Read Fulfulded Luka 16 Bible Online

Luka 16 - Fulfulded bible

Luka 16

¹Yeesu wi'i pukara'en muuɗum: “Goɗɗo diskuɗo woodino kaliifaajo. Ɓe ngari, ɓe mbi'i mo kaliifaajo man ɗon wonna jawdi maako.

²Diskuɗo ewni mo, wi'i mo: Ɗume nananmi dow ma? Waɗanam lisaafi kuugal ma, ngam yeeso ɗo a laatataako kaliifaajo am fahin!

³Kaliifaajo go numi nder ɓernde mum: No mbaɗanmi? Ngam jaagorɗo am ɗon itta kaliifaaku jawdi mum haa am? Remugo, mi walaa semmbe man, rookaago mi semtan.

⁴Yowwa, mi anndi no mbaɗanmi, ngam haa yimɓe feere njaɓɓo yam haa ci'e[22] maɓɓe, to mi wurtinaama kuugal am.

⁵O ewni gooto gooto jaɓɓe nyamaale haa jaagorɗo maako fuu. O wi'i arano: Noy jaagorɗo am tokkoto ma?

⁶O jaabi: Nebbam jaytunje goŋgoŋji teemerre. Nden kaliifaajo wi'i mo: Ndaa ɗereewol ma. Law, jooɗa winndu goŋgoŋji cappanɗe jowi!

⁷Nden o wi'i goɗɗo feere boo: Noy jaagorɗo am tokkoto ma? O jaabi: Buhuuje alkamaari teemerre. Kaliifaajo wi'i mo: Ndaa ɗereewol ma, winndu cappanɗe joweetati!

⁸Jaagorɗo mani kaliifaajo faasikiijo oo, ngam o huuwi bee ƴoyre. Ngam yimɓe duniyaaru ndu'u, ɓe ƴoyɓe hakkunde muuɗum'en ɓuri yimɓe annoora”.

⁹Yeesu ɓesdi wi'ugo: “Min mi ɗon wi'a on: Keɓane ko'e mooɗon soobiraaɓe bee jawdi duniyaaru ndu'u. To ndi timmiri on, ɓe njaɓa on haa joole duumiiɗe.

¹⁰Mo huuwi kuugal pamaral bee hoolaare, huuwan boo kuugal maŋngal bee hoolaare. Mo huuwi kuugal pamaral bee faasikaare, huuwan boo kuugal maŋngal bee faasikaare.

¹¹To on laataaki hoolaaɓe bee jawdi duniyaaru kalfitinaandi on, moy halfinta on jawdi gooŋgaari?

¹²To on laataaki hoolaaɓe bee jawdi yimɓe feere, moy hokkata on ko maroton?”

¹³“Walaa suka mo waawata jagganaago jaagorɓe ɗiɗo, ngam o wanyan oo e o yiɗan oya malla o ɗakkotira bee oo e o meeriɗina oya. On mbaawataa jagganaago Allah e jawdi.”

¹⁴Farisa'en, yiɗa-jawdi'en nani bolle ɗe'e, ɓe njali mo.

¹⁵Yeesu wi'i ɓe: “Onon ngoni waɗanɓe bana adili'en yeeso yimɓe, ammaa Allah anndi ɓerɗe mooɗon, ngam ko yimɓe ndaarata bana mawɗum, ɗum nyidduɗum yeeso Allah.

¹⁶Tawreeta Muusa e defte annabi'en ɗonno haa yotti wakkati Yuhanna baɗoowo baptisma. Diga wakkati man boo kubaruwol belŋgol ngol laamu Allah wooynaama, koo moy ɗon haɓda bee semmbe ngam nastugo ndu.

¹⁷Koyɗum asama e lesdi majjita dow harfeere tawreeta woore halka.

¹⁸Koo moy seeri debbo muuɗum, te'i debbo feere, waɗi njeenu. Koo moy te'i debbo ceeraaɗo boo, waɗi njeenu.”

¹⁹“Woodino goɗɗo diskuɗo, ɓorniiɗo limce ɗelemɗe boɗeeje e ɗuuɗa cogguuje. Nyalaade fuu o ɗon nder seyo e jeynitaare.

²⁰Haa dammugal maako, talakaajo bi'eteeɗo Laazarus ɗon waali, ɓanndu muuɗum fuu heewi kuuduuje.

²¹O yeli nyaamugo ko solata les taabal diskuɗo oo. Dawaaɗi ɗon ngara, taha kuuduuje maako.

²²Talakaajo oo maayi, malaa'ika'en efti mo, njahri mo haa kommbi Ibrahiima. Diskuɗo boo maayi, ɓe uwi ɗum.

²³Nde o ɗon yaŋgito haa joonde maayɓe, o ɓaŋgti gite, o yi'i Ibrahiima daayiiɗum bee Laazarus haa kommbi muuɗum.

²⁴O wooki, o wi'i: Yaa baabiraawo am Ibrahiima, hinnam. Nel Laazarus ngam o suuwa hoondu maako nder ndiyam, o feewtina ɗemŋgal am, ngam mi ɗon yaŋgito nder yiite nge'e.

²⁵Ammaa Ibrahiima jaabi: Ɓiŋngel am, siftor yaake a ɗonno bee yoŋki, a heɓi neeminaare, ammaa Laazarus, bone o heɓi. Jonta ndaa mo haa ɗo, o de'itinaaɗo, an boo a ɗon yaŋgito.

²⁶Dow maajum fuu boo, woodi lowol lugguŋgol hakkunde meeɗen, ngam yiɗɓe salaago njaha haa mooɗon mbaawataa, non boo diga ton haa ɗo.

²⁷Diskuɗo wi'i: Mi ɗon toro ma kadi, yaa baabiraawo am, nel Laazarus haa saare baaba am.

²⁸Ngam mi woodi deerɗiraaɓe njowo, haa o reentina ɓe, ngam taa ɓe ngara kamɓe boo haa nokkuure yaŋgada nde'e.

²⁹Nden Ibrahiima jaabi mo: Muusa e annabi'en fuu ɗon, sey ɓe nanana ɓe.

³⁰Diskuɗo wi'i: Naa non, yaa baabiraawo am Ibrahiima, to goɗɗo diga maayɓe yehi haa maɓɓe, ɓe tuuban.

³¹Ibrahiima wi'i mo: To ɓe nananaay Muusa e annabi'en, ɓe njaɓantaa goɗɗo koo to ummiti diga maayɓe.”