Read Fulfulded Markus 10 Bible Online

Markus 10 - Fulfulded bible

Markus 10

¹Yeesu ummi nokkuure man, dilli lesdi Yahudiya, nden o eeri maayo Urdun. Fahin yimɓe mooɓti haa maako. O ekkitini ɓe bana ko woowa.

²Farisa'en woɗɓe ngari haa maako ngam jarribaago mo. Ɓe ƴami mo: “Tawreeta duŋanake gorko seera debbo mum na?”

³Yeesu jaabori ɓe bee ƴamol ngol: “Ɗume Muusa umri on?”

⁴Ɓe njaabi: “Muusa duŋani gorko winnda ɗereewol ceergal, nden o seera debbo maako.”

⁵Yeesu wi'i ɓe: “Ngam caatal ko'e mooɗon Muusa winndani on umroore nde'e.

⁶Ammaa haa fuɗɗam, Allah tagi gorko e debbo.

⁷Ngam maajum gorko accan baaba muuɗum e daada muuɗum, ɗakkotiran bee debbo muuɗum.

⁸Ɓe ɗiɗo fuu ɓe laatoto ɓanndu wooru. Bana non ɓe laatataako yimɓe ɗiɗo ɓaawoɗon, ammaa ɓanndu wooru.

⁹Ngam maajum taa neɗɗo fiista ko Allah haɓɓi.”

¹⁰Nde ɓe nasti saare, pukara'en maako ƴamti mo haala man.

¹¹Yeesu faamtini ɓe, wi'i: “Koo moy seeri debbo muuɗum, te'i debbo feere, o waɗi njeenu dow debbo arano.

¹²Non boo to debbo acci gorko muuɗum, te'ri bee gorko feere, o waɗi njeenu.”

¹³Yimɓe ngaddi ɓikkoy pamaroy haa Yeesu ngam o meema koy. Ammaa pukara'en caatani yimɓe ɓe.

¹⁴Nde Yeesu yi'i ɗum, o ɓerni, o wi'i pukara'en maako: “Acce ɓikkoy pamaroy ngara haa am. Taa kaɗe koy, ngam laamu Allah woodani irin maakoy.

¹⁵Mi ɗon wi'a on, mo jaɓaay laamu Allah bana ɓiŋngel pamarel, fakat o nastataa ngu sam.”

¹⁶Nden o huufi ɓikkoy go, o wallini juuɗe maako dow maakoy, o barkiɗini koy.

¹⁷Nde Yeesu ɗon yaha dow laawol, goɗɗo doggoy wari, tuggi koppi yeeso maako, ƴami mo: “Moodibbo booɗɗo, ɗume mi waɗata haa mi heɓa ngeendam nduumiiɗam?”

¹⁸Yeesu wi'i mo: “Ngam ɗume a wi'ata yam mi booɗɗo? Sey Allah gooto tan woni booɗɗo.

¹⁹A anndi umrooje: Taa mbar-hoore, taa waɗ njeenu, taa wujju, taa seeda fewre, taa waɗ rikici, teddin baaba ma e daada ma.”

²⁰Goɗɗo oo wi'i: “Moodibbo, mi ɗowtani umrooje ɗe'e fuu diga mi derkeejo tawon.”

²¹Yeesu suti mo bee yiide, wi'i mo: “Luttani ma huunde woore: Yah soorru ko a mari fuu, hokku talaka'en ceede man, nden a heɓoyan ndesaari haa asama, ɓaawoɗon, war tokkam.”

²²Ammaa nde goɗɗo oo nani bolle ɗe'e, yeeso maako nyiɓɓi, ɓernde maako metti, o dilli, ngam o diskuɗo masin.

²³Yeesu laari pukara'en muuɗum, o wi'i ɓe: “Ɗum saɗani riskuɓe nastugo laamu Allah.”

²⁴Bolle ɗe'e kayɗini pukara'en masin. Ammaa Yeesu wi'i ɓe fahin: “Ɓikkoy am, nastugo laamu Allah saɗi masin!

²⁵Ngeelooba saalo nder wurdere baatal ɓuri hoyugo dow diskuɗo nasta laamu Allah.”

²⁶Pukara'en ɓesdi hayɗingo masin, ɓe ƴamƴamtiri, ɓe mbi'i: “To non kam, moy waawata hisugo?”

²⁷Yeesu suti ɓe, wi'i: “Haa yimɓe, ɗum waɗataako, ammaa haa Allah ɗum waɗoto, ngam haa Allah, koo ɗume fuu waɗoto.”

²⁸Nden Piyer wi'i mo: “Ndaa minin min acci kuuje fuu, min tokki ma.”

²⁹Yeesu wi'i mo: “Gooŋga. Min boo mi ɗon wi'a on: Koo moy acci saare malla deerɗiraaɓe malla daada malla baaba malla ɓikkoy malla gese muuɗum ngam daliila am e ngam Linjiila,

³⁰o heɓtan ɗum cowi teemerre nder ngeendam maako jonta: Calaaje e deerɗiraaɓe worɓe e rewɓe e daadiraaɓe e ɓikkoy e gese e bee toonyaaŋgeeji boo. Nder zamanuuru waranndu boo o heɓan ngeendam nduumiiɗam.

³¹Ɗuuɗɓe aartuɓe laatoto sakkitiiɓe, ɗuuɗɓe sakkitiiɓe boo laatoto aartuɓe.”

³²Ɓe ɗon dow laawol yahugo Urusaliima. Yeesu ɗon ardi pukara'en muuɗum, ɓe kayɗini, yimɓe tokkiiɓe ɓaawo maɓɓe ɗon kula boo. Fahin Yeesu ewni pukara'en muuɗum sappo e ɗiɗo feere maɓɓe, o anndini ɓe ko tammi waɗugo mo.

³³O wi'i ɓe: “Nane, en ɗon njaha Urusaliima, ton ɓe ndokkan Ɓii-neɗɗo haa juuɗe mawɓe liman'en e moodiɓɓe tawreeta. Ɓe kiitoto mo kiita maayde, nden ɓe ndokka mo haa juuɗe heefeerɓe.

³⁴Kamɓe boo ɓe njancan mo, ɓe tuutan mo tuuɗe, ɓe ɓoccan mo, ɓe mbaran mo. Ammaa ɓaawo nyalɗe tati o ummititto diga maayde.”

³⁵Nden Yaakuba e Yuhanna ɓiɓɓe Zebede ɓaditi Yeesu, ɓe mbi'i mo: “Moodibbo, min ngiɗi a waɗana min ko min ƴamata ma.”

³⁶Yeesu ƴami ɓe: “Ɗume on ngiɗi mi waɗana on?”

³⁷Ɓe njaabi mo: “To a jooɗake dow leeso laamu ma nder tedduŋgal ma, nden kam min ngiɗi a jo'ina min gooto haa nyaamo ma e gooto haa nano ma.”

³⁸Ammaa Yeesu wi'i ɓe: “On anndaa ko torotooɗon. On mbaawan yarugo jardugel bone ngel mi yarata na malla jaɓugo baptisma bone ɗe mi jaɓata na?”

³⁹Ɓe njaabi mo: “Min mbaawan.” Yeesu wi'i ɓe: “Gooŋga, on njaran jardugel bone bana am, on njaɓan boo baptisma ka mi jaɓata.

⁴⁰Ammaa ko laarani jooɗaago haa nyaamo malla haa nano am, naa min hokkata ɗum, ɗum ɗon ngam yimɓe ɓe Allah taaskani.”

⁴¹Nde pukara'en sappo luttuɓe nani haala man, ɓe ɓernani Yaakuba e Yuhanna.

⁴²Nden Yeesu ewni ɓe fuu, wi'i ɓe: “On anndi, yimɓe ɓe on ndaarata bana ardiiɓe ummaatooje, ɓe ɗon ndoola yimɓe maɓɓe, mawɓe boo ɗon kolla ɓe baawɗe.

⁴³Ammaa taa ɗum wona non caka mooɗon. To gooto mooɗon yiɗi laataago mawɗo, sey o laato jaggiiɗo mooɗon.

⁴⁴Mo yiɗi ardaago caka mooɗon, sey o wona maccuɗo yimɓe fuu.

⁴⁵Ngam Ɓii-neɗɗo boo waraay ngam yimɓe kuuwana mo, ammaa ngam o huuwana yimɓe, o hokka yoŋki maako ngam soottugo ɗuuɗɓe.”

⁴⁶Ɓe njotti Yeriko. Nde Yeesu wurti wuro maajum bee pukara'en muuɗum e mooɓre ɗuuɗnde, bumɗo bi'eteeɗo Bartime ɓii Time ɗonno jooɗi sera laawol, o ɗonno rooko.

⁴⁷Nde o nani Yeesu Nasaratuujo ɗon saalo, o fuɗɗi hoolugo: “Yeesu ɓii Daawuda, enɗam!”

⁴⁸Ɗuuɗɓe telɓani mo, mbi'i mo o jeeɗo, ammaa o ɓurti hoolugo: “Ɓii Daawuda, enɗam!”

⁴⁹Yeesu dari, wi'i: “Ewne mo.” Ɓe ewni bumɗo go, ɓe mbi'i mo: “Tiɗɗin ɓernde ma, umma, o ɗon ewne.”

⁵⁰Nden o wudini alkibbaare maako, o ummi, o wari haa Yeesu.

⁵¹Yeesu ƴami mo: “Ɗume ngiɗɗa mi waɗane?” Bumɗo jaabi: “Moodibbo, wumtinam haa mi yi'a fahin.”

⁵²Yeesu wi'i mo: “Yah, nuɗɗinki ma hisni ma.” Law o wumti o ɗon yi'a, nden o tokki Yeesu.