Read Fulfulded Matta 4 Bible Online

Matta 4 - Fulfulded bible

Matta 4

¹Nden Ruuhu Allah yahri Yeesu haa ladde hamaadaare ngam haa Iblisa jarribo mo.

²Yeesu waɗi suumaye nyalawmaaje e jemmaaje cappanɗe nayi, nden o maati dolo.

³Iblisa ɓaditi, wi'i mo: “To a Ɓiɗɗo Allah kam, umru kaa'e ɗe'e laato nyaamdu.”

⁴Yeesu jaabi: “Deftere wi'i: Neɗɗo yeeɗirtaa nyaamdu tan, ammaa bee wolde nde Allah wolwi fuu.”

⁵Nden Iblisa yahri mo haa berniwol ceniiŋgol, jo'ini mo dow yeereere haykaliiru,

⁶wi'i mo: “To a Ɓiɗɗo Allah kam, diw diga ɗo haa lesdi, ngam Deftere wi'i: Allah umran malaa'ika'en muuɗum ngam maaɗa, ɓe taɓɓo ma bee juuɗe maɓɓe, ngam taa kosɗe ma pergo dow hayre.”

⁷Yeesu jaabi mo: “Deftere wi'i boo: Taa jarriba Allah Jawmiraawo maaɗa.”

⁸Fahin Iblisa yahri mo dow hooseere townde masin, o sappini mo laamuuji duniyaaru e tedduŋgal maaji fuu,

⁹o wi'i mo: “Ɗum fuu mi hokkete to a tuggi koppi, a sujidani yam.”

¹⁰Ammaa Yeesu wi'i mo: “Dillu, accam, an Sayɗaanu, ngam Deftere wi'i: Sujidan Allah Jawmiraawo maaɗa tan, kaŋko feere maako a rewata.”

¹¹Nden Iblisa acci Yeesu, malaa'ika'en ngari, njaggani mo.

¹²Nde Yeesu nani ɓe nastini Yuhanna suudu daŋngay[4], o dilli lesdi Galiili.

¹³O wurti Nasaratu, o yehi, o jooɗoyi haa Kafarnahum kommbi fomoonde weendu Galiili, nder lesɗe Zabulon e Neftali,

¹⁴ngam haa bolle ɗe annabi Esaaya wolwino kiɓɓa:

¹⁵“Lesdi Zabulon e lesdi Neftali, haa laawol yahugo mbeela e gaɗa maayo Urdun e Galiili haa ummaatooje goɗɗe ngoni,

¹⁶ummaatoore jooɗiinde nder nyiɓre yi'i annoora makka. Jooɗiiɓe nder lesdi e nyiɓre maayde boo, annoora yaynani ɓe.”

¹⁷Diga saa'i man Yeesu fuɗɗi waazugo. O wi'i: “Tuube, ngam laamu asamanji ɓaditake!”

¹⁸Nde Yeesu ɗon saalo kommbi weendu Galiili, o yi'i deerɗiraaɓe ɗiɗo: Simon bi'eteeɗo Piyer e Andire deerɗum. Ɓe ɗonno ngubo zubaawol nder weendu ngam ɓe waawooɓe liɗɗi.

¹⁹Yeesu wi'i ɓe: “Tokkeeɗam, mi waɗan on waawooɓe yimɓe.”

²⁰Law ɓe acci zubaaji maɓɓe, ɓe tokki mo.

²¹O yehi yeeso seɗɗa, o yi'i deerɗiraaɓe ɗiɗo: Yaakuba ɓii Zebede e Yuhanna deerɗiiko. Ɓe ɗonno nder koommbowal[5] bee baaba maɓɓe Zebede, ɓe ɗon mbo'itina zubaaji maɓɓe, o ewni ɓe.

²²Law ɓe acci koommbowal e baaba maɓɓe, ɓe tokki mo.

²³Yeesu yilli lesdi Galiili fuu, o ekkitini Yahuudu'en nder cuuɗi dewal maɓɓe, o waazini kubaruwol belŋgol ngol laamu asamanji, o nyawndi yimɓe diga nyawuji feere feere fuu caka ummaatoore.

²⁴Habaru maako saŋkiti nder lesdi Siriya fuu. Ɓe ngaddani mo torraaɓe nyawuji feere feere e yinnaaɓe e marɓe paɗɗe e jiijiiɓe, o yamɗitini ɓe.

²⁵Mooɓre ɗuuɗnde tokki mo. Ɓe ngari diga lesdi Galiili e Gure-sappo e Urusaliima e lesdi Yahudiya e lesdi gaɗa maayo Urdun.