Read Fulfulded Matta 14 Bible Online

Matta 14 - Fulfulded bible

Matta 14

¹Saa'i man Hirudus Antipas nani habaru Yeesu.

²O wi'i sukaaɓe maako: “Kaŋko woni Yuhanna baɗoowo baptisma, o ummitake diga maayde, ngam maajum o woodi baawɗe waɗugo kaayeefiiji.”

³Naane Hirudus umrino, ɓe naŋnga Yuhanna, ɓe kaɓɓa mo, ɓe nastina mo fursina[20] daliila Hirudiya, debbo Filip deerɗum,

⁴ngam Yuhanna wi'no mo: “Haanaay a te'a Hirudiya.”

⁵Hirudus yiɗino mbarugo Yuhanna, ammaa o huli mooɓre, ngam ɓe ɗon ndaara Yuhanna bana o annabiijo.

⁶Nyannde siftinorde danyeeki Hirudus, ɓiɗɗo Hirudiya debbo wami yeeso ewnaaɓe, ɗum fottani Hirudus.

⁷O hunani mo o hokkan mo ko o ƴami fuu.

⁸Daada maako loowi mo bolle, nden o wi'i: “Hokkam hoore Yuhanna baɗoowo baptisma nder le'al.”

⁹Ɗum suni laamiiɗo, ammaa daliila hunayeere nde o hunanino mo yeeso ewnaaɓe, o umri ɓe ndokka mo ko o ƴami.

¹⁰Hirudus neli goɗɗo haa suudu fursina, o yehi, o ta'i hoore Yuhanna.

¹¹O waddi nde nder le'al, o hokki nde ɓiɗɗo debbo go, yahrani nde daada muuɗum.

¹²Pukara'en Yuhanna ngari, ɓe koosi ɓanndu maako, ɓe uwi ndu. Nden ɓe njehi, ɓe ngecci Yeesu ko laati.

¹³Nde Yeesu nani habaru man, o ummi nokkuure man, o nasti koommbowal, o yehi ladde feere maako. Mooɓe nani ɗum, ɗe ngurti berniiji maaje, ɗe tokki mo bee kosɗe.

¹⁴Nde Yeesu wurti koommbowal, o yi'i mooɓre ɗuuɗnde, o yurmini nde, o yamɗitini nyawɓe maare.

¹⁵Nde kiikiiɗe waɗi, pukara'en Yeesu ngari haa maako, mbi'i mo: “Naaŋge hiiri, nokkuure nde'e boo nde ferewnde. Ndikka a jaɓɓito yimɓe, ɓe ndilla haa kawyeeji, ɓe coodana ko'e maɓɓe nyaamdu.”

¹⁶Yeesu jaabi: “Haanaay ɓe ndilla, ndokke ɓe nyaamdu, onon.”

¹⁷Ammaa ɓe mbi'i mo: “Min ngalaa koo ɗume, sey tamseeje jowi e liɗɗi ɗiɗi tan.”

¹⁸Yeesu wi'i ɓe: “Ngaddaneeɗam ɗum haa ɗo.”

¹⁹Nden o umri mooɓe njooɗo dow huɗo. O hoosi tamseeje jowi e liɗɗi ɗiɗi go, o tijji asama, o yetti Allah. O yewi tamseeje man, o hokki pukara'en, ɓe ndokka mooɓe.

²⁰Ɓe fuu ɓe nyaami, ɓe kaari. Pukara'en mooɓti luttuɗum man, ɗum hebbini cilaaje sappo e ɗiɗi.

²¹Limgal nyaamɓe tamseeje dillani baakin worɓe ujine njowo, rewɓe e ɓikkoy limaaka.

²²Nden law Yeesu dooli pukara'en muuɗum ɓe nasta koommbowal, ɓe aarta mo yahugo fomoonde gaɗaare, saa'i o ɗon jaɓɓito yimɓe.

²³O jaɓɓiti ɓe, o wa'i dow hooseere ngam waɗugo do'a. Haa jemma waɗi, o ɗon ton feere maako.

²⁴Nde koommbowal daayi masin bee fomoonde, henndu fuɗɗi ɓillugo ngal, ngam ngal ɗon fotta bee maaru.

²⁵Gal subaha, Yeesu wari haa pukara'en muuɗum, o ɗon yaha dow ndiyam bee kosɗe.

²⁶Nde pukara'en ngi'i mo o ɗon yaha dow ndiyam, ɓe cakli, ɓe mbi'i: “Ɗum ginnawol!” Ɓe ngooki ngam kulol.

²⁷Law Yeesu wolwani ɓe, wi'i: “Tiɗɗine ɓerɗe mooɗon, taa kultore, ɗum min.”

²⁸Piyer wi'i mo: “Yaa Jawmiraawo, to ɗum an kam, umru mi yaha haa maaɗa dow ndiyam.”

²⁹Yeesu wi'i mo: “War.” Piyer wurti koommbowal, fuɗɗi yahugo dow ndiyam, ngam haa o yotto haa Yeesu.

³⁰Ammaa nde o yi'i henndu, o hultori, o fuɗɗi mutugo, o wooki: “Yaa Jawmiraawo, hisnam!”

³¹Law Yeesu forti juŋngo muuɗum, naŋngi mo, wi'i mo: “Hey an, famɗa-nuɗɗinkiijo, ngam ɗume a seki?”

³²Nde ɓe nasti koommbowal ɓe ɗiɗo fuu, henndu de'iti.

³³Nden pukara'en wonɓe nder koommbowal cujidani Yeesu, mbi'i: “Fakat a Ɓiɗɗo Allah.”

³⁴Ɓe eeri weendu, ɓe njotti lesdi Genesaret.

³⁵Nde yimɓe lesdi man annditi Yeesu, ɓe ngeeyni habaru maako koo toy nder lesdi maɓɓe, ɓe ngaddani mo nyawɓe fuu.

³⁶Ɓe tori mo o acca nyawɓe man meema gawargal limce maako tan, meemɓe ngal fuu njamɗiti.