Read Fulfulded Markus 4 Bible Online

Markus 4 - Fulfulded bible

Markus 4

¹Fahin Yeesu fuɗɗi ekkitingo yimɓe haa fomoonde weendu Galiili. Mooɓre ɗuuɗnde masin mooɓi haa maako. Ngam maajum o nasti koommbowal[10], o jooɗi. Koommbowal ɗon nder weendu, mooɓre boo ɗon haa fomoonde.

²O ekkitini ɓe kuuje ɗuuɗɗe bee balndi. Nder ekkitinol maako o wi'i ɓe:

³“Keɗite! Nyannde feere demoowo yehi ngesa ngam saakoygo.

⁴Nde o ɗon saaka, aawdi ngoɗndi soli dow laawol. Colli ngari, cuɓti ndi.

⁵Aawdi ngoɗndi soli haa korka'e, haa lesdi ɗuuɗaay. Law ndi fuɗi ngam lesdi ɗuuɗaay.

⁶Nde naaŋge ɓaŋgti, nge wuli puɗndi man, ndi yoori ngam ɗaɗi maari luggaay.

⁷Aawdi ngoɗndi boo soli caka gi'e. Gi'e mawni, ɓilli puɗndi man, ndi wurtinaay cammeeje.

⁸Ammaa aawdi ngoɗndi soli haa lesdi mboondi, ndi fuɗi, ndi mawni, ndi wurtini cammeeje, ndi ɓenndi. Goɗɗe ɗon bee gabbe cappanɗe tati, goɗɗe boo bee gabbe cappanɗe joweego e goɗɗe bee gabbe teemerre.”

⁹Nden Yeesu wi'i ɓe: “Mo woodi noppi ngam nanugo, nana!”

¹⁰Nde Yeesu jooɗi feere muuɗum, wondunooɓe bee muuɗum e pukara'en muuɗum sappo e ɗiɗo ƴami mo maana balndi go.

¹¹O jaabi ɓe: “Onon, Allah anndini on sirri laamu muuɗum. Ammaa ngam woɗɓe, sey bee balndi.

¹²Ngam maajum ɓe ɗon ndaara, ammaa ɓe ngi'ataa. Ɓe ɗon nana, ammaa ɓe paamataa. Ngam taa ɓe lorto haa Allah, Allah boo yaafo ɓe.”

¹³Nden Yeesu wi'i ɓe: “On paamaay balndol ngo'ol na? Nden kam noy on mbaawrata faamugo balndi goɗɗi?

¹⁴Demoowo ɗon saaka wolde Allah.

¹⁵Woɗɓe nanndi bee aawdi dow laawol, to ɓe nani wolde Allah, law Sayɗaanu wara, wifta wolde nde ɓe nani.

¹⁶Woɗɓe nanndi bee aawdi colndi haa korka'e. To ɓe nani wolde Allah, law ɓe njaɓa nde bee seyo.

¹⁷Ammaa nde waɗataa ɗaɗi nder maɓɓe, ɓe nuɗɗinan wakkati seɗɗa non. Nden, to ɓillaare malla toonyaare ummake ngam daliila wolde Allah, law ɓe accan nuɗɗinki.

¹⁸Woɗɓe boo nanndi bee aawdi caka gi'e. Ɓe nani wolde Allah,

¹⁹ammaa laruuraaji duniyaaru ndu e esto jawdi e suunooji feere feere nastan ɓerɗe maɓɓe, ɗi ɓillan wolde Allah e nde waɗataa nafuuda.

²⁰Woɗɓe fahin, nanndi bee aawdi colndi haa lesdi mboondi. Ɓe ɗon nana wolde Allah, ɓe ɗon njaɓa nde, ɓe ɗon mbaŋgina ɓenndalooje, woɗɓe cowi cappanɗe tati, woɗɓe boo cowi cappanɗe joweego, woɗɓe feere cowi teemerre.”

²¹Nden Yeesu wi'i ɓe: “Goɗɗo jamnan pittirla ngam jo'ingo nga les bokoti malla les leeso na? Naa o jo'inan nga dow jo'inirɗum?

²²Ngam cuuɗiiɗum fuu waŋgan nyalaade woɗnde, sirriijum fuu anndititte.

²³Mo woodi noppi fuu nana!”

²⁴Fahin Yeesu wi'i ɓe: “Kakkilane ko on nanata. Allah foondan ko o hokkata on bee poondirgol ngol on poondirta e o ɓesdan dow maajum fahin.

²⁵Ngam marɗo huunde, ɓe ɓesdanan mo, ammaa mo maraay koo ɗume, ɓe koocan koo peetum maako.”

²⁶Fahin Yeesu wi'i: “Laamu Allah nanndi bee goɗɗo mo rufi aawdi haa lesdi.

²⁷Nden o yaha o ɗaano jemma, o fina nde weeti fuu. Wakkati maajum aawdi ɗon fuɗa, ɗon mawna, kaŋko boo o anndaa no ndi mawnirta.

²⁸Lesdi ndin ɗon fuɗna ko rufa: Aran fuɗŋgo, nden wurtina sammeere, ɓaawo man ɗum waɗa ɓikkoy nder sammeere.

²⁹To alkamaari ɓenndi, o fuɗɗan wa'go, ngam saa'i waɗi.”

³⁰Fahin Yeesu wi'i: “Bee ɗume nanndinten laamu Allah? Bee balndol ngole en paamtinta haala maagu?

³¹Ngu nanndi bee gawel citta. Ndi ɓuri aawdi duniyaaru fuu famɗugo.

³²Ammaa to ɓe aawi ndi, ndi fuɗan, ndi mawnan haa ɓura fuɗŋgooji fuu. Lice maaki mawnan haa colli mbaɗa caɓɓe haa ɗowdi maaki.”

³³Yeesu waazini yimɓe Kubaruwol Belŋgol bee balndi ɗuuɗɗi bana ɗi'i, fodde ko ɓe mbaawi faamugo.

³⁴O wolwani ɓe tum bee balndi. Ammaa nde o luttidi bee pukara'en maako kamɓe feere maɓɓe, o laɓɓinani ɓe koo ɗume fuu.

³⁵Nyannde maajum nde hiiri, Yeesu wi'i pukara'en muuɗum: “Sey en eero gaɗa weendu.”

³⁶Nden ɓe acci mooɓre. Pukara'en nasti koommbowal[11] ngal Yeesu nasti, nden ɓe ndilli. Koommbooje goɗɗe boo ɗonno kommbi maako.

³⁷Henndu saatundu ummi, ƴuuge ukki dow koommbowal haa ngal heewi ndiyam.

³⁸Yeesu ɗon haa sakkitorde koommbowal, o ɗon ɗaani, hoore maako ɗon dow waflaare. Pukara'en maako pindini mo, mbi'i: “Moodibbo, en ɗon kalka, walaa ko ɗum yaali ma na?”

³⁹Nde o fini, o telɓani henndu, o wi'i weendu: “Sirwa!” Henndu de'iti, de'ere mawnde laati.

⁴⁰Nden Yeesu wi'i pukara'en: “Ngam ɗume on kultori? Haa jonta on koolaaki yam na?”

⁴¹Ammaa ɓe kultorino masin, ɓe mbi'mbi'tiri: “Goɗɗo oo o moy? Koo henndu e weendu boo ɗon ɗowtano mo.”