Read Fulfulded Matta 23 Bible Online

Matta 23 - Fulfulded bible

Matta 23

¹Nden Yeesu wolwani mooɓre e pukara'en muuɗum,

²o wi'i: “Moodiɓɓe tawreeta e Farisa'en keɓi duŋayeere jaŋngingo yimɓe tawreeta Muusa.

³Ɗowtane ɓe, mbaɗe ko ɓe mbi'ata on fuu, ammaa taa tokke kuuɗe maɓɓe, ngam ɓe mbaɗataa ko ɓe mbi'ata.

⁴Ngam ɓe ɗon kaɓɓa doŋgle tedduɗe, ɓe ndoonda ɗe yimɓe, ammaa kamɓe ɓe meemataa ɗe koo bee hoondu maɓɓe.

⁵Ɓe ɗon kuuwa kuuɗe maɓɓe fuu ngam haa yimɓe ndaara ɓe. Ɓe ɗon kaɓɓa filakterji [24] mawɗi haa tiiɗe maɓɓe e juuɗe maɓɓe, ɓe ɗon mbaɗa tuutuuji mawɗi haa limce maɓɓe boo.

⁶Ɓe ngiɗi joole marɗe saman haa pelle nyaamdu e joole tedduɗe nder cuuɗi dewal.

⁷Ɓe ngiɗi hoofneego haa pelle kawte, yimɓe mbi'a ɓe: Moodibbo.

⁸Ammaa onon, taa njaɓe ewneego Moodiɓɓe, ngam on fuu on deerɗiraaɓe e on ngoodi Moodibboojo gooto.

⁹Taa ewne goɗɗo haa duniyaaru Baaba ngam on ngoodi Baabiraawo gooto, mo asama.

¹⁰Taa ɗaɓɓe ewneego Ɗowooɓe, ngam on ngoodi Ɗowoowo gooto, kaŋko woni Almasiihu.

¹¹Ɓurɗo mawnugo caka mooɗon laatoto jaggiiɗo mooɗon.

¹²Koo moy mawnini hoore muuɗum, o leestinteeɗo. Koo moy leestini hoore muuɗum boo, o ɓaŋgteteeɗo.”

¹³“Bone laatanto on, onon moodiɓɓe tawreeta e Farisa'en, naafiki'en! On maɓɓani yimɓe feere dammugal laamu asamanji. Onon bee ko'e mooɗon boo on nastataa, on accataa yiɗɓe nastugo boo nasta ton. [

¹⁴Bone laatanto on, onon moodiɓɓe tawreeta e Farisa'en, naafiki'en! On ɗon njaɓta marle rewɓe yurumɓe, yeeso yimɓe, on ɗon njuutina do'aaje mon. Ngam maajum on hiiteteeɓe kiita naawka.]

¹⁵Bone laatanto on, onon moodiɓɓe tawreeta e Farisa'en, naafiki'en! On ɗon mbaɗa jahaale dow lesdi e dow beeli ngam tefugo goɗɗo gooto mo yiɗi tokkaago diina mon. To o jaɓi, on ngartira mo ɓii-jahannamaajo haa ɓura on cowi ɗiɗi.

¹⁶Bone laatanto on, onon wumɓe, ɗowooɓe wumɓe! On ɗon mbi'a: Koo moy hunori haykaliiru, ɗum meere, ammaa to o hunorake kaŋŋeeri ngonndi nder haykaliiru nden kam sey o hebbitina hunayeere maako.

¹⁷Onon faataaɓe e wumɓe, ɗume ɓuri saman? Kaŋŋeeri naa malla haykaliiru ndu seni kaŋŋeeri man?

¹⁸On ɗon mbi'a boo: Koo moy hunori hirsirde, ɗum meere, ammaa to o hunorake dokkal dow hirsirde, nden kam sey o hebbitina hunayeere maako.

¹⁹Onon wumɓe, ɗume ɓuri saman? Dokkal naa malla hirsirde nde senata dokkal man?

²⁰Ngam maajum, mo hunori hirsirde, o hunorake hirsirde e ko woni dow maare fuu.

²¹Mo hunori haykaliiru, o hunorake haykaliiru e Allah jooɗiiɗo nder maaru.

²²Mo hunori asama, o hunorake leeso laamu asamanji e Allah jooɗiiɗo dow maago fuu.

²³Bone laatanto on, onon moodiɓɓe tawreeta e Farisa'en, naafiki'en! On ɗon ittana Allah zakka koo haa haako minti e haako anisa e haako algaru[25], ammaa on acci ko ɓuri mawnugo nder tawreeta, waato waɗugo kuuɗe adilaaku, enɗam e gooŋgaaku. Kanjum haani waɗeego bilaa yeebaago luttuɗum boo.

²⁴Onon wumɓe, ɗowooɓe wumɓe, on ɗon itta buubel nder njaram mooɗon, ammaa on ɗon moɗa ngeelooba!

²⁵Bone laatanto on, onon moodiɓɓe tawreeta e Farisa'en, naafiki'en! On ɗon loota yaasi njardukoy mooɗon e yaasi taasaaje mooɗon, asee boo nder maaje ɗon heewi kuuje gujjaaɗe e suunooji mon.

²⁶Onon Farisa'en wumɓe, layɓe nder njardukoy mooɗon tawon, nden kam yaasi maakoy boo laaɓan.

²⁷Bone laatanto on, onon moodiɓɓe tawreeta e Farisa'en, naafiki'en! On ɗon nanndi bee genaale ndanwinaaɗe, booɗɗe laareego, ammaa nder maaje ɗon heewi i'e maayɓe e nyolɗum fuu.

²⁸Bana non onon boo, haa gite yimɓe on adili'en, ammaa ɓerɗe mooɗon ɗon keewi naafikaare e halleende fuu.”

²⁹“Bone laatanto on, onon moodiɓɓe tawreeta e Farisa'en, naafiki'en! On ɗon maha genaale annabi'en, on ɗon pawna genaale adili'en,

³⁰nden on ɗon mbi'a: To min ɗonno wakkati kaakiraaɓe amin, min kawtantaano ɓe ngam mbarugo annabi'en.

³¹Bana nii on ɗon ceedano ko'e mooɗon on ɓiɓɓe yimɓe mbarnooɓe annabi'en ɓe'e.

³²Nden kam kebbitine ko kaakiraaɓe mooɗon puɗɗuno!

³³Onon boɗɗe, ɓiɓɓe poosokje! Noy on mbaawrata hisugo kiita jahannama?

³⁴Ngam maajum mi ɗon nela, min bee hoore am, annabi'en e hikma'en e moodiɓɓe haa mooɗon. On mbaran woɗɓe, on ɓilan woɗɓe dow leggal gaafaaŋgal, woɗɓe boo on ɓoccan ɓe nder cuuɗi dewal mooɗon, on taasnan ɓe diga berniwol ngo'ol haa ngola.

³⁵Kiita ƴiiƴam adili'en ndufaaɗam nder duniyaaru fuu, diga ƴiiƴam Habila adiliijo, haa yotti ƴiiƴam Zekariya ɓii Barakiya mo on mbari hakkunde haykaliiru e hirsirde, do'oto dow mooɗon.

³⁶Gooŋga mbi'anmi on: Ɗum fuu ɗum waran dow yimɓe zamanuuru ndu'u.”

³⁷“Urusaliima! Urusaliima! A mbari annabi'en, a fiɗi nelaaɓe ɓe Allah neli haa ma bee kaa'e. Nde ɗuuɗɗum mi yiɗino mooɓtugo yimɓe ma, bana no gertogal mooɓtirta ɓikkoy mum les bileeji mum, ammaa on cali.

³⁸Ndaa, suudu mooɗon laatoto winnde.

³⁹Mi ɗon wi'a on: Yeeso ɗo on ngi'ataa yam sam, haa yotto saa'i on mbi'ata: Barka laatano garanɗo bee innde Jawmiraawo!”