Read Fulfulded Luka 11 Bible Online

Luka 11 - Fulfulded bible

Luka 11

¹Nyannde feere Yeesu ɗonno waɗa do'a haa nokkuure woɗnde. Nde o timmini, gooto haa pukara'en maako wi'i mo: “Jawmiraawo, ekkitin min waɗugo do'a bana Yuhanna ekkitini pukara'en muuɗum.”

²O wi'i ɓe: “To on ɗon mbaɗa do'a, mbi'e: Yaa Baabiraawo, a Ceniiɗo, waɗ koo moy teddina innde ma. Laamu maaɗa wara.

³Hokku min nyaamdu deydey haaje amin nyalaade fuu.

⁴Yaafana min hakkeeji amin, ngam minin boo min ɗon njaafano waɗɓe min aybe[12] fuu. Aynu min ngam taa min nasta jarribeeki.”

⁵O wi'i ɓe fahin: “To gooto mooɗon woodi soobaajo, o yehi haa muuɗum caka jemma ngam wi'go mo: Soobaajo, wu'am tamseeje tati.

⁶Ngam gooto nder sooba'en am wari haa am, mi walaa ko mi hokka mo.

⁷Ammaa soobaajo mo nder suudu go boo jaabake mo: Taa daamam, jonta dammugal ɗon maɓɓi, min bee ɓikkoy am fuu min ɗon mbaali, mi waawataa ummaago ngam mi hokke tamseeje.

⁸Mi ɗon wi'a on, koo to o ummataako ngam hokkugo mo ɗum ngam o soobaajo maako, ammaa ngam o ɗon daama mo, o ummoto, o hokka mo ko o mari haaje fuu.

⁹Min kam mi ɗon wi'a on: Tore, on keɓan. Ɗaɓɓite, on tawan. Cilmine, ɓe maɓɓitanan on.

¹⁰Ngam koo moy tori, heɓan. Koo moy ɗaɓɓiti, tawan. Koo moy silmini boo, ɓe maɓɓitanan mo.

¹¹Moy haa mooɗon to o baaba, o hokkan ɓiŋngel maako mboodi to ngel torake mo liiŋgu?

¹²Malla to ngel torake mo yeeraande, o hokkan ngel yaare na?

¹³Onon halluɓe maa, on anndi hokkugo ɓiɓɓe mooɗon kuuje booɗɗe. Sakkomaa Baabiraawo mooɗon mo asama, o hokkataa toranɓe mo Ruuhu Ceniiɗo na?”

¹⁴Yeesu wurtini ginnawol muukɗinŋgol goɗɗo. Nde ginnawol man wurti, goɗɗo go wolwi, haa yimɓe fuu kayɗini.

¹⁵Ammaa woɗɓe feere mbi'i: “Bee baawɗe Be'elzebul[13] laamiiɗo ginnaaji o riiwrata ɗi.”

¹⁶Woɗɓe boo ngiɗi jarribaago mo, ngam maajum ɓe ƴami mo o waŋginana ɓe alaama iwka diga asama.

¹⁷Ammaa nde Yeesu anndi numooji maɓɓe, o wi'i ɓe: “To laamu senndake, ngu do'oto e ci'e boo ngibboto bee tokkindirki[14].

¹⁸To Sayɗaanu honi hoore mum, noy laamu mum tabitirta? On ɗon mbi'a mi ɗon riiwra ruuhuuji coɓɗi bee baawɗe Be'elzebul[15].

¹⁹To min mi ɗon riiwa ginnaaji bee baawɗe Be'elzebul, bee baawɗe ɗeye ɓikkoy mooɗon boo ndiiwrata ɗi? Ngam maajum ɓikkoy mooɗon kiitoto on.

²⁰Ammaa to bee baawɗe Allah ndiiwranmi ginnaaji boo, nden kam ɗum laamu Allah yottanake on.

²¹To goɗɗo cemmbiɗɗo taaskiiɗo bee balmi ɗon ayna saare muuɗum, ko o mari fuu jooɗoto jam.

²²Ammaa to ɓurɗo mo semmbe wari dow maako, jaali mo, o jaɓta balmi maako ɗi o hoolɗinori, o senndana woɗɓe jawdi maako.

²³Mo wondaay bee am, o konneejo am. Mo wallaay yam mooɓtugo, saŋkitan.”

²⁴“To ruuhuwol coɓŋgol wurtake goɗɗo, ngol yiiloyan haa karɗe ngam ɗaɓɓugo nokkuure siwtaago, to ngol heɓaay, nden kam ngol wi'an: Mi loroto haa suudu am ndu mi wurtino.

²⁵To ngol lori haa maaru, ngol tawan ndu wuuwaandu, mo'itinaandu.

²⁶Nden ngol yaha, ngol wadda ruuhuuji goɗɗi joweeɗiɗi, ɓuranɗi ngol hallugo, ɗi nastan suudu man, ɗi njooɗoto nder maaru. Timmoode goɗɗo oo tullitan dow naane.”

²⁷Nde Yeesu wolwi bana nii, debbo feere ɓaŋgti sawtu nder mooɓre, wi'i: “Barka laatani reedu danyndu ma e enɗi ɗi musinɗa!”

²⁸Ammaa kaŋko o wi'i: “Barka laatanto nananɓe wolde Allah, ɗowtantooɓe nde!”

²⁹Nde yimɓe ɗon mooɓto kommbi Yeesu, o fuɗɗi wi'ugo: “Yimɓe zamanuuru ndu'u, ɓe halluɓe, ɓe ɗon ƴama alaama. Ammaa ɓe keɓataa, sonaa alaama annabi Yonas.

³⁰Ngam bana Yonas laatino alaama haa yimɓe Niniwe, non Ɓii-neɗɗo boo laatanto yimɓe zamanuuru ndu'u.

³¹Laamiiɗo debbo, mo Lesdi Fombina[16], ummanto yimɓe zamanuuru ndu'u, o wulloto ɓe nyalaade darŋgal, ngam o wari diga daayiiɗum haa o nana bolle Suleymaanu keewɗe hikma. Ndaa ɓurɗum Suleymaanu haa ɗo.

³²Nyalaade darŋgal, yimɓe Niniwe ummanto yimɓe zamanuuru ndu'u, hiitoto ɓe, ngam yimɓe Niniwe tuubi nde ɓe nani waazu Yonas. Ndaa, ɓurɗum Yonas haa ɗo.”

³³“Walaa mo jamnata pittirla, ngam nyukkingo nga malla o hippa nga bee bokoti, ammaa o jo'inan nga dow jo'inirɗum pittirla, ngam haa nastanɓe fuu ngi'a annoora.

³⁴Gite ma laati pittirla ɓanndu maaɗa. To gite ma njame, ɓanndu ma fuu ɗon nder annoora. Ammaa to gite ma njamɗaay, ɓanndu ma fuu ɗon nder nyiɓre.

³⁵Hakkil, ngam taa annoora ngonka nder maaɗa laato nyiɓre!

³⁶To ɓanndu ma fuu ɗon nder annoora, to walaa goɗɗum lutti nder nyiɓre, ndu fuu ndu wonan nder annoora, bana to pittirla ɗon yaynane bee annoora muuɗum.”

³⁷Nde Yeesu timmini wolwugo, Farisaajo goɗɗo ewni mo haa saare muuɗum ngam ɓe nyaamda. O nasti, o fuɗɗi nyaamugo.

³⁸Farisaajo hayɗini nde o yi'i Yeesu fuɗɗi nyaamugo bilaa lootugo juuɗe muuɗum.

³⁹Jawmiraawo wi'i mo: “Onon Farisa'en, on ɗon laɓɓina yaasi jardugel e nyaamrugel, ammaa nder mooɗon ɗon heewi bee suunooji e halleende.

⁴⁰Sooya-hakkiilo'en, Allah mo waɗi yaasi, o waɗaay nder boo na?

⁴¹Caahe talaka'en ko woni nder jardugel mooɗon e nyaamrugel mooɗon, nden kuuje fuu laatoto laaɓɗe ngam mooɗon.

⁴²Ammaa bone laatano on, onon Farisa'en! Ngam on ɗon itta zakka[17] haako minti e haako jarne e haakooji nyaameteeɗi fuu e on ɗon ngeeba adilaaku e yiide Allah. Kanji ɗi kaandi jogeego, ammaa taa on ngejjita luttuɗi boo.

⁴³Bone laatano on, onon Farisa'en! Ngam on ngiɗi joole tedduɗe nder cuuɗi dewal Yahuudu'en, on ngiɗi ɓe koofna on haa daldal mooɓtorɗe.

⁴⁴Bone laatano on! Ngam on nanndi bee genaale ɗe yimɓe njahata dow mum'en bilaa anndugo ɗum.”

⁴⁵Nden gooto haa moodiɓɓe tawreeta wi'i Yeesu: “Moodibbo, ko mbi'ata ɗo, minin kuɗata.”

⁴⁶Yeesu jaabi: “Bone laatano on, onon moodiɓɓe tawreeta boo! On ɗon ndoonda yimɓe doŋgle caɗɗe roondeego ɗe onon on meemataa koo bee hoondu mooɗon sam.

⁴⁷Bone laatano on! Ngam on ɗon maha genaale annabi'en ɓe kaakiraaɓe mooɗon mbari.

⁴⁸To non kam on ɗon ceedo kuuɗe kaakiraaɓe mooɗon, on ɗon ngerdo ɗe, ngam kamɓe ɓe mbari annabi'en. Onon boo, on mahi genaale maɓɓe.

⁴⁹Ngam maajum hikma Allah wi'i: Mi nelan annabi'en e nelaaɓe, ɓe mbaran woɗɓe, ɓe toonyan woɗɓe boo.

⁵⁰Mi ƴamtan ƴiiƴam annabi'en ndufaaɗam diga puɗɗuki duniyaaru haa yimɓe zamanuuru ndu'u,

⁵¹diga ƴiiƴam Habila haa yotto ƴiiƴam Zekariya, mbaraaɗo hakkunde nokkuure seniinde e hirsirde. Nonnon, mi ɗon wi'a on, yimɓe zamanuuru ndu'u ɓe hiiteteeɓe ngam mbar-hooreeji ɗi'i fuu!

⁵²Bone laatanto on, onon moodiɓɓe tawreeta, ngam on kaɗi yimɓe anndugo gooŋga: Onon, on cali anndugo ka bee ko'e mooɗon, on kaɗi yiɗɓe anndugo ka boo.”

⁵³Saa'i o wurti ton, moodiɓɓe tawreeta e Farisa'en tikkani mo masin, tokki mo bee haala, ƴami mo ngam haa o wolwa dow kuuje ɗuuɗɗe.

⁵⁴Ɓe tuufni mo nder bolle ngam haa ɓe nana kalluka diga hunnduko maako, ɓe ngulloro mo.