Read Fulfulded Markus 8 Bible Online

Markus 8 - Fulfulded bible

Markus 8

¹Saa'i man mooɓre ɗuuɗnde mooɓti fahin. Nde ɓe ngoodaa ko ɓe nyaama, Yeesu ewni pukara'en muuɗum, wi'i ɓe:

²“Mi ɗon yurmina yimɓe ɓe'e, ngam ɓe ɗon ngondi bee am jonta nyalɗe tati, ɓe ngoodaa ko ɓe nyaama boo.

³To mi jaɓɓiti ɓe, ɓe koota mi hokkaay ɓe nyaamdu, nden kam ɓe tampan dow laawol, woɗɓe maɓɓe boo ngari diga daayiiɗum.”

⁴Pukara'en maako mbi'i mo: “Noy goɗɗo heɓrata nyaamdu he'anndu yimɓe ɓe fuu haa nder ladde hamaadaare nde'e?”

⁵Yeesu ƴami ɓe: “Tamseeje noy marɗon?” Ɓe njaabi: “Joweeɗiɗi.”

⁶O umri yimɓe njooɗo. Nden o hoo'i tamseeje joweeɗiɗi go, o yetti Allah, o yewi ɗe, o hokki pukara'en maako ɓe cenndana yimɓe. Pukara'en mbaɗi bana non.

⁷Ɓe ngoodi boo liɗɗi pamari seɗɗa. Yeesu waɗi yettoore ngam maaji, nden o umri pukara'en maako ɓe cenndana ɗi yimɓe.

⁸Ɓe fuu ɓe nyaami, ɓe kaari, pukara'en mooɓti luttuɗum man, kebbini cilaaje joweeɗiɗi.

⁹Limgal yimɓe man waɗi baakin worɓe ujine nayo, nden Yeesu jaɓɓiti ɓe.

¹⁰Law o nasti koommbowal[19] bee pukara'en maako, o yehi lesdi Dalmanuta.

¹¹Farisa'en ngari puɗɗi waabotirgo bee Yeesu. Ɓe ngiɗi jarribaago mo. Ngam maajum ɓe ƴami mo o waŋginana ɓe alaama iwka diga asama.

¹²Yeesu uumi nder muuɗum, wi'i: “Koni yimɓe ɓe'e ɗaɓɓata alaama? Fakat mi ɗon wi'a on, ɓe keɓataa alaama ka sam.”

¹³Nden o acci ɓe, o lorti nder koommbowal, o eeri haa fomoonde gaɗaare.

¹⁴Pukara'en ngejjiti hoo'ugo tamseeje. Ɓe ngalaa tamseeje, sey woore ɓe mari haa maɓɓe nder koommbowal.

¹⁵Yeesu reentini[20] ɓe, wi'i: “Kakkile, ndeente ngam ufnirɗum Farisa'en e ufnirɗum Hirudus.”

¹⁶Pukara'en carwootiri, ɓe mbi'i: “O wi'i ɗum ngam en ngoodaa tamseeje.”

¹⁷Yeesu anndi ko ɓe mbi'i, o ƴami ɓe: “Koni mbi'ɗon on ngalaa tamseeje? On anndaa na? Haa jonta on paamataa na? Ɓerɗe mon ɗon caati na?

¹⁸On ngoodi gite, on ngi'ataa na? On ngoodi noppi, on nanataa na? On ciftortaa na?

¹⁹Nde mi senndani yimɓe ujine njowo tamseeje jowi, cilaaje noy on kebbini bee luttuɗe?” Ɓe njaabi: “Sappo e ɗiɗi.”

²⁰“Yeesu wi'i ɓe, nde mi senndani yimɓe ujine nayo tamseeje joweeɗiɗi, cilaaje noy on kebbini bee luttuɗe?” Ɓe njaabi: “Joweeɗiɗi.”

²¹Nden Yeesu wi'i ɓe: “Haa jonta on ngalaa faamu na?”

²²Ɓe njotti Baytisayda, ton, yimɓe ngaddani Yeesu bumɗo, ɓe tori mo o meema mo.

²³Yeesu naŋngi juŋngo bumɗo oo, yahri mo yaasi wuro. Nden o tuuti tuuɗe dow gite bumɗo man, o wallini juŋngo dow maako, o ƴami mo: “A ɗon yi'a na?”

²⁴Bumɗo ɓaŋgti gite, wi'i: “Mi ɗon yi'a yimɓe, ammaa bana leɗɗe jahanɗe.”

²⁵Fahin Yeesu wallini juuɗe dow gite maako, o wumti, o yi'i kuuje fuu laaɓɗum.

²⁶Nden Yeesu jaɓɓiti mo, wi'i: Hootu saare. “Taa nastu wuro.”

²⁷Ɓaawoɗon Yeesu e pukara'en muuɗum ndilli gure ɓadiiɗe bee Kaysariya Filippi. Dow laawol, o ƴami ɓe: “Yimɓe ɗon mbi'a min mi moy?”

²⁸Ɓe njaabi mo: “Woɗɓe ɗon mbi'a an woni Yuhanna baɗoowo baptisma. Woɗɓe boo ɗon mbi'a an woni Eliya. Fahin woɗɓe ɗon ndaare bana gooto annabi'en ɓooyma.”

²⁹Yeesu ƴami ɓe: “Onon boo, on ɗon mbi'a mi moy?” Piyer jaabi: “An woni Almasiihu.”

³⁰Nden Yeesu umri ɓe bee caatal, wi'i: “Taa yeccu ɗum koo moy.”

³¹Nden Yeesu fuɗɗi anndingo pukara'en muuɗum, wi'i: “Doole Ɓii-neɗɗo yara bone ɗuuɗɗe, ndotti'en e mawɓe liman'en e moodiɓɓe tawreeta boo ngudina mo. Ɓe mbaran mo, ammaa ɓaawo nyalɗe tati o ummititto.”

³²O wi'i ɓe ɗum bee baŋguɗum. Piyer wicciti mo sera, fuɗɗi felugo mo.

³³Ammaa Yeesu wayliti, laari pukara'en muuɗum. Nden o telɓani Piyer, o wi'i: “Daayam, an Sayɗaanu, numooji maaɗa ɗi yimɓe, naa ɗi Allah.”

³⁴Nden Yeesu ewni mooɓre e pukara'en muuɗum, o wi'i ɓe: “To goɗɗo yiɗi tokkaago yam, sey o acca muuyo maako, o roondo gaafaaŋgal maako, o tokko yam.

³⁵Ngam koo moy yiɗi hisnugo yoŋki muuɗum, majjinan ki. Ammaa mo majjini yoŋki mum ngam am e ngam Linjiila, hisnan ki.

³⁶To goɗɗo heɓi duniyaaru fuu, ammaa o halki yoŋki maako, ɗume ɗum nafata mo?

³⁷Malla woodi ko goɗɗo waawata hokkugo ngam soottugo yoŋki maako na? Walaa sam!

³⁸To goɗɗo semti yam e bolle am hannde caka yimɓe halluɓe, zammbotooɓe Allah ɓe'e, nden kam Ɓii-neɗɗo boo semtan mo to o wardi bee malaa'ika'en seniiɓe nder tedduŋgal Baabiraawo maako.”