Read Fulfulded Luka 13 Bible Online

Luka 13 - Fulfulded bible

Luka 13

¹Saa'i man yimɓe woɗɓe wonɓe ton ngecci Yeesu haala yimɓe Galiili ɓe Pilaatu mbarno nde ɓe ɗonno lii'ano Allah kirseteeɗi.

²Yeesu jaabi ɓe: “On tammi Galiili'en man laatino hakke'en ɓuri Galiili'en woɗɓe ngam sarru man heɓi ɓe na?

³Aa'a, mi ɗon wi'a on, to onon boo on tuubaay, on kalkiran on fuu bana non!

⁴Malla yimɓe sappo e njoweetato ɓe mahdi suudu aynirdu yibbi dow muuɗum'en haa Silowam, mbari ɓe, on tammi ɓe aybuɓe ɓuri yimɓe Urusaliima woɗɓe fuu na?

⁵Aa'a mi ɗon wi'a on, to on tuubaay, on kalkiran on fuu bana non!”

⁶Yeesu wolwani ɓe balndol ngo'ol: “Goɗɗo feere woodi ibbi ki o jubi nder ngesa maako, o wari teɓugo ibbe, ammaa o heɓaay.

⁷Nden o wi'i aynoowo ngesa: Ndaa duuɓi tati mi ɗon tefa ibbe haa ibbi ki'i, ammaa mi heɓaay. Fe'u ki, ngam ɗume ki ɗon usta semmbe lesdi meere?”

⁸Aynoowo ngesa wi'i mo: “Jaagorɗo, accu ki fahin hitaande nde'e, mi wasan sera maaki, mi rufan koonal.

⁹Teema hitaande warannde ki riman, to naa non, a fe'a ki.”

¹⁰Yeesu ɗonno ekkitina nder suudu dewal Yahuudu'en woɗndu nyannde siwtorde.

¹¹Woodino debbo haa ton, marɗo ginnawol baakin duuɓi sappo e joweetati, ginnawol jiiji mo, o ɗon turi, o waawataa daraago.

¹²Nde Yeesu yi'i mo, o ewni mo, o wi'i: “Debbo, a yamɗitinaama diga jiija ma.”

¹³O jo'ini juuɗe maako dow hoore debbo, ɗon nii debbo darti, teddini Allah.

¹⁴Ammaa ardiiɗo suudu dewal Yahuudu'en ɓerni ngam jamɗitinki goɗɗo nyannde siwtorde, o wi'i mooɓre: “Nyalɗe joweego fuu ɗon ngam huuwugo, ngare nyalɗe man ngam njamɗiton, ammaa naa nyannde siwtorde!”

¹⁵Jawmiraawo jaabi mo: “Naafiki'en! Koo moy mooɗon yoofataa ngaari mum malla wamnde mum diga nyaamnirde nyannde siwtorde, ngam o yarnoya ɗum na?

¹⁶Debbo mo danygol Ibrahiima, mo Sayɗaanu haɓɓi duuɓi sappo e joweetati, ɗum haanaay o yoofe diga kaɓɓorgol ngo'ol nyannde siwtorde na?”

¹⁷Nde o wolwi bana nii, konne'en maako fuu cemti, ammaa mooɓre fuu seyi ngam kuuje tedduɗe ɗe o waɗi.

¹⁸Yeesu wi'i fahin: “Bee ɗume laamu Allah nanndi? Bee ɗume nanndinanmi ngu?

¹⁹Ngu nanndi bee gawel citta, ngel goɗɗo hoo'i, aawi nder jarne muuɗum, ngel fuɗi, ngel laati lekki, haa colli mbaɗi caɓɓe muuɗum'en dow lice maaki.”

²⁰Yeesu wi'i fahin: “Bee ɗume nanndinanmi laamu Allah?

²¹Ngu nanndi bee ufnirɗum ɗum debbo hoo'i, waati nder kuroori ɗuuɗndi, haa kuroori man fuu uufi.”

²²Yeesu saali berniiji e gure, o ekkitini nde o ɗon yaha Urusaliima.

²³Goɗɗo wi'i mo: “Jawmiraawo, yimɓe seɗɗa tan kisata na?” O jaabi:

²⁴“Tiiɗe nastirgo dammugal paaɗŋgal. Mi ɗon wi'a on: Ɗuuɗɓe ngiɗi nastugo, ammaa ɓe mbaawataa.

²⁵To jawmu saare ummake, maɓɓi dammugal, onon boo on lutti haa yaasi, on puɗɗan tappugo dammugal, on mbi'an: Jaagorɗo, maɓɓitanan min! O jaaboto on: Mi anndaa toy iwɗon.

²⁶Nden on puɗɗan wi'ugo: Min nyaami, min njari yeeso maaɗa, a ekkitini dow laabi amin!

²⁷Ammaa o jaaboto on: Ndille, mi anndaa toy iwɗon, onon waɗooɓe halleende!

²⁸On mboyan, on kirƴindiran nyii'e haa ton, yaake on ngi'ata Ibrahiima, Isiyaaku e Yaakubu bee annabi'en fuu nder laamu Allah e onon boo on ngudinaama yaasi.

²⁹Yimɓe ngaran diga fuunaaŋge e hiirnaaŋge, woyla[19] e fombina[20], ɓe njooɗoto nder laamu Allah ngam ɓe nyaama.

³⁰Nden kadi yimɓe aartuɓe cakkititto e sakkitiiɓe boo aartoto.”

³¹Wakkati man nden, Farisa'en woɗɓe ngari, mbi'i Yeesu: “Dillu diga ɗo, ngam Hirudus yiɗi mbarugo ma!”

³²Yeesu wi'i ɓe: “Njehe, mbi'e doldolnde[21] man, ndaa: Mi ɗon riiwa ruuhuuji coɓɗi, mi ɗon yamɗitina nyawɓe, hannde e jaŋngo, nyannde tataɓre boo ɗum timmoode kuugal am.

³³Ammaa sey mi tokkita laawol am hannde, jaŋngo e faɓɓijaŋngo, ngam haanaay annabiijo maaya yaasi Urusaliima.

³⁴Urusaliima! Urusaliima! A mbari annabi'en, a fiɗi nelaaɓe ɓe Allah neli haa ma bee kaa'e. Nde ɗuuɗɗum mi yiɗino mooɓtugo yimɓe ma, bana no gertogal mooɓtirta ɓikkoy mum les bileeji mum, ammaa on cali.

³⁵Ndaa, suudu mooɗon laatoto wudinaandu. Ammaa mi ɗon wi'a on: On ngi'ataa yam ɓaawoɗon haa saa'i on mbi'ata: Barka laatano garanɗo bee innde Jawmiraawo!”