Read Fulfulded Tooktaaki Tawreeta 11 Bible Online

Tooktaaki Tawreeta 11 - Fulfulded bible

Tooktaaki Tawreeta 11

¹“Ngiɗe Jawmiraawo, Allah mooɗon, ɗowtane seedamkuuji maako e farillaaji maako e umrooje maako nde weeti fuu.

²Paame hannde ko Jawmiraawo ekkitini on. Ɓikkoy mooɗon anndaa ɗum, ngi'aay ɗum. Ammaa onon on ekkiti ɗum, on ngi'i maŋngu maako e juŋngo maako semmbiɗŋgo fortaaŋgo.

³On ngi'i kaayeefiiji maako ɗi o waɗi nder lesdi Misra e dow Firawna, laamiiɗo Misra e lesdi muuɗum fuu.

⁴On ngi'i no Jawmiraawo nattiniri jama'aare konu Misra'en fuu, hawtaade bee pucci maɓɓe e mootaaji pucci maɓɓe, no o wartiri ndiyamji maayo Maliya dow maɓɓe, saa'i ɓe ɗon tokko on, o halki ɓe haa foroy.

⁵On anndi ko o waɗani on nder ladde haa on njotti nokkuure nde'e.

⁶Ciftore ko o waɗi bee Datan e Abiram, ɓiɓɓe Eliyabu ɓe lenyol Ruben. Lesdi maɓɓiti hunnduko mum, moɗi ɓe caka Isra'iila'en, kamɓe e yimɓe ci'e[12] maɓɓe e cuuɗi maɓɓe e dabbaaji maɓɓe fuu.

⁷Gite mon ngi'i kuuɗe Jawmiraawo mawɗe ɗe'e fuu.”

⁸“Ngam man ɗowtane umrooje ɗe umranmi on hannde fuu. Nden kam on cemmbiɗan, on nastan lesdi ndi njahoton marugo ndi.

⁹Ngam haa balɗe mooɗon njuuta nder lesdi ndi Jawmiraawo huni hokkugo kaakiraaɓe mon, kamɓe e danygol maɓɓe. Ɗum lesdi keewndi kosam e njumri.

¹⁰Ngam lesdi ndi njahoton marugo ɗum, nanndaay bee lesdi Misra ndi ngurtiiɗon e muuɗum. Haa Misra, to on aawi gese mon, doole on njarna ɗe bee naawɗum bana jarne haako.

¹¹Ammaa lesdi ndi njahoton marugo ɗum, ndi woodi kooseeje e waadiiji, iyeele ɗon coofna ndi booɗɗum.

¹²Jawmiraawo, Allah mooɗon ɗon hakkilana ndi, gite maako ɗon kakkilana ndi tum diga fuɗɗoode hitaande haa timmoode maare.

¹³To on ɗowtanake umrooje ɗe umranmi on hannde, ngam yiɗugo Jawmiraawo, Allah mooɗon e njagganaago mo bee ɓerɗe mon e yoŋkiiji mooɗon fuu,

¹⁴nden kam o toɓnan iyeende dow lesdi mon nder wakkati maajum, iyeele arane e iyeele ragareeje fuu, haa on keɓa alkamaari e inaboojam e nebbam.

¹⁵Mi hokkan on boo huɗo ngam dabbaaji mon. Onon boo on nyaaman, on kaaran.

¹⁶Ndeente, taa goɗɗo esta on on loro, on acca Jawmiraawo, on tokko ɗowanteeɓe woɗɓe, on cujidana ɓe.

¹⁷To on mbaɗi irin ɗu'um, tikkere Jawmiraawo saatan dow mooɗon. O haɗan asama toɓnugo iyeende. Lesdi yooran, walaa ko fuɗata. Onon boo on maayan law nder lesdi mboondi ndi Jawmiraawo hokkata on.

¹⁸Njoge umrooje ɗe'e nder ɓerɗe mooɗon e hakkiilooji mon. Kaɓɓe ɗe haa juuɗe mon bana alaama, ɗe laato bana maandorɗe haa tiiɗe mooɗon.

¹⁹Ekkitine ɗe ɓikkoy mooɗon, mbolwe ɗe saa'i on ɗon njooɗi haa saare, koo on ɗon njaha dow laawol, koo on ɗon mbaalo, koo on ɗon ummo.

²⁰Mbinnde ɗe dow leɗɗe darduɗe haa dammuɗe cuuɗi mon e dow pareeje berniwol mooɗon.

²¹Nden kam balɗe mon e balɗe ɓikkoy mooɗon njuutan nder lesdi ndi Jawmiraawo, Allah mooɗon hunani kaakiraaɓe mooɗon o hokkan ɓe ndi. Bana asama tabitiri haa dow duniyaaru, onon boo on tabitan nder lesdi mon.

²²Fakat, to on kakkilani umrooje ɗe umranmi on ɗe'e fuu, to on ɗowtanake ɗe bee yiɗugo Jawmiraawo, Allah mooɗon, bee tokkaago laabi maako e bee ɗakkotirgo bee maako,

²³nden kam Jawmiraawo riiwan ummaatooje go fuu yeeso mooɗon. On nyaaman lesdi ummaatooje ɓurduɗe on ɗuuɗeeŋga e semmbe.

²⁴Lesdi ndi kosɗe mooɗon njaaɓata fuu, on maran ndi, diga ladde fombina haa yotto hooseere Libanon haa woyla, diga maayo Efratis haa fuunaaŋge haa yotto Mbeela haa hiirnaaŋge.

²⁵Walaa mo dartoto yeeso mooɗon. Jawmiraawo, Allah mooɗon waɗan kultoreeŋgol dow yimɓe lesdi man fuu haa ɓe kula on, bana o wi'i on.

²⁶Ndaa mi ɗon jo'ina hannde yeeso mooɗon barka e naaloore. Cuɓe!

²⁷Barka laatanto on, to on ɗowtanake umrooje Jawmiraawo Allah ɗe umranmi on hannde.

²⁸Ammaa naaloore laatanto on, to on ɗowtanaaki umrooje Jawmiraawo, Allah mooɗon ɗe'e, to on celi laawol ngol umranmi on hannde, ngam on tokko ɗowanteeɓe jananɓe.

²⁹Jawmiraawo, Allah mooɗon yottinan on nder lesdi ndi njahoton maroygo ɗum. To on njottake ton, sey on ngooyna barka haa hooseere Gerisiima, naaloore boo haa hooseere Ebal.

³⁰Kooseeje ɗiɗi ɗe'e ɗon haa hiirnaaŋge maayo Urdun, nder lesdi Kanaani'en jooɗiiɓe nder lesdi leesndi. Ɗe ɗon haa laawol yahugo hiirnaaŋge, ɓadiiɗum bee leɗɗe mawɗe bi'eteeɗe More, daayaaki bee wuro Gilgal.

³¹On ɓadake eeraago Urdun ngam on nasta lesdi ndi Jawmiraawo, Allah mooɗon hokkata on. On maran ndi, on njooɗoto ton.

³²Kakkile haa on ɗowtano farillaaji e kiitaaji fuu ɗi umranmi on hannde.”