Read Fulfulded Tooktaaki Tawreeta 1 Bible Online

Tooktaaki Tawreeta 1 - Fulfulded bible

Tooktaaki Tawreeta 1

¹Ndaa bolle ɗe Muusa wolwani Isra'iila'en fuu haa fuunaaŋge maayo Urdun nder ladde haa Araba yeeso Suuf hakkunde Paran e Tofol e Laban e Haserot e Dizahab.

²Jahaaŋgal diga hooseere Horeb haa Kaades-Barne'a gal laawol jahranŋgol haa lesdi kooseeje Se'ir, waɗi nyalɗe sappo e go'o.

³Nder nduuɓu cappanɗe nayaɓru ɓaawo gurtaaki maɓɓe lesdi Misra, lewru sappo e go'ooru, nyannde go'oore maaru, Muusa yecci Isra'iila'en ko Jawmiraawo umri mo wi'ugo ɓe fuu.

⁴Ɗum laati ɓaawo Jawmiraawo jaali Sihon, laamiiɗo Amoori'en mo jooɗino nder berniwol Hesbon e Ook e laamiiɗo Baasan mo jooɗino nder berniiji Astarot e Edirey.

⁵Haa fuunaaŋge maayo Urdun, nder lesdi Mo'ab, Muusa fuɗɗi faamtingo ɓe tawreeta ka'a. O wi'i:

⁶“Saa'i en ɗonno haa hooseere Sina, Jawmiraawo, Allah meeɗen wi'i en: Faɓɓugo mooɗon haa hooseere nde'e he'i.

⁷Umme, lorte dow laawol mon. Njehe haa lesdi kooseeje Amoori'en e haa heeddiɗɗiraaɓe maɓɓe fuu, haa Araba dow kooseeje e haa lesdi leesndi e haa Lesdi Fombina e haa sera mbeela, lesdi Kanaani'en e Libanon haa on njotto maayo maŋngo ngo Efratis.

⁸Ndaare, mi jo'ini lesdi ndi'i yeeso mooɗon. Njehe kooce mare ndi, ɗum lesdi ndi min, Jawmiraawo, mi huni mi hokkan kaakiraaɓe mooɗon Ibrahiima e Isiyaaku e Yaakubu e danygol maɓɓe ɓaawo maɓɓe!”

⁹Muusa wi'i: “Saa'i man mi wi'i on: Mi waawataa ɗowugo on feere am.

¹⁰Jawmiraawo, Allah mooɗon ɗuɗɗini on, hannde on ɗuuɗɓe bana koode asama.

¹¹Jawmiraawo, Allah kaakiraaɓe mooɗon ɓesda ɗuɗɗingo on nde ujineere, o barkiɗina on fodde alkawal maako bee mooɗon.

¹²Ammaa bana noy mi waawrata roondaago saklere e doŋgle e haala kiita mooɗon feere am?

¹³Koo'e worɓe hakkilɓe e marɓe faamu, anndaaɓe nder le'i mon, mi darna ɓe hoore'en dow mooɗon.

¹⁴On njaabi yam, on mbi'i: Wolde nde a wolwi wooɗi masin.

¹⁵Mi hoo'i hoore'en le'i mooɗon, worɓe hakkilɓe e anndaaɓe, mi darni ɓe hoore'en dow mooɗon: Hoore'en dow yimɓe ujineere, hoore'en dow yimɓe teemerre, hoore'en dow yimɓe cappanɗe njowo e hoore'en dow yimɓe sappo. Mi darni boo kaliifa'en ngam le'i mooɗon.

¹⁶Saa'i man mi umri hiitooɓe on. Mi wi'i ɓe: Nane haala jokkirli hakkunde banndiraaɓe mon. Mbaɗane ɓe kiita ngooŋɗuka, hakkunde goɗɗo bee deerɗum malla bee jananno gonduɗo bee muuɗum.

¹⁷Taa cenndindire yimɓe yeeso kiita, nane haala pamaro e mawɗo fuu. Taa kule goɗɗo, ngam kiita ka mbaɗoton, ɗum kiita Allah. To woodi ko salori on, ngadde ɗum yeeso am mi nana.

¹⁸Saa'i man mi hokki on umrooje dow kuuje ɗe mbaɗoton fuu.”

¹⁹En ummi Horeb en nganci ladde mawnde hulniinde nde'e fuu, en njehi lesdi kooseeje Amoori'en. Bana no Jawmiraawo, Allah meeɗen umri en, en njotti Kaades-Barne'a,

²⁰mi wi'i on: On njottake lesdi kooseeje Amoori'en ndi Jawmiraawo Allah meeɗen hokkata en.

²¹Ndaare lesdi ndi Jawmiraawo, Allah kaakiraaɓe mon hokkata on. Njehe, nyaame ndi bana o umri on. Taa kule, taa kultore sam!

²²Ammaa onon fuu on ɓaditi yam, on mbi'i: Sey nelen woɗɓe yeeso meeɗen, ɓe kora lesdi, ɓe anndina en laawol ngole nastirten ndi e berniiji haa njahten.

²³Haala man fottani yam. Ngam maajum cuɓmi worɓe sappo e ɗiɗo caka mooɗon, gooto nder lenyol koo ngole fuu.

²⁴Ɓe nasti lesdi kooseeje, ɓe kori ndi haa yotti waadiwol Eskol.

²⁵Ɓe koo'i ɓiɓɓe leɗɗe goɗɗe ton, ɓe ngaddi ɗe haa meeɗen. Ɓe ngecci en: Lesdi ndi Jawmiraawo, Allah meeɗen tammi hokkugo en, ndi wooɗi.

²⁶Ammaa on ngiɗaano nastugo ndi, on tuurtani umroore Jawmiraawo, Allah mooɗon.

²⁷On ngurŋgurti nder laymaaji mon, on mbi'i: Jawmiraawo ɗon wanya en. Ngam maajum o wurtini en Misra, haa en maaya nder juuɗe Amoori'en, ɓe nattina en.

²⁸Toy njahten? Banndiraaɓe meeɗen nelaaɓe tampini en bee wi'ugo: Yimɓe ummaatoore nde'e ɓurdi en ɗuuɗeeŋga e semmbe. Berniiji maɓɓe mawni, mahi maaji towi haa njotti asama. Ɓe ngi'i Enaki'en, waato maapinndi'en boo.

²⁹Min mi wi'i on: “Taa ndiwne, taa kule yimɓe ɓe'e!

³⁰Jawmiraawo, Allah mooɗon ardoto on. Kaŋko o haɓan ngam mooɗon bana on ngi'i o waɗi on haa Misra.

³¹Haa ladde boo, on ngi'i Jawmiraawo, Allah maaɗa efti ma bana baaba eftirta ɓiŋngel mum dow laawol ngol on tokki fuu haa on njotti nokkuure nde'e.

³²Bee man fuu on koolaaki Jawmiraawo, Allah mooɗon[1],

³³ardiiɗo on foroy ngam o laarana on nokkuure saŋngeere. Bee jemma o ardi on nder yiite yaynanŋge dow laawol mon, nyalawma boo nder ruulde nanndunde bee daŋraŋgal.”

³⁴“Jawmiraawo nani haala mon ka'a, o tikki. O huni hunayeere, o wi'i:

³⁵Fakat walaa koo gooto nder yimɓe yidere hallunde nde'e yi'ata lesdi mboondi ndi kuniimi hokkugo kaakiraaɓe mooɗon[2].

³⁶Sey Kaaleb ɓii Yefunna tan yi'ata ndi. Haa maako e danygol maako ndokkanmi lesdi ndi o hori, ngam o tokki yam bee hoolaare.

³⁷Koo min boo, Jawmiraawo tikkani yam daliila mooɗon, o wi'i: An Muusa boo a yi'ataa lesdi man.

³⁸Ammaa suka ma Yosuwa ɓii Nuuna nastan ndi. Semmbiɗin mo, ngam kaŋko o senndanan ndi Isra'iila ngam maral.

³⁹Ɓikkoy mon koy anndaa senndindirgo booɗɗum bee kalluɗum tawon, koy mbi'ɗon konne'en njaɓtan koy, kaŋkoy koy nastan lesdi. Mi hokkan koy ndi, koy maran ndi.

⁴⁰Ammaa onon, ngaylite ɓaawo, lore nder ladde yahugo maayo Maliya.”

⁴¹“On njaabi, on mbi'i yam: Min mbaɗi hakke dow Jawmiraawo. Ammaa jonta min njahan haɓoygo, bana Jawmiraawo umri min. Nden koo moy mooɗon taaskani haɓre, on ndaari bana wa'aago kooseeje ɗum koyɗum.

⁴²Ammaa Jawmiraawo wi'i yam: Reentin[3] ɓe, taa ɓe nasta haɓre, ngam mi wondataa bee maɓɓe, konne'en maɓɓe njaaloto ɓe.

⁴³Mi yecci on ɗum, ammaa on cali ɗowtanaago umroore Jawmiraawo. On tuurtani mo, on mawniti, on njehi haa lesdi kooseeje.

⁴⁴Nden Amoori'en jooɗiiɓe ton ngurti bana nyaaki ngam fottugo bee mooɗon, ɓe taasni on, ɓe torri on diga Se'ir haa yotti Horma.

⁴⁵On lori on mboyi yeeso Jawmiraawo ngam tefugo ballal, ammaa o nananaay on, o hakkilanaay on.

⁴⁶Kanjum waɗi on njooɗi haa Kaades haa neeɓi masin.”