Read Fulfulded Matta 3 Bible Online

Matta 3 - Fulfulded bible

Matta 3

¹Wakkati man Yuhanna baɗoowo baptisma waŋgi, o fuɗɗi waazaago nder ladde hamaadaare Yahudiya.

²O wi'i: “Tuube, ngam laamu asamanji[3] ɓaditake!”

³Yuhanna woni mo Esaaya wolwino dow muuɗum, wi'i: “Goɗɗo ɗon hoola nder ladde: Mo'inane Jawmiraawo laawol, mbaɗane mo buuwi darnuɗi.”

⁴Yuhanna ɗon ɓorni limce kuuwraaɗe bee gaasa ngeelooba, o ɗon taadi taadorgol laral, baɓɓatti e njumri ladde ngoni nyaamdu maako.

⁵Yimɓe Urusaliima e lesdi Yahudiya e lesdi kommbi maayo Urdun fuu, ngari haa maako.

⁶Ɓe mbaŋgini hakkeeji maɓɓe, Yuhanna boo waɗani ɓe baptisma nder maayo Urdun.

⁷Nde Yuhanna yi'i Farisa'en e Saduki'en ɗuuɗɓe ɗon ngara haa maako ngam o waɗana ɓe baptisma, o wi'i ɓe: “Ɓiɓɓe poosokje, moy wi'i on on kisan tikkere Allah warannde?

⁸Nden kam kuuwe kuuɗe ɗe mbaŋginta on tuubi.

⁹Taa nume nder ɓerɗe mooɗon: Ibrahiima woni kaaka amin. Ngam mi ɗon wi'a on, Allah woodi baawɗe waɗango Ibrahiima ɓiɓɓe bee kaa'e ɗe'e.

¹⁰Fe'irde ɗon taaski ngam fe'ugo lekki diga ɗaɗi mum, lekki ki rimataa ɓiɓɓe booɗɗe fuu ki fe'e, ki wudine nder yiite.

¹¹Min mi ɗon waɗana on baptisma bee ndiyam ngam tuubu mooɗon. Ammaa garanɗo ɓaawo am waɗanan on baptisma bee Ruuhu Ceniiɗo e bee yiite. Kaŋko o ɓuri yam baawɗe piw. Mi he'aay koo fiistugo ɓoggi paɗe maako.

¹²O woodi jaartirɗum haa juŋngo maako ngam senndirgo alkamaari bee nyaande. O mooɓtan alkamaari haa beembal maako, ammaa o wulan nyaande bee yiite nge nyifataa sam.”

¹³Nden Yeesu ummi lesdi Galiili, wari maayo Urdun ngam haa Yuhanna waɗana mo baptisma.

¹⁴Yuhanna jaɓaay, wi'i mo: “Min maa, mi woodi haaje a waɗanammi baptisma, nden nii ngara haa am!”

¹⁵Ammaa Yeesu jaabi mo: “Yerda ɗum jonta, ngam ɗum pottuɗum kebbitinen adilaaku fuu.” Nden Yuhanna jaɓi,

¹⁶waɗani mo baptisma. Nde Yeesu wurti ndiyam, asamanji maɓɓiti, o yi'i Ruuhu Allah ɗon jippo bana poola, ɗon wara dow maako.

¹⁷Sawtu boo iwi haa asama, wi'i: “Oo woni Ɓiɗɗo am giɗaaɗo, mi ɗon seyoro ɗum masin.”