Read Fulfulded Matta 21 Bible Online

Matta 21 - Fulfulded bible

Matta 21

¹Nde ɓe ɓadi Urusaliima, ɓe njotti wuro Baytifaaji, gal Hooseere Jaytunje, Yeesu neli pukara'en muuɗum ɗiɗo.

²O wi'i ɓe: “Naste wuro wonŋgo yeeso mooɗon to, on tawan wamnde e molde maare ɗon kaɓɓi. Piiste ɗe, ngaddaneeɗam.

³To goɗɗo wi'i on koo ɗume, njaabe mo: Jawmiraawo woodi haaje maaje, law o accanan on ɗe.”

⁴Ɗum waɗi non ngam hiɓɓingo bolle annabiijo, biiɗo:

⁵“Mbi'e berniwol Siyona: Ndaa laamiiɗo ma ɗon wara haa maaɗa, o jaŋkiniiɗo, o ba'iiɗo wamnde e molde maare.”

⁶Pukara'en go ndilli, ɓe mbaɗi bana Yeesu umruno ɓe.

⁷Ɓe ngaddi wamnde e molde maare. Ɓe ndaɗɗi limce maɓɓe dow maaje, nden Yeesu wa'i.

⁸Yimɓe ɗuuɗɓe mbe'iti limce muuɗum'en dow laawol, woɗɓe boo itti lice leɗɗe mbe'iti ɗe dow laawol.

⁹Mooɓre ardunde Yeesu e tokkiinde ɓaawoɗon mbi'a bee sawtu: “Hosanna, tedduŋgal laatano Ɓii Daawuda! Barka laatano garanɗo bee innde Jawmiraawo! Hosanna, tedduŋgal laatano Allah nder asama!”

¹⁰Nde Yeesu nasti Urusaliima, berniwol fuu dimmbi. Jooɗiiɓe ton ƴamƴamtiri: “Gorko oo, ɗum moy?”

¹¹Mooɓre jaabi ɓe: “Ɗum Yeesu, annabiijo iwɗo Nasaratu nder lesdi Galiili.”

¹²Nden Yeesu nasti haykaliiru. O faarti soorrooɓe e soodooɓe wonɓe nder maaru fuu, o hippi taabe sannjooɓe ceede e koromje soorrooɓe pooli.

¹³O wi'i ɓe: “Ndaa ko winnda: Suudu am wi'ete suudu waɗugo do'a, ammaa onon, on laatini ndu lowol fasooɓe.”

¹⁴Wumɓe e woosɓe ngari haa Yeesu nder haykaliiru, o yamɗitini ɓe.

¹⁵Mawɓe liman'en e moodiɓɓe tawreeta tikki nde ɓe ngi'i kuuɗe kayɗiniiɗe ɗe o waɗi, ɓikkoy boo ɗon ngooka nder haykaliiru, ɗon mbi'a: “Hosanna, tedduŋgal laatano Ɓii Daawuda!”

¹⁶Ɓe mbi'i Yeesu: “A ɗon nana ko koy mbi'ata na?” Yeesu jaabi: “Ooho, mi ɗon nana. On meeɗaay jaŋngugo ko winnda na: Bee kunnduɗe ɓikkoy e musinankoy a taaskitinani hoore ma maŋgtoore.”

¹⁷Nden o acci ɓe, o wurti berniwol, o dilli haa Baytaniya, o waali ton.

¹⁸Jaŋngo man fajiri cub nde Yeesu ɗon loro haa berniwol, o maati dolo.

¹⁹O yi'i ibbi kommbi laawol, o yehi les maaki, ammaa o tawaay koo ɗume, sey haakooji tan. Nden o wi'i ibbi: “Taa a meeta rimugo ɓiɓɓe sam!” Law ibbi go yoori.

²⁰Nde pukara'en ngi'i ɗum, ɓe kayɗini. Ɓe ƴami Yeesu: “Noy ibbi ki yoori law bana nii?”

²¹Yeesu jaabi ɓe: “Gooŋga mbi'anmi on: To on ngoodi nuɗɗinki, on cekaay, nden kam, on mbaawan waɗugo naa ko mi waɗi ibbi ki tan, ammaa ko ɓuri ɗum boo. Koo to on mbi'i hooseere nde'e: Ɗoofa diga ɗo ɗisoya nder weendu, ɗum waɗoto.

²²To on ngoodi nuɗɗinki, on keɓan ko on tori fuu.”

²³Yeesu dilli, nasti haykaliiru. Nde o ɗon ekkitina yimɓe, mawɓe liman'en e ndotti'en Yahuudu'en ngari haa maako, ƴami mo: “Bee duŋayeere moy a waarata kuuje ɗe'e? Moy duŋani ma waɗugo bana nii?”

²⁴Yeesu jaabi ɓe: “Min boo, mi ƴaman on huunde woore. To on njaabake yam, nden kam, min boo mi wi'an on bee duŋayeere moy mi waɗata kuuje ɗe'e.

²⁵Moy duŋani Yuhanna waɗango yimɓe baptisma?” Allah naa malla yimɓe? Ɓe puɗɗi sarwootirgo hakkunde maɓɓe, ɓe mbi'mbi'tiri: “To en mbi'i Allah, o ƴaman en: koni on nuɗɗinaay Yuhanna?

²⁶Ammaa to en mbi'i yimɓe boo, en ɗon kula yimɓe, ngam yimɓe fuu nuɗɗini Yuhanna o annabiijo.”

²⁷Ngam maajum ɓe njaabi: “Min anndaa.” Yeesu wi'i: “Min boo mi wi'ataa on bee duŋayeere moy mbaɗanmi kuuje ɗe'e.”

²⁸“Ko numoton dow balndol ngo'ol? Goɗɗo woodi ɓiɓɓe ɗiɗo. O yehi haa arano, o wi'i mo: Ɓiŋngel am, yah huuwoy haa ngesa inabooje hannde.

²⁹O jaabi: Mi yahataa. Ammaa ɓaawo man o numti, o yehi.

³⁰Nden baaba yehi haa ɗiɗaɓo, wi'i mo ko o wi'no arano. Kaŋko boo o jaabi: Mi yahan, jawmam! Ammaa o yahaay.

³¹Caka ɓiɓɓe ɗiɗo ɓe'e, moy waɗi ko baaba mum yiɗi?” Ɓe mbi'i mo: “Arano.” Nden Yeesu wi'i ɓe: “Gooŋga mbi'anmi on: Jomnooɓe e rewɓe daakaare'en aartan on nastugo laamu asamanji.

³²Ngam Yuhanna wari haa mooɗon, o holli on laawol adilaaku, on nuɗɗinaay mo. Ammaa jomnooɓe e rewɓe daakaare'en nuɗɗini mo. Koo nde on ngi'i ɗum, on tuubaay, koo ɓaawoɗon boo on nuɗɗinaay mo.”

³³“Nane balndol goɗŋgol: Woodi jawmu saare feere, o waɗi ngesa inabooje, o taarni ka bee kowaagol, o waɗi ɓiɗɗirde inaboojam, o mahi suudu towndu ngam aynoowo ngesa. Nden o halfini ka remooɓe, o dilli jahaaŋgal.

³⁴Nde saa'i teɓugo inabooje waɗi, o neli jaggiiɓe maako haa remooɓe go ngam ɓe njaɓana mo inabooje ngesa maako.

³⁵Remooɓe naŋngi nelaaɓe maako, ɓe ɓocci gooto, ɓe mbari gooto, tataɓo boo ɓe piɗi mo bee kaa'e.

³⁶O neli nelaaɓe woɗɓe ɓurɓe ɓeya ɗuuɗugo haa maɓɓe fahin, ɓe mbaɗi ɓe bana no ɓe mbaɗino aartuɓe.

³⁷Ɓaawo man o neli ɓiyiiko haa maɓɓe, o wi'i: Ɓe teddinan ɓiyam.

³⁸Ammaa nde remooɓe ngi'i ɓiyiiko, ɓe mbi'i hakkunde maɓɓe: Ndaa, kaŋko woni donoowo. En mbara mo ngam haa en mara ndonŋgu maako.

³⁹Ɓe naŋngi mo, ɓe cakkini mo yaasi ngesa inabooje, ɓe mbari mo.”

⁴⁰Yeesu ƴami ɓe: “Kadi to jawmu ngesa inabooje wari, ɗume o waɗata yimɓe ɓe'e?”

⁴¹Ɓe njaabi mo: “O halkan halluɓe ɓe'e bilaa enɗam, nden o halfitinan ka remooɓe woɗɓe, tammiiɓe hokkugo mo ɓenndalooje to saa'i man yottake.”

⁴²Yeesu wi'i ɓe: “On meeɗaay jaŋngugo ko winnda nder Defte Ceniiɗe na? Hayre nde mahooɓe ngudini, laati hayre talkumoore ɓurnde saman. Jawmiraawo waɗi ɗum, ɗum kaayeefi haa gite meeɗen.”

⁴³Ngam maajum mi ɗon wi'a on: “Allah hoositan laamu muuɗum, hokkan ngu ummaatoore woɗnde tammiinde rimugo ɓenndalooje. [

⁴⁴Koo moy do'i dow hayre nde'e, sampititto. To nde do'i dow goɗɗo boo, nde naman mo.]”

⁴⁵Mawɓe liman'en e Farisa'en nani balndi ɗi Yeesu waɗi, ɓe paami dow maɓɓe o wolwi.

⁴⁶Nden ɓe tefi dabare naŋngugo mo, ammaa ɓe kuli yimɓe, ngam yimɓe ɗon ndaara mo bana annabiijo.