Read Fulfulded Matta 27 Bible Online

Matta 27 - Fulfulded bible

Matta 27

¹Fajiri cub, mawɓe liman'en e ndotti'en Yahuudu'en fuu ndawri mbarugo Yeesu.

²Ɓe kaɓɓi mo, ɓe njahri mo haa ngomna Pilaatu.

³Nde Yahuuda, zammbiiɗo Yeesu yi'i ɓe ndo'i Yeesu kiita, o mimsiti, o wartiri ceede cardi cappanɗe tati go haa mawɓe liman'en e ndotti'en.

⁴O wi'i ɓe: “Mi waɗi hakke, ngam mi zammbi goɗɗo mo walaa aybe.” Ammaa ɓe mbi'i mo: “Walaa ko yaali min! Ɗum haala maaɗa!”

⁵Yahuuda wudini ceede go nder haykaliiru. Nden o dilli, o ɓili hoore maako.

⁶Mawɓe liman'en koo'i ceede go, ɓe mbi'i: “Tawreeta duŋanaaki en nastingo ceede ɗe'e nder ndesaari haykaliiru, ngam ɗum ceede ƴiiƴam.”

⁷Ɓe ndawri, ɓe coodi ngesa mahoowo payanɗe bee maaje, ngam uwugo jananɓe ton.

⁸Ngam maajum ɓe ɗon ewno ngesa man Ngesa-ƴiiƴam haa wargo hannde.

⁹Bana nii ko annabi Yeremiya wi'i, hiɓɓi: “Ɓe koo'i ceede cardi cappanɗe tati, coggu ngu yimɓe Isra'iila ndarni ngam maako,

¹⁰ɓe coodi ngesa mahoowo payanɗe, bana Jawmiraawo umrino yam.”

¹¹Ɓe ndarni Yeesu yeeso Pilaatu ngomnaajo. Nden o ƴami mo: “An woni laamiiɗo Yahuudu'en na?” Yeesu jaabi mo: “Nonnon, bana mbi'ɗa.”

¹²Ammaa yaake mawɓe liman'en e ndotti'en ngulli mo, o jaabaaki sam.

¹³Nden Pilaatu ƴami mo: “A nanaay gullaali ɗi ɓe ngulli ma fuu na?”

¹⁴Ammaa Yeesu jaabaaki mo koo wolde woore, haa ngomnaajo hayɗini masin.

¹⁵Nde juulde Paska waɗi fuu, ngomna woowi yoofango ummaatoore kaɓɓaaɗo gooto haa fursina[30] mo yimɓe ngiɗi fuu.

¹⁶Saa'i man woodino kaɓɓaaɗo nanaaɗo, innde maako Barabbas.

¹⁷Nden Pilaatu ƴami yimɓe mooɓtiiɓe: “Moy on ngiɗi mi yoofana on? Barabbas naa malla Yeesu bi'eteeɗo Almasiihu?”

¹⁸Ngam o anndi ɓe njahri Yeesu haa maako daliila kaajal.

¹⁹Saa'i Pilaatu ɗon jooɗi haa leeso kiita, debbo maako neli goɗɗo haa maako, wi'i mo: “Taa waɗ gorko adiliijo oo koo ɗume. Ngam jemmaare nde'e mi hoyɗi dow haala maako, ɗum ɓilli yam masin.”

²⁰Mawɓe liman'en e ndotti'en irni mooɓe fuu haa ɓe ƴama o yoofa Barabbas, o mbara Yeesu.

²¹Ngomna ƴami ɓe fahin: “Moy caka yimɓe ɗiɗo ɓe'e on ngiɗi mi yoofana on?” Ɓe njaabi mo: “Yoofan min Barabbas!”

²²O ƴami ɓe: “Ɗume mi waɗata Yeesu bi'eteeɗo Almasiihu kadi?” Ɓe njaabi ɓe fuu: “Ɓil mo dow leggal gaafaaŋgal!”

²³Pilaatu ƴami ɓe: “Halleende ndeye o waɗi?” Ammaa ɓe ɓesdi wookugo bee sawtu, ɓe mbi'i: “Ɓil mo haa leggal gaafaaŋgal!”

²⁴Nde Pilaatu yi'i o waawataa waɗugo koo ɗume, hoolo boo ɗon ɓesdo, o hoo'i ndiyam, o looti juuɗe maako yeeso mooɓre nde'e, o wi'i: “Mi laaɓɗo e ƴiiƴam goɗɗo oo, ɗum haala mooɗon!”

²⁵Ummaatoore fuu wi'i: “Ƴiiƴam maako yowo dow amin e ɓiɓɓe amin!”

²⁶Nden Pilaatu yoofani ɓe Barabbas, o umri ɓe, ɓe ɓocci Yeesu, o hokki mo haa juuɗe maɓɓe ngam haa ɓe ɓila mo haa leggal gaafaaŋgal.

²⁷Sooje'en Pilaatu ngomnaajo njahri Yeesu haa laamorde, sooje'en wonɓe nder yeɓre woore fuu mooɓti dow maako.

²⁸Ɓe ɓorti mo, ɓe moji mo mojaare woɗeere,

²⁹ɓe mbaɗi meetaleewol gi'e, ɓe njo'ini ngol dow hoore maako, ɓe ndokki mo sawru haa juŋngo maako nyaamo. Nden ɓe tuggi koppi yeeso maako, ɓe njanci mo, ɓe mbi'i: “Allah woonane, laamiiɗo Yahuudu'en!”

³⁰Ɓe tuuti mo tuuɗe, ɓe njaɓti sawru haa juŋngo maako go, ɓe piyi mo bee maaru haa hoore.

³¹Nde ɓe timmini jancugo mo, ɓe ɓorti mo mojaare go, ɓe ɓorni mo limce maako, ɓe njahri mo ngam haa ɓe ɓila mo dow leggal gaafaaŋgal.

³²Nde ɓe ɗon ngurto, ɓe potti bee goɗɗo Sirene, innde maako Simon. Ɓe ndooli mo roondaago gaafaaŋgal Yeesu.

³³Ɓe njotti haa nokkuure wi'eteende Golgota, bana wi'go Gumbal-hoore.

³⁴Ton ɓe ndokki mo inaboojam njillindiraaɗam bee ndiyam kaaɗɗam, ngam haa o yara. Ammaa nde Yeesu metti ɗam, o sali yarugo.

³⁵Ɓe ɓili mo haa leggal gaafaaŋgal. Ɓe cenndi limce maako hakkunde maɓɓe bee waɗugo kur'u.

³⁶Nden ɓe njooɗi ton, ɓe ayni mo.

³⁷Ɓe mbinndi daliila kiita maako dow alluha, ɓe ɓili ka haa dow hoore maako: “Oo woni Yeesu, laamiiɗo Yahuudu'en.”

³⁸Ɓe ɓildi fasooɓe ɗiɗo bee maako, gooto haa nyaamo maako, gooto boo haa nano maako.

³⁹Saalotooɓe ton ndimmbini ko'e muuɗum'en, kuɗi mo,

⁴⁰mbi'i: “A wi'no a yibbinan haykaliiru, a mahtoto ndu nder nyalɗe tati. Hisnu hoore ma! To a Ɓiɗɗo Allah, jippa leggal gaafaaŋgal!”

⁴¹Mawɓe liman'en e moodiɓɓe tawreeta e ndotti'en boo njanci mo, mbi'i:

⁴²“O hisni yimɓe feere, o waawataa hisnugo hoore maako. Naa o laamiiɗo Isra'iila na? Sey o jippo jonta diga leggal gaafaaŋgal haa en nuɗɗina mo.

⁴³O ɗon hooli Allah, o wi'i o Ɓiɗɗo maako. Booɗɗum, sey en ndaara to Allah yiɗi hisnugo mo jonta!”

⁴⁴Fasooɓe ɓildaaɓe bee maako boo kallini mo bana non.

⁴⁵Diga caka nyalawma nyiɓre waɗi dow lesdi fuu, haa yotti saa'a tati.

⁴⁶Deydey saa'a tati Yeesu hooli bee sawtu, wi'i: “Eli, Eli, lema sabaktani?” Bana wi'go: “Yaa Allah am, yaa Allah am, ngam ɗume a wudini yam?”

⁴⁷Woɗɓe dariiɓe ton nani ɗum, mbi'i: “O ɗon ewno Eliya!”

⁴⁸Gooto maɓɓe doggi law, hoo'i irin sooso, suuwi ɗum nder lammuɗam, o ɓaŋgti ɗum bee loosol haa hunnduko Yeesu haa o yara.

⁴⁹Ammaa woɗɓe mbi'i: “Sey en ndeena haa en ndaara to Eliya waran ngam hisnugo mo.”

⁵⁰Yeesu hooli bee sawtu fahin, nden o maayi.

⁵¹Wakkati man wiirndallo nder haykaliiru seeki caka cak, diga dow haa les. Lesdi dimmbi, tapaaje ceeki,

⁵²genaale maɓɓiti, senaaɓe maaynooɓe ɗuuɗɓe ummiti diga maayde.

⁵³Ɓe ngurti genaale ɓaawo ummitineeki Yeesu, ɓe nasti nder berniwol ceniiŋgol, ɓe mbaŋgani yimɓe ɗuuɗɓe.

⁵⁴Nde ardiiɗo dow sooje'en Roma teemerre e aynooɓe woɗɓe wonduɓe bee muuɗum ngi'i dimmbannde lesdi bee ko waɗi fuu, ɓe kultori masin, ɓe mbi'i: “Fakat, kaŋko woni Ɓiɗɗo Allah!”

⁵⁵Rewɓe ɗuuɗɓe ɗonno ton, ɓe ndari daayiiɗum, ɓe ɗon ndaara, ɓe tokkino Yeesu diga lesdi Galiili ngam huuwango mo.

⁵⁶Mariyama mo wuro Magdala e Mariyama, daada Yaakuba e Yusufu e daada ɓiɓɓe Zebede ɗon nder maɓɓe.

⁵⁷Nde kiikiiɗe waɗi, goɗɗo diskuɗo mo wuro Arimatiya wari. Innde maako Yusufu, kaŋko boo o pukaraajo Yeesu.

⁵⁸O yehi haa Pilaatu, o ƴami mo ɓanndu Yeesu. Pilaatu umri ɓe ndokka mo ndu.

⁵⁹Yusufu hoosi ndu, hasni ndu bee kasa kesa.

⁶⁰Nden o wallini ndu nder yenaande hesre nde o wasino nder tapaare ngam hoore maako. O talli hayre mawnde, o maɓɓi yenaande go bee maare, o dilli.

⁶¹Mariyama mo Magdala e Mariyama goɗɗo ɗon njooɗi ton, ɗon tiiti yenaande.

⁶²Jaŋngo man, ɓaawo nyalaade taaskara, mawɓe liman'en e Farisa'en kawti, njehi haa Pilaatu.

⁶³Ɓe mbi'i mo: “Barkaama, min ciftori, nde pewoowo oo geetono, o wi'i: Ɓaawo nyalɗe tati mi ummititto diga maayde.

⁶⁴Ndikka a umra ɓe ayna yenaande maako nyalɗe tati, ngam taa pukara'en maako ngara, ngujja ɓanndu maako, nden ɓe mbi'a ummaatoore: O ummitake diga maayde. Fewre ɓaawoore nde'e ɓuran aranndeere hallugo.”

⁶⁵Pilaatu wi'i ɓe: “Ndaa sooje'en. Njehe, ayne yenaande bana on mbaawi fuu.”

⁶⁶Ɓe njehi, ɓe ayni yenaande, ɓe mbaɗi lammba ngomna dow hayre nde ɓe maɓɓiri yenaande. Ɓe ndarni sooje'en aynooɓe ton.