Read Fulfulded Markus 5 Bible Online

Markus 5 - Fulfulded bible

Markus 5

¹Yeesu e pukara'en muuɗum njotti Galiili nder lesdi Geraseni'en gaɗa weendu.

²Nde Yeesu wurti koommbowal[12], law goɗɗo wurti caka genaale, o ɗon wara haa o fotta bee maako. Goɗɗo oo o marɗo ruuhu coɓŋgu.

³O ɗonno yeeɗa caka genaale. Walaa baawɗo haɓɓugo mo, koo bee callallu.

⁴Nde ɗuuɗɗum yimɓe kaɓɓuno mo bee ge'elle e callalluuji, ammaa o ta'i callalluuji haa juuɗe maako, o yewi ge'elle haa kosɗe maako. Semmbe maako salori eltanɗo mo fuu.

⁵Tum jemma e naaŋge fuu o ɗon caka genaale e nder kooseeje, o ɗon hoola, o ɗon ŋaasa ɓanndu maako bee kaa'e.

⁶Ammaa nde o eewi Yeesu, o doggi, o wari, o tuggi koppi haa yeeso muuɗum,

⁷Nden o wooki, o wi'i: “An Yeesu, Ɓiɗɗo Allah Ɓaŋiiɗo, ɗume ngiɗɗa haa am? Mi tori ma bee innde Allah, taa yaŋgitam!”

⁸O wi'i ɗum ngam Yeesu wi'no mo: “An ruuhu coɓŋgu, wurta diga gorko oo!”

⁹Nden Yeesu ƴami mo: “Noy innde ma?” O jaabi: “Innde am Mooɓre, ngam min ɗuuɗi.”

¹⁰O tori Yeesu ɗuuɗɗum, taa o riiwa ɗi daayiiɗum diga lesdi man.

¹¹Woodi tokkere gaduuji ɗuuɗɗi ton, ɗi ɗon ndura baŋnge kooseeje.

¹²Ruuhuuji coɓɗi go tori Yeesu: “Nel min haa gaduuji ɗi ngam min nasta nder maaji.”

¹³Yeesu duŋani ɗi. Ɗi ngurti diga goɗɗo oo, ɗi nasti nder gaduuji. Gaduuji man caamni, ndo'i diga dow fomoonde townde nder weendu. Ɗi fuu ɗi kalki, ɗi ndillani ujine ɗiɗi.

¹⁴Durooɓe gaduuji ndoggi, ngecci haala maajum nder wuro e haa kawyeeji. Yimɓe ngurti ngam ɓe ndaara ko waɗi.

¹⁵Ɓe ngari haa Yeesu, ɓe ngi'i marnooɗo mooɓre ginnaaji go ɗon jooɗi, ɗon ɓorni, hakkiilo maako boo de'iti. Ɓe kultori.

¹⁶Yi'ɓe ɗum fuu ngecci yimɓe ko waɗi marɗono ginnaaji go e ko fe'ani gaduuji.

¹⁷Nden yimɓe puɗɗi toraago Yeesu, ɓe mbi'i mo: Wurta, daaya lesdi amin.

¹⁸Yaake Yeesu ɗon nasta koommbowal, gurtinaaɗo ruuhuuji coɓɗi go tori mo, wi'i: “Accu mi jooɗodo bee ma.”

¹⁹Yeesu duŋanaaki mo, ammaa o wi'i mo: “Hootu haa yimɓe ma, yeccu ɓe ko Jawmiraawo waɗani ma nder enɗam muuɗum fuu.”

²⁰Goɗɗo oo dilli, o fuɗɗi anndingo yimɓe haa jihaaji bi'eteeɗi Berniiji-Sappo ko Yeesu huuwani mo fuu, haa yimɓe fuu kayɗini.

²¹Yeesu eerti weendu bee koommbowal, warti gaa'e. Mooɓre ɗuuɗnde mooɓti haa maako baŋnge weendu.

²²Gooto haa ardiiɓe suudu dewal Yahuudu'en mo innde muuɗum Jayrus wari haa maako. Nde o yi'i Yeesu, o tuggi koppi yeeso maako,

²³o tori mo ɗuuɗɗum, o wi'i: “Ɓiŋngel am deyel nyawi haa ngel ɓadake maayugo. Useni war, wallin juuɗe ma dow maagel haa ngel hisa, ngel yeeɗa.”

²⁴Yeesu dillidi bee maako. Mooɓre ɗuuɗnde yahdi bee maako, nde ɗon ɓiɗɗa mo.

²⁵Woodi boo debbo feere ton. Duuɓi sappo e ɗiɗi, o nyawi nyawu ilugo ƴiiƴam.

²⁶O yehi haa hurgooɓe ɗuuɗɓe, o majjini jawdi maako fuu. Ammaa nyawu maako waɗaay daama sam, sey tullititgo.

²⁷Nde o nani habaru Yeesu, o wari nder mooɓre ɓaawo maako, o meemi limce maako.

²⁸Ngam o numno: “To mi heɓi mi meemi koo limce maako tan, mi yamɗitan.”

²⁹Nde o meemi limce Yeesu, law ilugo ƴiiƴam maako ta'i, o maati nder ɓanndu maako o yamɗiti diga nyawu maako.

³⁰Wakkati man Yeesu anndi semmbe wurti haa muuɗum. O wayliti caka mooɓre, o ƴami: “Moy meemi limce am?”

³¹Pukara'en maako njaabi: “A ɗon yi'a mooɓre ɗon ɓiɗɗe. Noy ƴamrata: Moy meemi yam?”

³²Ammaa Yeesu laari taariiɓe mo haa o yi'a debbo meemɗo mo.

³³Debbo oo diwni ngam kulol ngam o anndi ko waɗi mo, nden o wari, o tuggi koppi les kosɗe Yeesu, o yecci mo gooŋga man fuu.

³⁴Yeesu wi'i mo: “Ɓiŋngel am, nuɗɗinki maaɗa yamɗitini ma. Yah jam, a rimɗi e bone ma.”

³⁵Diga Yeesu timminaay wolwugo tawon, ardiiɓe saare Jayrus ngari, mbi'i mo: “Ɓiŋngel ma maayi. Ngam ɗume a ɗon ɓilla moodibbo fahin?”

³⁶Ammaa Yeesu faalaay bolle maɓɓe. O wi'i Jayrus: “Taa hul, nuɗɗin tan!”

³⁷Nden o duŋanaay koo gooto yahda bee maako, sey Piyer e Yaakuba e Yuhanna, deerɗiraawo Yaakuba.

³⁸Nde ɓe njotti saare Jayrus ardiiɗo suudu dewal Yahuudu'en, Yeesu laari yimɓe ɗon koola, ɗon mboya, ɗon njooyna ɗuuɗɗum ton.

³⁹O nasti saare, o wi'i ɓe: “Koni on koolata bana nii? Koni on mboyata? Ɓiŋngel maayaay, ngel ɗaani non.”

⁴⁰Ɓe njanci mo. Nden o wurtini ɓe fuu. O luttidi bee baaba ɓiŋngel e daada maagel e pukara'en maako tato go, ɓe nasti suudu ndu ɓiŋngel woni.

⁴¹O naŋngi juŋngo maagel, o wi'i ngel: “Talita kumi”, bana wi'go: “Ɓiŋngel, mi ɗon wi'e: Umma!”

⁴²Law ɓiŋngel deyel ummi, fuɗɗi yahugo. Ngel ɗon mari duuɓi sappo e ɗiɗi. Nde yimɓe ngi'i ɗum, ɓe kayɗini masin.

⁴³Ammaa Yeesu barri ɓe bee caatal, taa ɓe anndina ɗum koo moye. Nden o wi'i: “Ndokke ngel nyaamdu.”