Read Fulfulded Luka 20 Bible Online

Luka 20 - Fulfulded bible

Luka 20

¹Nyannde feere Yeesu ɗon ekkitina yimɓe nder haykaliiru, o waazini ɓe kubaruwol belŋgol. Mawɓe liman'en e moodiɓɓe e ndotti'en ngari,

²ƴami mo: “Yeccu min bee duŋayeere moy a waarata kuuje ɗe'e? Malla moy duŋani ma waɗugo bana nii?”

³O jaabi ɓe: “Min boo mi ƴaman on huunde woore. Mbi'eeɗam:

⁴Moy duŋani Yuhanna waɗango yimɓe baptisma? Allah naa malla yimɓe?”

⁵Ammaa ɓe mbi'mbi'tiri: “To en mbi'i: Allah, o wi'an: Koni on nuɗɗinaay mo?

⁶To en mbi'i: Yimɓe, nden boo yimɓe fuu piɗan en bee kaa'e, ngam ɓe nuɗɗini Yuhanna o annabiijo fakat.”

⁷Nden ɓe njaabi: “Min anndaa.”

⁸Yeesu wi'i ɓe: “Min boo mi wi'ataa on bee duŋayeere moy mbaɗanmi kuuje ɗe'e.”

⁹Ɓaawo man Yeesu fuɗɗi wolwango yimɓe balndol ngo'ol: “Goɗɗo jubi ngesa inabooje, o halfini ka remooɓe, o dilli jahaaŋgal, o duuri.

¹⁰Nde saa'i teɓugo inabooje waɗi, o neli jaggiiɗo maako haa remooɓe ngam ɓe ndokka mo geɗal maako haa inabooje. Ammaa remooɓe tappi nelaaɗo, ɓe lortini ɗum meere.

¹¹Jawmu ngesa inabooje neli jaggiiɗo mum feere, ɓe tappi mo boo, ɓe lortini mo meere.

¹²O neli tataɓo fahin, ɓe naawni ɗum, ɓe ndiiwi ɗum.

¹³Jawmu ngesa inabooje wi'i: Ko mbaɗanmi? Mi nelan ɓiɗɗo am giɗaaɗo, kaŋko kam ɓe teddinan mo!

¹⁴Ammaa nde remooɓe ngi'i mo, ɓe carwootiri, ɓe mbi'i: Ndaa donoowo, mbaren mo ngam haa ngesa laatano en.

¹⁵Ɓe ndasi mo yaasi ngesa, ɓe mbari mo. Ɗume jawmu ngesa inabooje tammi waɗango ɓe?

¹⁶O waran, o halkan remooɓe ɓe'e, o hokkan woɗɓe ngesa man.” Nde yimɓe nani ɗum, ɓe mbi'i: “Ɗo kam waɗataako!”

¹⁷Ammaa Yeesu suti ɓe, wi'i: “Ɗume binndaaɗum ɗu'um yiɗi wi'go? Hayre nde mahooɓe ngudini, laati hayre talkumoore ɓurnde saman.

¹⁸Koo moy do'i dow hayre nde'e, sampititto. To nde do'i dow goɗɗo boo, nde naman mo.”

¹⁹Moodiɓɓe tawreeta e mawɓe Farisa'en tefi naŋngugo Yeesu saa'i man nden, ammaa ɓe kuli yimɓe, ɓe paami dow maɓɓe o wolwi balndol ngo'ol.

²⁰Ɓe puɗɗi aynugo Yeesu, ɓe neli horooɓe. Yimɓe man mbaɗi ko'e maɓɓe bana ɓe yimɓe adili'en, ngam ɓe naŋngira Yeesu nder bolle maako ngam ɓe keɓa hokkugo mo haa hiitooɓe e yimɓe marɓe baawɗe ngomnati.

²¹Ɓe ƴami mo: “Moodibbo, min anndi ko mbolwata e ko a ekkitinta ɗum gooŋga. A senndindirtaa yimɓe, a ɗon ekkitina laawol Allah bee gooŋga.

²²Kaanduɗum min ndokka laamiiɗo Roma jomorgol naa malla taa min ndokka?”

²³Yeesu annditi faasikaare maɓɓe, o wi'i ɓe:

²⁴“Kolleeɗam suleyre. Suura moy e innde moy ɗo?” Ɓe njaabi: “Kaysara, laamiiɗo Roma jeyi.”

²⁵O wi'i ɓe: “Nden kam njoɓe Kaysara ko haanani mo, ndokke Allah boo ko haanani Allah.”

²⁶Ɓe keɓaay naŋngirgo mo yeeso yimɓe nder bolle maako. Ammaa ɓe kayɗini ngam jaawaabu maako, ɓe njeeɗi.

²⁷Saduki'en woɗɓe ɓaditi Yeesu. Kamɓe ngoni wi'anɓe maayɓe ummitittaako. Ɓe ƴami Yeesu ƴamol ngo'ol:

²⁸“Moodibbo, Muusa winndani en umroore nde'e: To goɗɗo maayi, acci debbo bilaa ɓiŋngel, sey deerɗiiko te'a debbo man, heɓana maayɗo danygol.

²⁹Woodino deerɗiraaɓe njoweeɗiɗo. Arano te'i debbo, maayi bilaa ɓiŋngel.

³⁰Ɗiɗaɓo te'i debbo go,

³¹non boo bee tataɓo. Ɗum laati bana non haa njoweeɗiɗo fuu maaydi bilaa heɓugo ɓiŋngel.

³²Ragare man boo debbo maayi.

³³Kadi nyannde ummitineeki maayɓe kam, o laatoto debbo moy caka maɓɓe? Ngam njoweeɗiɗo fuu te'ino mo.”

³⁴Yeesu jaabi ɓe: “Yimɓe zamanuuru ndu'u ɗon te'indira.

³⁵Ammaa he'iiɓe heɓugo geɗal haa zamanuuru waranndu e haa ummitineeki maayɓe, ɓe te'indirtaa.

³⁶Ngam ɓe maayataa fahin. Ɓe nanndi bee malaa'ika'en, ɓe laatake ɓiɓɓe Allah ngam o ummitini ɓe diga maayde.

³⁷Muusa wi'i laaɓɗum maayɓe ummititto bee yoŋki nder aayaaje ko winnda dow haala wumre, nde o wi'i Jawmiraawo o Allah Ibrahiima, o Allah Isiyaaku e o Allah Yaakubu.

³⁸Allah laataaki Allah maayɓe, ammaa o Allah yeeɗɓe, ngam yimɓe fuu ɗon ngeeɗa fodde maako.”

³⁹Woɗɓe haa moodiɓɓe, mbi'i: “Moodibbo, a wolwi booɗɗum.”

⁴⁰Ɓe kuli ƴamugo mo ƴamol goɗŋgol.

⁴¹Yeesu wi'i ɓe: “Noy ɓe mbi'rata Almasiihu o ɓii Daawuda?

⁴²Ngam Daawuda bee hoore muuɗum wi'i nder deftere Jabuura: Jawmiraawo wolwani jawmam: Jooɗa haa nyaamo am,

⁴³haa to mi laatini konne'en ma jaaɓruɗum kosɗe ma.

⁴⁴Daawuda ewni mo Jawmiraawo, kadi noy Almasiihu laatori ɓiyiiko?”

⁴⁵Yeesu wolwani pukara'en muuɗum yeeso nananɓe mo fuu, o wi'i:

⁴⁶“Ndeente e moodiɓɓe tawreeta, yiɗɓe waancugo bee ngapaleeji juutɗi. Ɓe ngiɗi yimɓe koofna ɓe haa luuɓe. Haa joole tedduɗe ɓe ngiɗi jooɗaago nder cuuɗi dewal e to ɓe ewnake ɓe ngam nyaamdu boo, ɓe ɗaɓɓitan joole camɗinaaɗe.

⁴⁷Ɓe ɗon njaɓta marle rewɓe yurumɓe, ɓe ɗon njuutina do'aare ngam yimɓe ngi'a ɓe. Ɓe keɓan kiita naawka masin.”