Read Fulfulded 2 Makabe 9 Bible Online

2 Makabe 9 - Fulfulded bible

2 Makabe 9

¹Yaake maajum, laamiiɗo Antiyokus warti lesdi Persiya bilaa tedduŋgal sam.

²O nasti nder berniwol Persepolis. O tefi jaɓtugo berniwol man e luuwgo suudu dewal maagol. Ammaa yimɓe berniwol man ummani mo, ɓe kooci balmi. Nde yimɓe berniwol man parti mo, Antiyokus safti, doggi nder cemtuɗum.

³Nde o yotti kommbi Ekbatan o nani ko heɓi Nikanor, Timote e mooɓe konu maɓɓe.

⁴Nden o ɓerni, o hooci anniya waataago dow Yahuudu'en cemtuɗum ko Persiya'en ngaɗi mo bee fartugo mo. Nden o umri laanyoowo moota pucci maako, o samna, taa o daro sey to ɓe njottake. Bee mawnitaare o wi'i bee semmbe: “To mi yottake Urusaliima, mi laatinan wuro man yenaande Yahuudu'en”. Ammaa o anndaa kiita Allah ɗon dow maako.

⁵O timminaay boliiɗe maako fuu, Jawmiraawo gi'anɗo koo ɗume fuu, Allah mo Isra'iila, fiyi mo bee nyawu kalluŋgu, ngu walaa kurgun. Laamiiɗo maati naawreeŋga caatuŋga nder reedu muuɗum, teteki maako tokki naawugo.

⁶Torra ka'a haandani mo ngam o yarnino yimɓe feere boneeji ɗuuɗɗi ɗi tinndintaake!

⁷Ammaa ɗum fuu, ɗum ustaay mawnitaare maako koo seɗɗa, o ɗon mawniti bana naane. Nder tikkango Yahuudu'en, o umri ɓe njaawna moota pucci maako. Ammaa haa ɗon, o do'i diga dow moota pucci njaawaŋga go. Do'ere man saati masin, terɗe maako fuu ngewi.

⁸Hiddeko o yewa, o heewno mawnitaare, o tammono o ɓurduɗo tagle luttuɗe, o waawan umrugo ilamji maayo bana o waawirta eftugo e foondugo kooseeje towɗe dow awnirɗum! Jonta boo, ndaa mo, o waali forti haa lesdi, ɓe efti mo dow naasiwo. Yimɓe fuu ceedi, ɗum alaama mbaŋguka ka baawɗe Allah.

⁹Laamiiɗo kalluɗo oo ɗonno bee yoŋki tawon, ammaa o ɗon torro masin: Kusel ɓanndu maako ɗon itta daliila nyolnere maaru, gilɗi ɗonno nyaama gite maako. Kacceeŋga ngurtotooŋga e maako ɗonno soofna ɓerɗe sooje'en maako fuu.

¹⁰Aran kam, o tammino koo koode asama boo ɗon haa juuɗe maako. Jonta kam, walaa giɗɗo ɓaditaago mo haa efta mo daliila kacceeŋga man.

¹¹Allah torri Antiyokus, o maati naawreeŋga naawka. O safti o fuɗɗi miccitaago mawnitaare maako, o numti dow joonde maako hallunde go.

¹²Ɗum yotti haa kaŋko maa o waawataa ɓusugo kacceeŋga ɓanndu maako. Nden o wi'i: “Ndikka maayoowo kam acca foondugo hoore mum bee Allah, o ɗowtano mo”.

¹³Sey goɗɗo kalluɗo oo fuɗɗi toraago Jawmiraawo mo enɗataa goɗɗo bana nii, o wi'no:

¹⁴“Mi ɗonno yaawa yahgo Urusaliima berniwol ceniiŋgol ngam mi nattina ngol e mi wartira ngol yenaande mawnde. Jonta kam, mi rimɗini ngol.

¹⁵Mi waɗno anniya mbargo Yahuudu'en e ɓiɓɓe muuɗum'en mbareteeɓe, mi sakkina haa dabbaaji ladde e jigaaje ngam mi hiiti ɓe ke'aay uweego. Ammaa jonta mi yiɗi ndimu maɓɓe fota kal-kal bee Ateniya'en.

¹⁶Ɓooyma mi luuwno haykaliiru seniindu, jonta mi fawnan ndu bee dokke ɓurɗe wooɗgo, mi jo'itinan kuuje ceniiɗe koo'aaɗe haa maare, limgal maaje ɓuran naane ɗuuɗgo. Mi yoɓan bee jawle am boo coggu kirseteeɗi.

¹⁷Fahin boo mi nastan nder diina Yahuudu'en, mi taaroto haa gure fuu ngam anndingo baawɗe Allah.”

¹⁸Ammaa boneeji Antiyokus accaay sam ngam kiita Allah teddi dow maako bana ko ɗum haandani mo. Laamiiɗo itti tammunde yamɗitineego. Nden o winndani Yahuudu'en bataakewol ngam toraago ɓe. Ndaa ko winnda nder maagol:

¹⁹“Antiyokus, laamiiɗo e ardiiɗo sooje'en, hoofni Yahuudu'en jooɗiiɓe haa lesdi muuɗum'en bee welwelo. O ɗon yelano ɓe hayru e jam!

²⁰To on yamɓe, onon e ɓiɓɓe mon, to walaa ko ɓilli on, nden kam mi ɗon yetta Allah mo mi hooloto ɗum.

²¹Bee enɗam ciftoranmi on e numgo neɗɗaaku e mbooɗeeŋga no njogoriiɗon yam. Wartugo am lesdi Persiya, mi nyawaama nyawu caatuŋgu, ndaa mi ɗon waali, forti, mi tampuɗo. Ngam maajum tawmi ndikka mi suklano wonɓe les am.

²²Fakat mi ittaay tammunde, mi yamɗitan.

²³Ammaa mi ɗon siftora, baaba am suɓi bee hoore mum mo o halfini laamu maako yaake o ɗon dilla honoygo “lesdi towndi”.

²⁴O yiɗaa yimɓe maako cakla to woodi ko waɗi malla to ɓe keɓi habaruuji kalluɗi. Nii kam koo moy anndi haa moy laamiiɗo halfini kuuɗe lesdi.

²⁵Laamiiɓe lesɗe ɓadiiɗe laamu am ɗon ndeena wakkatiire nde ɓe naftorto, ɓe ɗon ndeena ko tammi heɓgo yam. Ngam maajum mi halfini ɓiyam Antiyokus, o rono yam. Yaake nde ngiɗmi yahgo haa lesɗe towɗe, mi holli ɓiɗɗo am haa ɗuuɗɓe caka mon, mi halfini mo haa juuɗe mon. On tawan bataakewol ngol mi winndani mo.

²⁶Ndaa ko mi ƴamata on jonta: Ciftore mo'e ɗe mi mo'ani jama'aare mon e yimɓe mon fuu, njogireeɗam min e ɓiyam fuu bee mbooɗeeŋga.

²⁷Mi anndi fakat o tokkoto anniyaaji am, o jogoto on bee mbooɗeeŋga e enɗam e o narran bee mooɗon.”

²⁸Ndaa nii mbaroowo ko'e, jancuɗo Allah, timmiri nder torraaji naawɗi ɓurɗi ɗi o torriri yimɓe. O maayri maayde yurumnde caka kooseeje haa lesdi njananndi.

²⁹Filip mo mawnidi bee laamiiɗo wartiri ɓanndu maako haa Antakiya. Ammaa nde o hoolaaki ɓii Antiyokus, o dilli Misra kommbi laamiiɗo Potolome Filometor.