Read Fulfulded Matta 8 Bible Online

Matta 8 - Fulfulded bible

Matta 8

¹Nden Yeesu jippi hooseere go, mooɓe ɗuuɗɗe tokki mo.

²Kuturuujo ɓaditi mo, tuggi koppi yeeso maako, wi'i: “Moodibbo, to a muuyi, a waawan yamɗitingo yam.”

³Yeesu forti juŋngo muuɗum, meemi mo, nden wi'i: “Mi muuyi, a yamɗita!” Law kuturuujo go yamɗiti diga saɗawre muuɗum.

⁴Nden Yeesu wi'i mo: “Hakkil: Taa yeccu koo moy haala ka sam, ammaa yah haa limanjo, hollu mo hoore ma. Nden lii'a dokkal bana Muusa umri, ngam seedaago yeeso yimɓe fuu a laaɓi.”

⁵Yeesu nasti Kafarnahum. Goɗɗo Romaajo, mawɗo dow sooje'en teemerre, ɓaditi, tori mo ballal,

⁶wi'i: “Jawmiraawo, suka am ɗon waali haa saare, o nyawɗo, o waawataa dimmbaago, o torraaɗo masin.”

⁷Yeesu jaabi mo: “Mi yahan yamɗitingo mo.”

⁸Ammaa mawɗo sooje'en go wi'i: “Jawmiraawo, mi he'aay a nasta saare am. Wi' wolde woore tan, nden suka am yamɗitan.

⁹Min boo mi woodi mawɓe dow am, mi woodi sooje'en boo les baawɗe am. To mi wi'i oo: Yah, o yahan. To mi wi'i oya boo: War, o waran. To mi wi'i suka am: Waɗ nii, o waɗan.”

¹⁰Nde Yeesu nani bolle maako ɗe'e, o hayɗini, o wi'i tokkiiɓe mo: “Gooŋga mbi'anmi on: Mi meeɗaay tawugo nuɗɗinki makki bana ki'i koo haa moy nder Isra'iila fuu.

¹¹Mi ɗon wi'a on: Ɗuuɗɓe ngaran diga fuunaaŋge e hiirnaaŋge, ɓe nyaamdan bee Ibrahiima e Isiyaaku e Yaakubu nder laamu asamanji.

¹²Ammaa yimɓe ɓe Allah suɓino ngam laamu muuɗum, ɓe wudinteeɓe yaasi nder nyiɓre nyiɓɓunde, ɓe mboyan, ɓe kirƴindiran nyii'e ton.”

¹³Yeesu wi'i mawɗo sooje'en go: “Hootu saare ma, ɗum laatante bana a nuɗɗini.” Suka maako yamɗiti saa'i man nden.

¹⁴Yeesu yehi saare Piyer, tawi esiraawo Piyer debbo, ɗon waali nyawɗo yontere.

¹⁵Yeesu meemi juŋngo maako, yontere acci mo, o ummi, o weerni Yeesu.

¹⁶Nde kiikiiɗe waɗi, ɓe ngaddi yimɓe ɗuuɗɓe, marɓe ginnaaji. Yeesu riiwi ginnaaji bee wolde mum, yamɗitini nyawɓe fuu.

¹⁷O waɗi non ngam hiɓɓingo ko annabi Esaaya wi'i: “O hooci tampe meeɗen e o roondi nyawuji meeɗen.”

¹⁸Nde Yeesu yi'i mooɓre ɗuuɗnde ɗon taari mo, o umri pukara'en maako, ɓe eera gaɗa weendu.

¹⁹Goɗɗo nder moodiɓɓe tawreeta ɓaditi mo, wi'i: “Moodibbo, mi tokkete koo toy njahata fuu.”

²⁰Yeesu jaabi mo: “Doldolɗe ngoodi gasɗe, colli boo ngoodi caɓɓe, ammaa Ɓii-neɗɗo walaa haa wallina hoore mum.”

²¹Goɗɗo feere nder pukara'en maako wi'i: “Moodibbo, duŋanam mi yaha, mi uwoya baaba am tawon.”

²²Yeesu jaabi mo: “Tokkam, accu maayɓe uwa maayɓe muuɗum'en.”

²³Nden Yeesu nasti koommbowal[9], pukara'en maako tokki mo.

²⁴Law henndu saatundu ummi dow weendu haa ƴuuge ndiyam cuddi koommbowal. Ammaa Yeesu ɗon ɗaani.

²⁵Pukara'en ngari haa maako, pindini mo, mbi'i: “Jawmiraawo, hisnu min, min kalki!”

²⁶Yeesu jaabi ɓe: “Ngam ɗume kultorɗon, onon famɗa-nuɗɗinki'en?” Nden o ummi, o telɓani keni e weendu, de'ere mawnde waɗi.

²⁷Yimɓe kayɗini, mbi'i: “Goɗɗo moy oo, haa keni bee weendu fuu ɗon ɗowtano mo?”

²⁸Nde Yeesu yotti gaɗa weendu nder lesdi Gadarena'en, marɓe ginnaaji ɗiɗo ngurti genaale, potti bee maako. Ɓe hulniiɓe masin, walaa mo saalotono laawol man.

²⁹Ɓe kooli, ɓe mbi'i: “An Ɓiɗɗo Allah, ɗume ngiɗɗa haa amin? A wari torrugo min diga wakkati siwaa na?”

³⁰Woodino tokkere gaduuji ɗuuɗɗi haa nokkuure man, daayiiɗum seɗɗa, ɗi ɗon ndura.

³¹Ginnaaji go tori Yeesu, mbi'i: “To a yiɗi riiwugo min, nel min nder tokkere gaduuji nde.”

³²Nden Yeesu wi'i ɗi: “Njehe.” Ɗi ngurti, ɗi nasti gaduuji. Gaduuji man caamni, ndo'i diga dow fomoonde townde nder weendu, ɗi mbaati ton.

³³Durooɓe gaduuji go ndoggi, ndilli haa wuro, ngecci yimɓe ko waɗi fuu e ko laatani marnooɓe ginnaaji ɗiɗo boo.

³⁴Yimɓe wuro fuu ngurti ngam fottugo bee Yeesu. Nde ɓe ngi'i mo, ɓe tori mo o acca lesdi maɓɓe.