Read Fulfulded Luka 22 Bible Online

Luka 22 - Fulfulded bible

Luka 22

¹Juulde tamseeje ɗe ufnaaka, wi'eteende Paska ɓadake yottaago.

²Mawɓe liman'en e moodiɓɓe tawreeta ɗon ɗaɓɓa dabare haa ɓe mbara Yeesu, ammaa ɓe ɗon kula yimɓe.

³Nden Sayɗaanu nasti nder Yahuuda, bi'eteeɗo Iskariyot, gooto nder sappo e ɗiɗo.

⁴O yehi, o narri bee mawɓe liman'en e mawɓe aynooɓe haykaliiru, dow dabare naŋngugo Yeesu.

⁵Ɓe ceyi, ɓe narri hokkugo mo ceede.

⁶Yahuuda jaɓi, o fuɗɗi ɗaɓɓugo dabare no ɓe naŋngira Yeesu bee sirri ngam taa mooɓre yimɓe heɓta.

⁷Nyalaade tamseeje ɗe ufnaaka, nde ɓe kirsata jawgel Paska yottake.

⁸Yeesu neli Piyer e Yuhanna, o wi'i ɓe: “Njehe, taaskitinane en nyaamdu Paska haa nyaamen”

⁹Ɓe ƴami: “Toy ngiɗɗa min taaskitina ndu?”

¹⁰O jaabi ɓe: “Ndaa, to on nasti berniwol, on pottan bee goɗɗo doondiiɗo mbulku ndiyam. Tokke mo haa saare nde o nastata,

¹¹mbi'e jawmu saare man: Moodibbo wi'i: Toy suudu haa mi nyaama kiirtaari Paska bee pukara'en am?

¹²O hollan on suudu mawndu, dowru, mo'itinaandu, haa ton on ngaɗata taaskara.”

¹³Ɓe njehi, ɓe tawi kuuje man bana o wi'i ɓe, ɓe taaskitini kiirtaari Paska.

¹⁴Nde wakkati man waɗi, Yeesu fuɗɗi nyaamugo bee nelaaɓe.

¹⁵O wi'i ɓe: “Mi yeli masin nyaamugo nyaamdu Paska ndu bee mooɗon hiddeko mi torro.

¹⁶Ngam mi ɗon wi'a on, mi meetataa nyaamugo nyaamdu Paska haa to maana maaru waŋginaama nder laamu Allah.”

¹⁷Nden o hoo'i jardugel, o yetti Allah, o wi'i: “Koo'e jardugel ngel, cennde hakkunde mooɗon,

¹⁸ngam mi ɗon wi'a on, yeeso ɗo mi meetataa yarugo inaboojam sey to laamu Allah wari.”

¹⁹Ɓaawoɗon o hoo'i tamseere, o yetti Allah, o yewi nde, o hokki ɓe, o wi'i: “Ɗo ɗum ɓanndu am hokkaandu ngam mooɗon, mbaɗe ɗum ngam haa on ciftorammi.”

²⁰Bana non boo, o hoo'i jardugel ɓaawo nyaamdu, o hokki ɓe ngel, o wi'i: “Jardugel nge'el ɗum alkawal kesal. Allah tabitiniri ngal bee ƴiiƴam am ndufaaɗam ngam mooɗon.

²¹Ammaa ndaa zammbotooɗo yam ɗon nyaamda bee am haa ɗo.

²²Fakat, Ɓii-neɗɗo maayan bana no Allah tabitiniri ɗum, ammaa bone laatanto neɗɗo zammbotooɗo mo!

²³Ɓe puɗɗi ƴamƴamtirgo, moy caka maɓɓe tammiiɗo waɗugo ɗum”.

²⁴Ngaaba ummi hakkunde nelaaɓe dow moy caka maɓɓe tammiiɗo laataago mawɗo, ɓurduɗo.

²⁵Yeesu wi'i ɓe: “Laamiiɓe ummaatooje ɗon laamano ɗe, marɓe baawɗe dow maɓɓe boo ɗon ewno ko'e muuɗum'en saahiiɓe.

²⁶Ammaa ngam mooɗon kam, naa bana non. Mo ɓurdi maŋngu caka mooɗon laato mo ɓurdi famɗugo, mo ɗon laamo boo laato bana jaggiiɗo.

²⁷Moy ɓurdi maŋngu, jooɗiiɗo ɗon nyaama naa malla jagganoowo mo? Naa jooɗiiɗo ɗon nyaama na? Ammaa min, mi ɗon caka mooɗon bana jaggoowo.

²⁸Onon ngoni wonduɓe bee am tum nder jarribooje am.

²⁹Mi hokki on laamu bana Baabiraawo am hokkiri yam.

³⁰Nden on nyaaman, on njaran haa nyaamrude am nder laamu am, on njooɗoto dow leese laamu ngam hiitaago le'i Isra'iila sappo e ɗiɗi.”

³¹Jawmiraawo wi'i: “Simon! Simon! Sayɗaanu ƴami duŋayeere ngam dimmbugo on, jaartugo on bana ɓe njaartirta alkamaari ngam senndugo ndi bee nyaande.

³²Ammaa mi torake ngam maaɗa, ngam taa nuɗɗinki ma tampa. An, to a tuubi, semmbiɗin deerɗiraaɓe ma.”

³³Piyer wi'i mo: “Jawmiraawo, mi ɗon taaski yahugo bee ma, koo haa fursina[27], koo haa maayde boo.”

³⁴Yeesu wi'i: “Piyer, mi ɗon wi'e, hannde hiddeko asgumri[28] u'a, a wi'an nde tati a anndaa yam.”

³⁵Yeesu wi'i ɓe fahin: “Nde mi nelno on bilaa booro ceede, bilaa booro njooɓaari, bilaa paɗe, woodi ko on cooyino na?” Ɓe njaabi mo: “Walaa koo ɗume min cooyi.”

³⁶O wi'i ɓe: “Ammaa jonta naa non. Marɗo booro ceede hoo'a ngo, marɗo booro njooɓaari boo hoo'a ngo. Mo maraay kaafahi, soorra limce muuɗum, sooda kaafahi.

³⁷Ngam mi ɗon wi'a on, sey binndaaɗum dow am gooŋɗa: O limaama caka halluɓe. Ngam ko waajibi dow am ɗon laato.”

³⁸Ɓe mbi'i: “Jawmiraawo, ndaa kaafaaje ɗiɗi.” O wi'i ɓe: “Ɗum he'i.”

³⁹Nden Yeesu wurti, o dilli haa Hooseere Jaytunje bana no o woowi. Pukara'en maako tokki mo.

⁴⁰Nde o yotti nokkuure man, o wi'i ɓe: “Tore Allah ngam taa on ndo'o nder jarribeeki.”

⁴¹Nden o daayti ɓe baakin sakkinannde hayre, o tuggi koppi, o waɗi do'a,

⁴²o wi'i: “Baabiraawo, to a muuyi, ittanam jardugel torra nge'el. Ammaa taa waɗ ko muuyo am yiɗi, sey ko ngo ma yiɗi.”

⁴³Nden malaa'ikaajo waŋgani mo diga asama ngam semmbiɗingo mo.

⁴⁴Nde ɗum suni mo masin, o waɗi do'a bee tiinaare, wulweende maako laati bana toɓɓe ƴiiƴam dow lesdi.

⁴⁵Ɓaawo waɗugo do'a, o ummi, o lorti haa pukara'en, o tawi ɓe ɗaani ngam comri suno.

⁴⁶O wi'i ɓe: “Ngam ɗume ɗaanotooɗon? Umme, tore ngam taa on nasta jarribeeki!”

⁴⁷Nde Yeesu ɗon wolwa tawon, yimɓe ngari. Bi'eteeɗo Yahuuda, gooto nder sappo e ɗiɗo go ɗon ardi ɓe. O ɓaditi Yeesu ngam o hebbo ɗum.

⁴⁸Yeesu wi'i mo: “Yahuuda, bee kebbaaki zammbortooɗa Ɓii-neɗɗo na?”

⁴⁹Nde wonduɓe bee Yeesu ngi'i ko tammi laataago, ɓe mbi'i: “Jawmiraawo, min coppa ɓe bee kaafahi na?”

⁵⁰Gooto maɓɓe soppi suka hooreejo liman'en, ta'i mo nofru nyaamru.

⁵¹Ammaa Yeesu wi'i: “Acce ɗum!” O meemi nofru gorko go, o yamɗitini mo.

⁵²Ɓaawoɗon Yeesu wi'i mawɓe liman'en e mawɓe aynooɓe haykaliiru e ndotti'en warɓe naŋngugo mo: “Koni on ngari bee kaafaaje e cabbi ngam naŋngugo yam bana mi pasoowo?

⁵³Nyalɗe fuu mi ɗonno bee mooɗon nder haykaliiru, on naŋngaay yam. Ammaa jonta ɗum saa'iire mooɗon e baawɗe nyiɓre.”

⁵⁴Ɓe naŋngi Yeesu, ɓe njahri mo haa saare hooreejo liman'en. Piyer ɗonno tokki ɓe daayiiɗum.

⁵⁵Ɓe kuɓɓi yiite caka daldal saare, ɓe fuu ɓe njooɗodi. Piyer boo jooɗi caka maɓɓe.

⁵⁶Paanyo debbo, korɗo nder saare man yi'i o ɗon jooɗi kommbi yiite, laari mo, wi'i: “Gorko oo boo ɗonno wondi bee maako.”

⁵⁷Ammaa Piyer yeddi ɗum, wi'i: “Kay debbo, mi anndaa mo sam.”

⁵⁸Ɓaawo seɗɗa goɗɗo feere boo yi'i mo, wi'i: “An boo, a gooto maɓɓe.” O wi'i: “Kay! Gorko, mi wonaay nder maɓɓe.”

⁵⁹Ɓaawo saa'iire woore goɗɗo feere tabitini haala man, wi'i: “Fakat gorko oo ɗonno wondi bee maako, o Galiiliijo maa!”

⁶⁰Piyer jaabi: “Gorko, mi anndaa ko ngiɗɗa wi'go.” Diga o timminaay wolwugo, asgumri[29] u'i.

⁶¹Jawmiraawo yeesiti, laari Piyer. Nden Piyer siftori ko Jawmiraawo wi'no mo: “Hiddeko asgumri u'a hannde, a wi'an nde tati a anndaa yam.”

⁶²Piyer wurti haa yaasi, woyi masin.

⁶³Yimɓe aynooɓe Yeesu njanci mo, ɓe piyi mo.

⁶⁴Ɓe cuddi gite maako, ɓe ƴami: “Heɓtu, moy fiyi ma?”

⁶⁵Ɓe mbolwani mo bolle kuɗooje goɗɗe ɗuuɗɗe.

⁶⁶Nde weeti, ndotti'en Yahuudu'en e mawɓe liman'en e moodiɓɓe tawreeta mooɓtotiri, ɓe ngaddi Yeesu haa dawriinde maɓɓe.

⁶⁷Ɓe mbi'i: “To an woni Almasiihu, wi' min.” Yeesu jaabi ɓe: “To mi wi'i on ɗum, on nuɗɗintaa.

⁶⁸To mi ƴami on boo on njaabataako.

⁶⁹Yeeso ɗo Ɓii-neɗɗo jooɗoto haa nyaamo Allah Baawɗo.”

⁷⁰Ɓe fuu ɓe mbi'i: “An kam a Ɓiɗɗo Allah na?” O jaabi ɓe: “Nonnon bana on mbi'i.”

⁷¹Nden ɓe mbi'i: “En ngoodi haaje seedamku fahin na? Enen bee ko'e meeɗen en nani ɗum diga hunnduko maako!”