Read Fulfulded Luka 15 Bible Online

Luka 15 - Fulfulded bible

Luka 15

¹Jomnooɓe e hakke'en ɗuuɗɓe ɓaditi Yeesu ngam nanugo mo.

²Farisa'en e moodiɓɓe tawreeta ngurŋgurti, mbi'i: “Goɗɗo oo ɗon jaɓɓo hakke'en, ɗon nyaamda bee maɓɓe boo.”

³Nden o wolwani ɓe balndol ngo'ol:

⁴“To goɗɗo haa mooɗon woodi baali teemerre, nden ngootu eeri, o accataa cappanɗe joweenayi e joweenayi goɗɗi nder ladde ngam o ɗaɓɓitoya eerŋgu, haa to o heɓti ngu na?

⁵To o heɓti, o roondoto ngu dow balbe maako bee seyo,

⁶to o warti saare, o ewnoto soobiraaɓe maako e heeddiɗɗiraaɓe maako, o wi'a ɓe: Ceyode bee am, ngam mi heɓti mbaalu am eernooŋgu go!

⁷Mi ɗon wi'a on, bana non boo seyo laatorto haa asama to hakkeejo gooto tuubi, ɓuran cappanɗe njoweenayo e njoweenayo adili'en ɓe maraay haaje tuubugo.”

⁸“Malla debbo moy, to woodi suleyje cardi sappo, woore majji, o jamnataa pittirla, o wuuwa suudu, o ɗaɓɓita bee tiɗɗinaare haa to o heɓti nde na?

⁹To o heɓti nde, o ewnoto soobiraaɓe maako e heeddiɗɗiraaɓe maako, o wi'a ɓe: Ceyode bee am, ngam mi heɓti suleyre am majjunoonde go.

¹⁰Mi ɗon wi'a on, bana non boo malaa'ika'en Allah ceyorto ngam hakkeejo gooto mo tuubi.”

¹¹Yeesu wi'i fahin: “Gorko feere woodino ɓiɓɓe ɗiɗo.

¹²Minyiraawo wi'i baaba mum: Baaba, hokkam geɗal jawdi ngal mi tammi ronugo. Baaba go senndani ɓe jawdi mum.

¹³Ɓaawo balɗe seɗɗa, ɓiɗɗo go sorri jawdi mum fuu, dilli lesdi ndaayiindi. O majjini jawdi maako bee yeeɗugo nder daakaareeku.

¹⁴Nde o timmini ɗum fuu, weelo saatuŋgo waɗi haa lesdi man, o fuɗɗi maatugo ɓillaare.

¹⁵O yehi, o huuwani gooto yimɓe nder lesdi man. Goɗɗo man neli mo nder gese durugo gaduuji.

¹⁶O yiɗi nyaamugo ko gaduuji nyaamata, ammaa walaa mo hokkata mo ɗum.

¹⁷Nden o fuɗɗi numtugo joonde maako, o wi'i: Huuwanooɓe baaba am ngoodi nyaamdu ɗuuɗndu, nden nii mi ɗon maaya bee dolo haa ɗo!

¹⁸Mi loroto haa baaba am, mi wi'an mo: Baaba, mi waɗi hakke heedi Allah e heedi maaɗa,

¹⁹mi he'aay ewneego ɓiya fahin. Waɗam bana gooto caka huuwanooɓe ma.

²⁰O lori haa baaba maako. Nde o ɗon daayi tawon, baaba maako eewi mo, yurmini mo: O doggi, o harli mo, o hebbi mo.

²¹Ɓiɗɗo go wi'i mo: Baaba am, mi waɗi hakke heedi Allah e heedi maaɗa, mi he'aay ewneego ɓiya fahin.

²²Ammaa baaba wi'i suka'en muuɗum: Njaawɗe ngadde ngapaleewol ɓurŋgol wooɗugo, ɓorne mo ngol, mbaɗane mo halagaare haa hoondu e paɗe boo haa kosɗe!

²³Ngadde gaggel payŋgel, kirse, en nyaama, en ceya!

²⁴Ngam ɓiɗɗo am oo, o maayno, ammaa o yeeɗiti, o majjuno, ammaa o heɓtaama! Ɓe puɗɗi seyaago.

²⁵Wakkati man ɓiɗɗo afo ɗonno haa ngesa. Nde o ɗon warta, o ɓaditi saare go, o nani pijirle e gamarle.

²⁶O ewni gooto suka'en, o ƴami mo ko waɗi.

²⁷Suka man wi'i mo: Deerɗiraawo ma warti, baaba ma hirsi gaggel payŋgel, ngam o heɓti mo o jamo.

²⁸Nden ɓiɗɗo afo go ɓerni, sali nastugo saare. Baaba wurti, tori mo o nasta.

²⁹Ammaa o jaabi baaba maako: Ndaa duuɓi ɗuuɗɗi mi ɗon huuwane, mi meeɗaay salaago ɗowtanaago umrooje ma, ammaa a meeɗaay hokkugo yam koo jawgel be'el ngam haa mi seyodo bee soobiraaɓe am.

³⁰Ammaa nde ɓiɗɗo ma oo warti, mo majjini jawdi ma bee daakaare'en, a hirsi gaggel payŋgel ngam maako!

³¹Baaba wi'i mo: Ɓiŋngel am, an a ɗon wondi bee am tum, ko marmi fuu an mari ɗum.

³²Haani ngaɗen juulde, en ceyo, ngam deerɗiraawo ma oo, o maayno, o yeeɗiti, o majjuno, o heɓtaama!”