Read Fulfulded Tooktaaki Tawreeta 15 Bible Online

Tooktaaki Tawreeta 15 - Fulfulded bible

Tooktaaki Tawreeta 15

¹Haa timmoode duuɓi joweeɗiɗi fuu, on njaafana hoo'uɓe nyamaale haa mooɗon.

²Ndaa nii mbaaroton hitaande man: Koo moy tokkiiɗo Isra'iilaajo keeddiɗɗum nyamaande fuu, sey o yaafano mo nde, taa o doola keeddiɗɗum e deerɗum yoɓugo ngam Jawmiraawo bee hoore mum umri wooynaandu dimɗinki ki'i.

³On njaawnan jananno haa o hokkita on nyamaande, ammaa keeddiɗɗiraawo mon e deerɗiraawo mon, njaafane ɓe.

⁴Jawmiraawo, Allah mooɗon barkiɗinan on nder lesdi ndi o marnata on. Talakaajo laatataako caka mooɗon,

⁵to on nanani Jawmiraawo, Allah mooɗon, to on kakkilani umrooje fuu ɗe umranmi on hannde, to on ɗowtani ɗe.

⁶Ngam Jawmiraawo, Allah mooɗon barkiɗini on bana o wi'i. On ndokkan ummaatooje ɗuuɗɗe nyamaale, ammaa onon on ɗaɓɓataa nyamaale. On laamanto ummaatooje ɗuuɗɗe, ammaa walaa ummaatoore laamanto on.

⁷To Isra'iilaajo talkiɗi haa berniwol koo ngole nder lesdi ndi Jawmiraawo, Allah mooɗon hokkata on, taa caatine ko'e mon, taa tamnde juuɗe mon yeeso Isra'iilaajo deerɗiraawo mooɗon.

⁸Ammaa mbeeɗane mo juuɗe mon, ndokke mo nyamaande deydey haaje maako.

⁹Kakkilane ko'e mooɗon, taa numooji meereeji ummo nder ɓerɗe mon, on mbi'a: Aa'a, hitaande joweeɗiɗawre ɓadake, ɗum hitaande dimɗinki. To on calake hokkugo deerɗiraawo mon talakaajo nyamaande, o wulloto on yeeso Jawmiraawo, ɗum laatoto hakke dow mooɗon.

¹⁰Ndokke mo bee ɓernde saahiinde, naa mettunde. Ngam daliila maajum Jawmiraawo, Allah mooɗon barkiɗinan kuuɗe ɗe kuuwoton fuu.

¹¹Talaka'en njinnataa nder lesdi mon. Ngam maajum umranmi on: Ndokke deerɗiraaɓe mon laafuɓe e talaka'en nder lesdi mon bee caahaaki.

¹²To Isra'iilaajo, gorko malla debbo, soorri ma hoore mum, sey o huuwane duuɓi joweego. Nder nduuɓu njoweeɗiɗaɓru sey a yoofta mo o dilla o dimo.

¹³Saa'i njooftata mo o dilla, taa o wurto juŋngo meere.

¹⁴Hoo'an mo ɗuuɗɗum haa dammooji ma e alkamaari ma e inaboojam ma, haa ko keɓruɗa bee barka Jawmiraawo, Allah maaɗa fuu, ndokka mo ɗum caahu.

¹⁵Ciftore, onon boo, naane on laatino maccuɓe nder lesdi Misra, ammaa Jawmiraawo, Allah mooɗon rimɗini on. Ngam maajum umrumi on umroore nde'e hannde.

¹⁶“Ammaa to maccuɗo ma yiɗaa dillugo, ngam o yiɗi ma, an e saare ma, ngam o jooɗodi bee maaɗa jam,

¹⁷nden kam hoo'u tufirɗum, tuf nofru maako haa dammugal saare ma. Bana non o laatorto maccuɗo ma haa foroy. Waɗan korɗo ma boo bana non.

¹⁸Taa mimsita yooftugo jeyaaɗo ma, ngam o huuwani ma duuɓi joweego. Saman maajum fotan bee ngeenaari huuwooɓe ɗiɗo. To a huuwi bana non, Jawmiraawo, Allah maaɗa barkiɗinan kuuɗe ma fuu.”

¹⁹“Afi gorɗi haa dabbaaji mon e dammooji mon fuu on lii'ano ɗi Jawmiraawo, Allah mooɗon. Taa kuuwe kuugal koo ngale bee afi na'i mon, taa ta'e gaasa afi dammooji mon boo.

²⁰Nde hitaande yaalti fuu, onon e yimɓe ci'e[18] mon, nyaame ɗi yeeso Jawmiraawo, Allah mooɗon haa nokkuure nde o suɓata.

²¹Ammaa to aybe ɗon haa maaji, ɗi laƴan malla bumɗi, to aybewol maŋngol koo ngole ɗon haa maaji, taa lii'ane ɗi Jawmiraawo, Allah mooɗon.

²²Nyaame ɗi haa saare. Koo moy mooɗon nyaama ɗi, cenaaɗo bee mo senaaki, bana nyaamroton lelji e jabaaje.

²³Ammaa taa nyaame ƴiiƴam maaji, sey on ndufa ɗam haa lesdi bana ndiyam.”