Read Fulfulded Luka 23 Bible Online

Luka 23 - Fulfulded bible

Luka 23

¹Ɓe ummodi ɓe fuu, ɓe njahri Yeesu haa Pilaatu.

²Ɓe puɗɗi wullaago mo, ɓe mbi'i: “Min tawi gorko oo ɗon ummina tuurtol caka ummaatoore amin, o ɗon haɗa yimɓe yoɓugo garaama haa Kaysara, o ɗon wi'a boo kaŋko woni Almasiihu, laamiiɗo.”

³Pilaatu ƴami mo bana ni'i: “An woni laamiiɗo Yahuudu'en na?” Yeesu jaabi mo: “Nonnon bana mbi'ɗa.”

⁴Pilaatu wi'i mawɓe liman'en e mooɓre fuu: “Mi tawaay koo ɗume haa gorko oo ngam hiitaago mo.”

⁵Ammaa ɓe tiinani wi'ugo: “O ɗon tuurtina ummaatoore bee waazingo nder lesdi Yahuuda diga Galiili, haa yotti haa ɗo.”

⁶Nde Pilaatu nani ɗum, o ƴami to gorko oo o Galiiliijo.

⁷Nde o nani Yeesu iwi haa maral laamu Hirudus, o neldi mo haa Hirudus, ngam nyalɗe man Hirudus ɗonno haa Urusaliima.

⁸Nde Hirudus yi'i Yeesu, o seyi seyo maŋngo, ngam duuri o yiɗno yi'ugo mo, ngam o nani ko ɓe mbi'no dow maako, o tammi o yi'anno Yeesu waɗan alaama kaayeefiiha feere.

⁹O ƴami mo ƴamɗe ɗuuɗɗe, ammaa Yeesu jaabaaki mo koo ɗume.

¹⁰Mawɓe liman'en e moodiɓɓe tawreeta ɗonno ton. Ɓe ngulli mo bee semmbe.

¹¹Hirudus e sooje'en muuɗum njanci mo e ɓe njawi mo. Ɓe ɓorni mo mojaare ɗelkannde, ɓe lorni mo haa Pilaatu.

¹²Nyannde man nden Hirudus e Pilaatu coobiri, ngam aran ɓe narrataano.

¹³Pilaatu mooɓti mawɓe liman'en e mawɓe yimɓe e yimɓe fuu.

¹⁴O wi'i ɓe: “On ngaddani yam goɗɗo oo bee wi'go o ɗon ummina tuurtol caka ummaatoore. Ndaa, mi ƴami mo yeeso mooɗon, mi tawaay aybewol haa maako nder ko ngullirɗon mo.

¹⁵Hirudus boo tawaay, ngam o lorni mo haa meeɗen. Gorko oo waɗaay koo ɗume ko he'i mbarugo mo.

¹⁶Ngam maajum mi ɓoccan mo, mi yoofan mo.”

¹⁷Ngam kala juulde Paska fuu, doole Pilaatu yoofana ɓe fursinaajo[30] gooto.

¹⁸Ɓe puɗɗi wookugo bee semmbe, ɓe fuu: “Mbar gorko oo! Yoofan min Barabbas!”

¹⁹Gorko oo nastinaama fursina ngam fitina feere nder berniwol e ngam daliila mbar-hoore boo.

²⁰Pilaatu wolwani ɓe fahin ngam o yiɗi yoofugo Yeesu.

²¹Ɓe kooli bee sawtu: “Ɓil mo haa leggal gaafaaŋgal! Ɓil mo!”

²²Pilaatu wi'i ɓe nde tataɓre: “Aybe ɗume o waɗi? Mi tawaay aybe haa maako ko he'i mbareego sam. Mi ɓoccan mo, nden mi yoofa mo.”

²³Ammaa ɓe tiinani ɗum, ɓe mbaɗi hoolo maŋngo, ɓe ngiɗi o ɓile haa leggal gaafaaŋgal. Hoolo maɓɓe jaali mo.

²⁴Pilaatu yerdi waɗango ɓe ko ɓe ƴami.

²⁵O yoofi nastinaaɗo fursina ngam fitina e mbar-hoore, mo ɓe ƴami go, o hokki ɓe Yeesu haa ɓe mbaɗa mo ɗum ko ɓe ngiɗi fuu.

²⁶Nde ɓe ɗon njahra Yeesu, ɓe potti bee Simon, goɗɗo Sirene, ɗonno warta ladde. Ɓe naŋngi mo, ɓe ndoondi mo gaafaaŋgal haa o tokko Yeesu ɓaawo.

²⁷Mooɓre ɗuuɗnde tokki mo. Rewɓe piyi biɓɓe muuɗum'en, mboyi mo.

²⁸Yeesu yeesiti gal maɓɓe, wi'i: “Rewɓe Urusaliima, taa mboye ngam am. Ammaa mboyane ko'e mon e ɓiɓɓe mooɗon.

²⁹Ngam ndaa, nyalɗe ngaran ɗe ɓe mbi'an: Seyo laatani rewɓe rimarɓe, ɓen meeɗaay danyugo e musiningo.

³⁰Nden yimɓe mbi'an kooseeje: Ndo'e dow amin! Ɓe mbi'an towndiije boo: Cudde min!

³¹Ngam to ɓe ngaɗani leggal keccal bana nii, noy ɗum laatorto ngam joorŋgal boo?”

³²Ɓe njahri worɓe halluɓe ɗiɗo, ngam haa ɓe mbarda ɓe bee Yeesu.

³³Nde ɓe njotti haa nokkuure wi'eteende Gumbal-hoore, ɓe ɓili mo ton, bee halluɓe ɗiɗo go fuu, gooto haa nyaamo, gooto boo haa nano.

³⁴Yeesu wi'i: “Baabiraawo, yaafa ɓe, ngam ɓe anndaa ko ɓe mbaɗata.” Ɓe cenndi limce maako hakkunde maɓɓe bee fiyugo caaca.

³⁵Ummaatoore ɗonno ndari ton, laara. Mawɓe Yahuudu'en njanci mo, ɓe mbi'i: “O hisni woɗɓe, o hisna hoore maako boo kadi, to o Almasiihu, mo Allah, cuɓaaɗo!”

³⁶Sooje'en boo njanci mo, ɓe ɓaditi mo, ɓe ndokki mo lammuɗam,

³⁷ɓe mbi'i: “To a laamiiɗo Yahuudu'en kam, hisnu hoore ma kadi!”

³⁸Ɓe mbinndi haa dow leggal gaafaaŋgal ngal ɓe ɓili mo: “Oo woni laamiiɗo Yahuudu'en.”

³⁹Gooto nder halluɓe ɓildaaɓe bee maako go, huɗi mo, wi'i: “Naa an woni Almasiihu na? Hisnu hoore ma an e minin boo!”

⁴⁰Ammaa ɗiɗaɓo feli mo, wi'i: “A hulataa Allah na? An, a kiitaaɗo boo.

⁴¹Ngam meeɗen kam kiita ka foti deydey kuuɗe meeɗen, ammaa kaŋko walaa halleende nde o waɗi.”

⁴²Nden o wi'i: “Yeesu, siftoram saa'i ngarata nder laamu maaɗa.”

⁴³Yeesu jaabi mo: “Gooŋga mbi'anmaami, hannde a wondan bee am nder aljanna.”

⁴⁴Yaake man ɗum caka nyalawma, nden nyiɓre waɗi dow lesdi fuu haa yotti saa'a tati. Naaŋge moji. Wiirndallo nder haykaliiru seeki caka cak.

⁴⁵

⁴⁶Yeesu towni sawtu bee semmbe, wi'i: “Yaa Baabiraawo, mi ɗon halfina ruuhu am nder juŋngo maaɗa.” Ɓaawo nde o wolwi bolle ɗe'e, o maayi.

⁴⁷Nde ardiiɗo dow sooje'en Roma teemerre yi'i ko laati, o teddini Allah, o wi'i: “Fakat, gorko oo o adiliijo.”

⁴⁸Yimɓe warnooɓe laarugo fuu, nde ɓe ngi'i ko laati, ɓe kuuci, ɓe ɗon piya biɓɓe maɓɓe[31].

⁴⁹Soobiraaɓe maako fuu e rewɓe tokkinooɓe mo diga Galiili, ndari daayiiɗum, ɗon ndaara kuuje ɗe'e.

⁵⁰Woodi goɗɗo bi'eteeɗo Yusufu, mo berniwol lesdi Yahuuda, bi'eteeŋgol Arimate. O booɗɗo, adiliijo. O ɗonno reena garoyki laamu Allah. O ɗon caka dawrooɓe, ammaa o hawtanaay woɗɓe nder dabare e kuuɗe maɓɓe.

⁵¹

⁵²O yehi haa Pilaatu, o ƴami ɗum ɓanndu Yeesu.

⁵³O jippini ndu diga gaafaaŋgal, o hasni ndu bee kasa kesa, nden o wallini ndu nder yenaande wasaande nder tapaare, nde goɗɗo meeɗaay wallineego nder muuɗum.

⁵⁴Ɗum nyannde taaskara siwtorde. Nde ɓadino nastugo.

⁵⁵Rewɓe wardunooɓe bee Yeesu diga Galiili, njahdi bee Yusufu, ɓe ndaari yenaande e bana noy ɓanndu Yeesu wallinira.

⁵⁶Ɓe lori, ɓe taaskitini leɗɗe uurɗe e uurdi. Nden ɓe ciwti nyannde siwtorde fodde tawreeta.