Read Fulfulded Markus 12 Bible Online

Markus 12 - Fulfulded bible

Markus 12

¹Nden Yeesu fuɗɗi wolwango ɓe bee balndi. O wi'i: “Goɗɗo jubi ngesa inabooje, o howi ka, o waɗi ɓiɗɗirde inaboojam, o mahi suudu towndu ngam aynoowo ngesa. Nden o halfini ka remooɓe, o dilli jahaaŋgal.

²Nde saa'i teɓugo inabooje waɗi, o neli jaggiiɗo maako haa remooɓe go ngam o jaɓana mo geɗal maako haa inabooje.

³Ammaa ɓe naŋngi jaggiiɗo oo, ɓe piyi mo, ɓe ndiiwi mo juŋngo sooko.

⁴Nden jawmu ngesa neli jaggiiɗo muuɗum feere. Kaŋko boo remooɓe naawni mo haa hoore, ɓe toski mo.

⁵Jawmu ngesa neli jaggiiɗo muuɗum feere fahin, ammaa ɓe mbari mo. Bana non ɓe mbaɗi ɗuuɗɓe, ɓe piyi woɗɓe, ɓe mbari woɗɓe boo.

⁶Luttani jawmu ngesa ɓiɗɗo gooto tan, giɗaaɗo maako. Haa ragare man o neli mo haa remooɓe go, o numi: Ɓe teddinan ɓiyam kam.

⁷Ammaa remooɓe ɓe'e carwootiri, ɓe mbi'i: Ndaa kaŋko tammi ronugo. Sey en mbara mo, nden en marta ndonŋgu maako.

⁸Nden ɓe naŋngi ɓiɗɗo go, ɓe mbari mo, ɓe ngudini mo yaasi ngesa.”

⁹Nden Yeesu tokki wi'ugo: “Ɗume jawmu ngesa waɗata? O waran, o halkan remooɓe go, o hokkan ngesa inabooje haa woɗɓe.

¹⁰Walaa seko on njaŋngi aaya ka'a: Hayre nde mahooɓe ngudini, laati hayre talkumoore ɓurnde saman.

¹¹Jawmiraawo waɗi ɗum, ɗum kaayeefi haa gite meeɗen.”

¹²Mawɓe Yahuudu'en ɗaɓɓi naŋngugo Yeesu, ngam ɓe anndi o wolwi balndol ngol dow maɓɓe. Ammaa ɓe kuli mooɓre, ngam maajum ɓe acci mo, ɓe ndilli.

¹³Ɓe neli Farisa'en woɗɓe e yimɓe Hirudus haa Yeesu ngam naŋngugo mo nder ƴamol tuufnorgol.

¹⁴Ɓe ngari, ɓe mbi'i mo: “Moodibbo, min anndi walaa ko yaali ma bee goɗɗo, ngam a senndindirtaa yimɓe, ammaa a ɗon anndina laawol Allah bee gooŋga. Yeccu min, ɗum kaanduɗum hokkugo laamiiɗo Roma jomorgol na? Min ndokka na malla min calo hokkugo?”

¹⁵Nde Yeesu anndi naafikaare maɓɓe, o jaabi ɓe: “Koni on tuufani yam tuuforgol? Ngaddaneeɗam suleyre haa mi yi'a.”

¹⁶Ɓe ngaddani mo. Yeesu ƴami ɓe: “Suura moy e innde moy dow maare?” Ɓe njaabi mo: “Kaysara, laamiiɗo Roma jeyi.”

¹⁷Nden Yeesu wi'i ɓe: “Njoɓe Kaysara, ko haanani mo, ndokke Allah boo ko haanani mo.” Jaawaabu maako hayɗini ɓe masin.

¹⁸Saduki'en wi'anɓe maayɓe ummitittaako ngari haa Yeesu. Ɓe ƴami mo ƴamol ngo'ol:

¹⁹“Moodibbo, Muusa winndani en umroore nde'e: To goɗɗo maayi, acci debbo mo walaano ɓiŋngel, sey deerɗiiko te'a mo ngam haa ɓe keɓana maayɗo danygol.

²⁰Woodino deerɗiraaɓe njoweeɗiɗo. Arano te'i debbo, maayi, accaay ɓikkoy.

²¹Ɗiɗaɓo te'i mo, maayi, kaŋko boo o accaay ɓikkoy, bana non boo tataɓo.

²²Haa njoweeɗiɗo te'ɓe debbo oo fuu maayi, ɓe accaay ɓikkoy. Ɓaawo maɓɓe debbo boo maayi.

²³Nyalaade ummitineeki, to maayɓe ummitake, debbo moy o laatanto caka maɓɓe kadi? Ngam ɓe njoweeɗiɗo fuu ɓe te'ino mo.”

²⁴Yeesu jaabi ɓe: “On ɗon mboofa masin! Ngam on anndaa Defte Ceniiɗe, on anndaa boo baawɗe Allah.

²⁵Ngam to maayɓe ummitake, walaa teegal fahin, ɓe laatoto bana malaa'ika'en haa asama.

²⁶Ko laarani haala maayɓe e ummitineeki maɓɓe, on meeɗaay jaŋngugo ko winnda nder deftere Muusa dow haala wumre na? Ton Allah wi'i Muusa: Min woni Allah Ibrahiima e Allah Isiyaaku e Allah Yaakubu na!

²⁷Allah o Allah yeeɗɓe, naa o Allah maayɓe. Ngam maajum on mboofi masin.”

²⁸Gooto nder Moodiɓɓe tawreeta nani kujjootiral maɓɓe, o nani Yeesu jaabi Saduki'en booɗɗum, nden o ƴami mo: “Dow umrooje fuu, umroore ndeye ɓuri mawnugo?”

²⁹Yeesu jaabi: “Ndaa umroore ɓurnde mawnugo: Onon Isra'iila'en, nane: Allah Jawmiraawo meeɗen, o gooto.

³⁰Yiɗ Jawmiraawo, Allah maaɗa bee ɓernde ma fuu, bee yoŋki ma fuu, bee hakkiilo ma fuu e bee semmbe ma fuu.

³¹Ndaa umroore ɗiɗawre: Yiɗ keeddiɗɗiraawo maaɗa bana hoore maaɗa. Walaa umroore feere ɓuri ɗe'e.”

³²Nden moodibbo tawreeta wi'i Yeesu: “Booɗɗum moodibbo. Ko a wi'i, ɗum gooŋga: Jawmiraawo Allah o gooto, walaa Allah feere, sey kaŋko tan.

³³Sey koo moy fuu yiɗa Allah bee ɓernde e hakkiilo e semmbe mum fuu, sey o yiɗa keeddiɗɗiiko boo bana no o yiɗirta hoore maako. Ɗum ɓuri dokke dabbaaji gulaaɗi e lii'aaɗi fuu.”

³⁴Yeesu nani o jaabi booɗɗum bee hikma, nden o wi'i mo: “A daayaaki laamu Allah.” Ɓaawo maajum koo moy huli ƴamugo mo ƴamɗe goɗɗe.

³⁵Nde Yeesu ɗon ekkitina nder haykaliiru, o waɗi ƴamol ngo'ol: “Noy moodiɓɓe mbi'rata Almasiihu woni ɓii Daawuda?

³⁶Ngam Ruuhu Ceniiɗo ɗowi Daawuda, o wi'i bee hoore maako: Jawmiraawo wolwani jawmam: Jooɗa haa nyaamo am, haa to mi wallini konne'en maaɗa les kosɗe ma.

³⁷Daawuda bee hoore muuɗum ewni mo Jawmiraawo, kadi noy Almasiihu laatori ɓii Daawuda?” Mooɓre ɗuuɗnde heɗiti haala Yeesu bee seyo.

³⁸Ndaa ko o ɗon ekkitina koo moy: “Ndeente e moodiɓɓe tawreeta, yiɗɓe waancugo bee ngapaleeji juuɗɗi, ɓe ngiɗi yimɓe koofna ɓe haa luuɓe.

³⁹Nder cuuɗi dewal Yahuudu'en, ɓe ngiɗi jooɗaago haa joole tedduɗe e to ɓe ewnake ɓe ngam nyaamdu boo ɓe ɗaɓɓitan joole camɗinaaɗe.

⁴⁰Ɓe ɗon njaɓta marle rewɓe yurumɓe, ɓe ɗon njuutina do'aare ngam yimɓe ngi'a ɓe. Ɓe keɓan kiita naawka masin.”

⁴¹Nden Yeesu jooɗi baŋnge baatirɗum ceede nder haykaliiru. O hakkilani yimɓe waatanɓe ceede nder baatirɗum ceede man. Riskuɓe ɗuuɗɓe ndokki ceede ɗuuɗɗe.

⁴²Debbo jurumɗo talakaajo boo wari, waati aniini ɗiɗi, waato ceede seɗɗa non.

⁴³Yeesu ewni pukara'en muuɗum, wi'i ɓe: “Gooŋga mi ɗon wi'a on, debbo jurumɗo talakaajo oo waati nder baatirɗum ceede ko ɓuri yimɓe woɗɓe fuu.

⁴⁴Ngam kamɓe ɓe ndokki seɗɗa diga ɗuuɗeeŋga jawdi maɓɓe, ammaa debbo oo, koo nde o laafuɗo, o hokki ko o mari ngam nguure maako fuu.”