Read Fulfulded Matta 13 Bible Online

Matta 13 - Fulfulded bible

Matta 13

¹Nyalaade man Yeesu wurti saare, yehi, jooɗi haa fomoonde weendu.

²Mooɓe ɗuuɗɗe ngari haa maako. Ngam man o nasti koommbowal[19], o jooɗi nder maagal, mooɓre boo dari haa fomoonde.

³O ekkitini nde kuuje ɗuuɗɗe bee balndi. O wi'i ɓe: “Demoowo yehi ngesa ngam saakoygo.

⁴Nde o ɗon saaka, aawdi ngoɗndi soli dow laawol, colli ngari, cuɓti ndi.

⁵Aawdi ngoɗndi saami haa korka'e, haa lesdi ɗuuɗaay. Ndi fuɗi law ngam lesdi luggaay.

⁶Nde naaŋge fuɗi, nge wuli fuɗŋgooji, ɗi njoori ngam ɗi ngalaa ɗaɗi.

⁷Aawdi ngoɗndi soli caka gi'e. Gi'e mawnidi bee maari, ɓilli ndi.

⁸Ammaa aawdi ngoɗndi soli haa lesdi mboondi, ndi nafi, waɗi cammeeje: Goɗɗe ɗon bee gabbe teemerre, goɗɗe bee cappanɗe joweego, goɗɗe boo bee cappanɗe tati.”

⁹Mo woodi noppi fuu, nana!

¹⁰Ɓaawoɗon pukara'en ngari haa Yeesu, ƴami mo: “Ngam ɗume a ɗon wolwana yimɓe bee balndi?”

¹¹O jaabi ɓe: “Onon, Allah anndini on sirriiji laamu mum, ammaa kamɓe ɓe anndinaaka.

¹²Ngam marɗo huunde, ɓe ɓesdanan mo haa o wona nder jeynitaare, ammaa mo maraay koo ɗume, ɓe koocan koo peetum maako.

¹³Ngam man mi ɗon wolwana ɓe bee balndi. Ngam ɓe ɗon ndaara, ammaa ɓe ngi'ataa. Ɓe ɗon nana, ammaa ɓe paamataa sam.

¹⁴Bana nii annabaaku Esaaya gooŋɗiri ngam maɓɓe, o wi'no: On nanan bee noppi mon, ammaa on paamataa sam, on ndaaran bee gite mon, ammaa on ngi'ataa koo ɗume.

¹⁵Ngam ɓerɗe yimɓe ɓe'e maatataa koo ɗume, ɓe cukki noppi maɓɓe, ɓe maɓɓi gite maɓɓe, ngam taa ɓe ngi'a, taa ɓe nana, taa ɓe paama, taa ɓe tuuba boo, ngam taa min mi yamɗitina ɓe.

¹⁶Ammaa onon, barka woodani gite mon ngam ɗe ɗon ngi'a, barka woodani noppi mon boo ngam ɗi ɗon nana.

¹⁷Gooŋga mbi'anmi on: Annabi'en e adili'en ngiɗno yi'ugo ko ngi'oton, ammaa ɓe ngi'aay, ɓe ngiɗno nanugo ko nanoton, ammaa ɓe nanaay.”

¹⁸“Onon, nane sifa balndol demoowo go.

¹⁹Yimɓe woɗɓe nani habaru laamu asamanji, ammaa ɓe paamaay. Kamɓe ɓe nanndi bee aawdi colndi haa laawol, ngam kalluɗo waran, wifto ko saaka nder ɓerɗe maɓɓe.

²⁰Woɗɓe nanndi bee aawdi colndi haa korka'e. Kamɓe, to ɓe nani wolde Allah, law ɓe njaɓa nde bee seyo.

²¹Ammaa ɓe ngalaa ɗaɗi, ɓe tabitittaa, ngam to ɓillaare e toonyaare ukkanake ɓe daliila wolde Allah, ɓe accan nuɗɗinki law.

²²Woɗɓe boo nanndi bee aawdi caka gi'e. Kamɓe, to ɓe nani wolde Allah, laruuraaji e esto risku ɓiɗɗan wolde man, nde waɗataa nafuuda sam.

²³Ammaa woɗɓe nanndi bee aawdi colndi haa lesdi mboondi. Kamɓe, to ɓe nani wolde Allah, ɓe paami nde, ɓe mbaŋginan ɓenndalooje: Woɗɓe cowi teemerre, woɗɓe cappanɗe joweego, woɗɓe boo cappanɗe tati.”

²⁴Yeesu wolwani ɓe balndol feere, o wi'i: “Laamu asamanji nanndi bee goɗɗo mo saaki aawdi mboondi waato alkamaari nder ngesa muuɗum.

²⁵Jemmaare feere, nde yimɓe fuu ɗon ɗaani, ganyo maako wari, saaki aawdi geene caka alkamaari maako, dilli.

²⁶Nde alkamaari mawni, waɗi cammeeje, geene boo mbaŋgi.

²⁷Huuwooɓe jawmu ngesa ngari, mbi'i mo: Jaagorɗo, naa alkamaari a saaki nder ngesa maaɗa na? Ko waɗi geene boo mbaŋgi ton?

²⁸O wi'i ɓe: Ganyo am waɗi ɗum. Huuwanooɓe ƴami mo: Nden kam a yiɗi min ɗoofa ɗe na?

²⁹O jaabi ɓe: Aa'a, ngam to on ɗon ɗoofa ɗe, on ɗoofdan alkamaari bee maaje.

³⁰Acce ɗum fuu ɗum mawnida haa wakkati codol. Saa'i man mi wi'an sodooɓe: Aarte mooɓtugo geene, kaɓɓe ɗe, ngule ɗe. Ammaa alkamaari kam, mooɓtaneeɗam ndi haa beembal am.”

³¹Yeesu wolwani ɓe balndol feere boo, o wi'i: “Laamu asamanji nanndi bee gawel citta ndi goɗɗo hoo'i, saaki nder ngesa muuɗum.

³²Ndi ɓuri aawdiiji fuu famɗugo, ammaa to ndi fuɗi, ndi ɓuran haakooji goɗɗi fuu mawnugo, ndi laatoto lekki, haa colli ngara, mbaɗa caɓɓe maaji dow lice maaki.”

³³Yeesu wolwani ɓe balndol feere fahin, o wi'i: “Laamu asamanji nanndi bee ufnirɗum. Debbo hoo'i ɗum, waati ɗum nder kuroori etirɗe tati, kuroori man fuu ƴuufi.”

³⁴Kuuje ɗe'e fuu Yeesu wolwani yimɓe bee balndi, o wolwani ɓe koo ɗume fuu bee balndi,

³⁵ngam hiɓɓingo annabaaku Esaaya. Kaŋko o wi'i: “Mi wolwan bee balndi, mi anndinan ɓe kuuje cuuɗiiɗe diga tageeki duniyaaru.”

³⁶Nden Yeesu acci yimɓe, nasti saare. Pukara'en ngari haa maako, mbi'i mo: “Sifana min balndol geene nder ngesa alkamaari go.”

³⁷O wi'i ɓe: “Mo saaki aawdi mboondi, kaŋko woni Ɓii-neɗɗo.

³⁸Ngesa ɗum duniyaaru, alkamaari ɗum yimɓe laamu asamanji, geene boo ɗum tokkiiɓe Kalluɗo.

³⁹Ganyo mo saaki ɗe boo, ɗum Sayɗaanu, saa'i codol ɗum timmuki duniyaaru, sodooɓe boo ɗum malaa'ika'en.

⁴⁰Bana ɓe mooɓtirta geene, ɓe ngula ɗe bee yiite, bana non ɗum laatoto haa timmuki duniyaaru boo.

⁴¹Ɓii-neɗɗo nelan malaa'ika'en muuɗum, ɓe ngurtina diga laamu maako nastinɓe yimɓe nder hakke e halluɓe fuu,

⁴²ɓe ngudina ɓe nder yiite ɓolinirde. Haa ton ɓe mboyan, ɓe kirƴindiran nyii'e.

⁴³Ammaa saa'i man adili'en njaynan bana naaŋge nder laamu Baabiraawo muuɗum'en. Mo woodi noppi fuu, nana!”

⁴⁴“Laamu asamanji nanndi bee jawdi ndi ɓe nyukkini nder ngesa. Mo tawi ndi, nyukkini ndi fahin. O seyi masin, o yehi, o soorri mardi maako fuu, o soodi ngesa man.”

⁴⁵“Fahin, laamu asamanji nanndi bee piloowo ɗaɓɓanɗo luuluuje booɗɗe.

⁴⁶Nde o tawi luuluuri marndi saman masin, o yehi, o soorri mardi maako fuu, o soodi ndi.”

⁴⁷“Laamu asamanji nanndi boo bee zubaawol ngol waawooɓe ngubi nder weendu, ngol naŋngi liɗɗi feere feereeji.

⁴⁸Nde ngol heewi, ɓe pooɗi ngol haa fomoonde, ɓe njooɗi, ɓe ngurtini liɗɗi. Liɗɗi booɗɗi ɓe ndesi ɗi nder cilaaje maɓɓe, ammaa kalluɗi, ɓe ngudini ɗi.

⁴⁹Bana non ɗum laatoto haa timmuki duniyaaru boo: Malaa'ika'en ngaran, cenndan adili'en bee halluɓe,

⁵⁰ɓe nguboto halluɓe nder yiite ɓolinirde. Haa ton ɓe mboyan, ɓe kirƴindiran nyii'e.”

⁵¹Yeesu ƴami pukara'en muuɗum: “On paami bolle ɗe fuu na?” Ɓe njaabi mo: “Ooho, min paami.”

⁵²Nden Yeesu wi'i ɓe: “Ngam maajum koo moy moodibboojo tawreeta, laatiiɗo pukaraajo, annduɗo haala laamu asamanji, nanndi bee jawmu saare, gurtinanɗo kuuje kese e kuuje kiiɗɗe diga ndesaari muuɗum.”

⁵³Nde Yeesu timmini wolwango yimɓe balndi ɗi'i, o ummi nokkuure man,

⁵⁴o yehi haa berniwol ngol o mawni. O fuɗɗi ekkitingo yimɓe nder suudu dewal maɓɓe. Wonɓe ton kayɗini, mbi'i: “Moy hokki mo hikma ka e baawɗe waɗugo kaayeefiiji ɗi'i?

⁵⁵Naa kaŋko woni ɓii cehoowo na? Naa Mariyama woni daada maako na? Naa Yaakuba e Yoses e Simon e Yahuuda ngoni deerɗiraaɓe maako na?

⁵⁶Naa deerɗiraaɓe maako rewɓe boo ɗon ngondi bee meeɗen haa ɗo na? Noy o waawri waɗugo kuuje ɗe fuu?”

⁵⁷Ngam maajum ɓe cali nuɗɗingo mo. Nden Yeesu wi'i ɓe: “Ɓe teddinan annabiijo koo toy fuu, ammaa nder wuro muuɗum e caka yimɓe saare muuɗum ɓe teddintaa mo.”

⁵⁸Ngam daliila sooynde nuɗɗinki maɓɓe, Yeesu waɗaay kaayeefiiji ɗuuɗɗi ton.