Read Fulfulded Luka 17 Bible Online

Luka 17 - Fulfulded bible

Luka 17

¹Yeesu wi'i pukara'en muuɗum: “Walaa mo waawata haɗugo ko nastinta yimɓe nder hakke. Ammaa bone laatanto neɗɗo mo laati daliila maajum!

²Ndikkana mo ɓe ɓila hayre namarde mawnde haa daande maako, ɓe njolla mo nder mbeela, dow o do'a gooto ɓurɗo famɗugo oo nder hakke.

³Kakkilane ko'e mooɗon! To deerɗiraawo ma waɗi hakke, fel mo. To o tuubi, yaafa mo.

⁴To o waɗi ma aybe nde joweeɗiɗi nder nyalaade, nden boo nde joweeɗiɗi man fuu, o lori haa maaɗa bee wi'go: Mi tuubi, yaafa mo.”

⁵Nelaaɓe mbi'i Jawmiraawo: “Ɓesdan min nuɗɗinki!”

⁶Jawmiraawo boo wi'i: “To on ngoodi nuɗɗinki koo seɗɗa bana gawel citta, on mbi'an dundeehi ki'i: Ɗoofa, yah ɗisoya nder mbeela. Ki ɗowtanto on.”

⁷“Moy haa mooɗon mari kuuwoowo, mo ɗon rema malla ɗon dura dabbaaji, to kuuwoowo oo warti ngesa, o wi'a mo: War law, nyaam?

⁸Naa o wi'an mo: Taaskitinam ko mi nyaama, ɓorna limce kuugal, huuwanam, haa to mi nyaami e mi yari, ɓaawo maajum an boo a nyaama a yara kadi. Naa non na?

⁹Kadi o yettan suka oo ngam o huuwani mo ko o umri mo na?

¹⁰Bana non onon boo, to on mbaɗi ko Allah umri on fuu, mbi'e: Minin min huuwooɓe meere, ngam min kuuwi ko haandanino min kuuwa tan.”

¹¹Nde Yeesu ɗon yaha Urusaliima, o saalori hakkunde Samariya bee Galiili.

¹²O ɗonno nasta wuro feere, kuturu'en sappo ngari fottugo bee maako. Ɓe ndari daayiiɗum,

¹³ɓe towni sawtu, ɓe mbi'i: “Yeesu, jaagorɗo, yurmin min!”

¹⁴Nde o yi'i ɓe, o wi'i ɓe: “Njehe, cappine ɓalli mooɗon haa liman'en.” Nde ɓe ɗon njaha, ɓe njamɗiti.

¹⁵Gooto maɓɓe, nde yi'i yamɗiti, lori, ɗon teddina Allah bee sawtu.

¹⁶O sujidi kommbi Yeesu, o yetti mo. Goɗɗo oo o Samariyaajo.

¹⁷Yeesu ƴami: “Naa sappo fuu njamɗiti na? E toy njoweenayo woɗɓe?

¹⁸Walaa koo gooto mo numi loraago, teddina Allah, sey jananno oo na?”

¹⁹Nden o wi'i mo: “Umma, dillu, nuɗɗinki ma hisni ma.”

²⁰Farisa'en ƴami Yeesu: “Ndeye laamu Allah warata?” O jaabi ɓe: “Laamu Allah warataa bee alaamaaji gi'eteeɗi.

²¹Ɓe mbi'ataa boo: Ndaare ngu ɗon ɗo malla ngu ɗon to ngam laamu Allah ɗon caka mooɗon.”

²²O wi'i pukara'en: “Nyalɗe ngaran, on ngelan yi'ugo nyalaade woore nder nyalɗe Ɓii-neɗɗo, ammaa on ngi'ataa nde.

²³Ɓe mbi'an on: Ndaa o ɗon ɗo, o ɗon to. Taa njehe ton, taa ndogge ton.

²⁴Ngam bana ma'ere ma'irta wakeere asama nde'e nden jayŋgol maare ɗon yotto haa wakeere ndeya, bana non Ɓii-neɗɗo laatorto nder nyalaade mum.

²⁵Ammaa aran, o yaran bone ɗuuɗɗum, yimɓe zamanuuru ndu'u ngudinan mo.

²⁶Ko laatino nder zamanu Nuuhu, ɗum laatoto bana non boo nder nyalɗe Ɓii-neɗɗo.

²⁷Yimɓe ɗonno nyaama, njara, te'a, te'ana ɓiyum'en, haa nyalaade Nuuhu nasti koommbowal[23], ilam tuufaana wari halki ɓe fuu.

²⁸Ɗum laatoto boo bana nder zamanu Ludu: Yimɓe ɗonno nyaama, njara, cooda, coorra, aawa, maha cuuɗi.

²⁹Ammaa nyalaade Ludu wurti Sodoma, Allah toɓni yiite e baruudu[24] diga dow bana iyeende, halki luttuɓe fuu.

³⁰Bana non ɗum laatoto nyannde baŋguki Ɓii-neɗɗo.

³¹Nyalaade man, mo ɗon dow soorowol taa jippo ngam hoo'ugo kuuje muuɗum nder suudu mum. Non boo ngam gonɗo haa ngesa, taa loro sam.

³²Ciftore debbo Ludu.

³³Koo moy yiɗi hisnugo yoŋki mum, majjinan ki, ammaa mo majjini ki boo, heɓtan ki.

³⁴Mi ɗon wi'a on, jemmaare maajum yimɓe ɗiɗo ngondan dow leeso wooto, gooto hoose, gooto acce.

³⁵Rewɓe ɗiɗo namdan dow namarde woore, gooto hoose, gooto acce. [

³⁶Yimɓe ɗiɗo ngondan nder ngesa, gooto hoosete, gooto boo acce.]”

³⁷Pukara'en maako mbi'i mo: “Haa toy ɗum laatoto, Jawmiraawo?” O wi'i ɓe: “Haa nyawmande woni fuu, ton jigaaje mooɓtoto.”