Read Fulfulded Matta 28 Bible Online

Matta 28 - Fulfulded bible

Matta 28

¹Ɓaawo nyannde siwtorde, Alat subaha, Mariyama mo Magdala e Mariyama goɗɗo njehi laarugo yenaande.

²Dimmbannde lesdi mawnde waɗi, ngam malaa'ikaajo Jawmiraawo jippi diga asama, ɓaditi, talli hayre go, jooɗi dow maare.

³Jaati maako ɗon yayna bana ma'ere, limce maako boo daneeje bana hottollo.

⁴Nde aynooɓe ngi'i mo, ɓe kultori masin, ɓe ndiwtori, ɓe laati bana maayɓe.

⁵Malaa'ikaajo wi'i rewɓe: “Taa kultore onon kam, ngam mi anndi on ɗon ɗaɓɓita Yeesu gaafaaɗo.

⁶O walaaɗon haa ɗo, o ummitake diga maayde bana o wi'no. Ngare, ndaare nokkuure haa o waalino.

⁷Nden njehe law, mbi'e pukara'en maako: O ummitake diga maayde, o aartan on yahugo lesdi Galiili, on ngi'an mo ton. Kanjum ngeccumi on!”

⁸Rewɓe ndilli diga yenaande bee jaawal, ɓerɗe maɓɓe keewi kulol e seyo maŋngo. Ɓe ndoggi, ɓe njahri habaru man haa pukara'en Yeesu.

⁹Nden Yeesu fotti bee maɓɓe, wi'i: “Mi hoofni on!” Rewɓe ɓaditi mo, naŋngi kosɗe maako, cujidani mo.

¹⁰Nden Yeesu wi'i ɓe: “Taa kultore! Njehe, anndine deerɗam'en, ɓe njaha haa lesdi Galiili, ton ɓe ngi'atammi!”

¹¹Nde rewɓe go ɗon ndilla, woɗɓe nder sooje'en aynooɓe yenaande go njehi nder berniwol. Ɓe ngecci mawɓe liman'en ko waɗi fuu.

¹²Mawɓe ɓe'e carwootiri bee ndotti'en. Nde ɓe narri, ɓe ndokki sooje'en go ceede ɗuuɗɗe,

¹³ɓe mbi'i ɓe: “Mbi'e: Pukara'en maako ngari jemma, ɓe ngujji ɓanndu maako saa'i min ɗonno ɗaani.

¹⁴To ngomna nani haala ka, min keɓtan dabare de'itingo mo, min kisnan on bone fuu.”

¹⁵Sooje'en go njaɓi ceede man, mbaɗi bana ɓe tinndini ɓe. Geccawol ngol saŋkiti caka Yahuudu'en haa wargo hannde.

¹⁶Pukara'en sappo e go'o ndilli haa lesdi Galiili, haa hooseere nde Yeesu umruno ɓe ɓe njaha ton.

¹⁷Nde ɓe ngi'i mo, ɓe cujidani mo, ammaa woɗɓe maɓɓe ceki.

¹⁸Yeesu ɓaditi ɓe, wi'i: “Baawɗe haa asama e dow lesdi fuu ndokkaama yam.

¹⁹Ndille haa yimɓe ummaatooje fuu, mbaɗe ɓe pukara'en am, mbaɗane ɓe baptisma bee innde Baabiraawo e Ɓiɗɗo e Ruuhu Ceniiɗo.

²⁰Ekkitine ɓe haa ɓe tokko ko mi umri on fuu. Min mi ɗon wondi bee mooɗon nyalɗe fuu haa yotto timmuki duniyaaru.”