haa maayɓe, nden ɓe ngaɗi juulde siwtorde. Ɓe maŋgti Jawmiraawo, ɓe ngetti mo ngam o yerdi ɓe ngeeɗa nyalaade nde o waŋginani ɓe mbooɗeeŋga maako fahin.

²⁸Ɓaawo nyalaade siwtorde, ɓe cenndi ndahalaagu konu maajum, yeɓre haa toonyaaɓe, yeɓre boo haa rewɓe yurumɓe e ɓiɓɓe atiime'en, nden luttuɗum man ɓe cenndi hakkunde maɓɓe bee ɓiɓɓe maɓɓe.

²⁹Ɓaawoɗon ɓe kawti ɓe tori Jawmiraawo, o sulhindira jagganiiɓe mo bee maako, kaŋko marɗo mbooɗeeŋga ɗuuɗŋga.

³⁰Ɓaawoɗon Yahuuda e yimɓe muuɗum ngaɗi haɓre bee yimɓe Timote e Bakides. Ɓe mbari sooje'en konne'en ko ɓuri ujine noogas e ɓe njaɓti cuuɗi cemmbiɗɗi. Ɓe cenndi ndahalaagu konu, geɓe ɗiɗi potanɗe kal-kal, yeɓre woore nde maɓɓe, yeɓre woore boo nde toonyaaɓe, ɓiɓɓe atiime'en e rewɓe yurumɓe e ngam nayeeɓe.

³¹Ɓe koo'i balmi konne'en, ɓe njo'ini ɗi haa nokkuuje kaanɗuɗe jo'ingo balmi. Kuuje luttuɗe boo ɓe njahri ɗe haa Urusaliima.

³²Ɓe mbari ardaniiɗo konu Timote, kaŋko yarni Yahuudu'en ɗuuɗɓe bone.

³³Yaake nde ɓe ngaɗa juulde jaalorgal, ɓe nguli wulɓe dammuɗe haykaliiru, ɓe nguli Kallisten cuuɗiiɗo nder cuurel pamarel. O hiitaama deydey kuuɗe maako kalluɗe.

³⁴Nikanor kalluɗo, gadduɗo filooɓe ujineere ngam soodgo Yahuudu'en go,

³⁵jaalaama bee ballal Jawmiraawo bee juuɗe yimɓe ɓe o wanyino. O ɓorti ngapaleewol maako booɗŋgol, o doggi feere maako caka gese bana maccuɗo tefanɗo hisrude. O yotti Antakiya, o seyori saa'a nga o heɓi bee daɗgo ngam sooje'en maako njaalaama.

³⁶kaŋko, o mawniti bee wi'go o yoɓan ceede ɗe Roma'en tokkino ɓe bee soorrugo yimɓe Urusaliima bana maccuɓe. Jonta kam, o annditi Yahuudu'en njaalataake, ngam Allah woni balloowo, aynoowo maɓɓe e ngam ɓe ɗowtani umrooje ɗe o umri ɓe kamɓe boo.