Read Fulfulded Tooktaaki Tawreeta 18 Bible Online

Tooktaaki Tawreeta 18 - Fulfulded bible

Tooktaaki Tawreeta 18

¹“Lewi'en liman'en, koo lenyol Lewi fuu heɓataa geɗal lesdi nder Isra'iila. Ɓe nguura bee guleteeɗi e dokke ɗe ummaatoore lii'anto Jawmiraawo. Kanjum woni geɗal maɓɓe.

²Taa ɓe mara lesdi caka deerɗiraaɓe maɓɓe Isra'iila'en. Maral maɓɓe, ɗum Jawmiraawo bee hoore mum, bana ko o wi'i ɓe.

³To goɗɗo lii'anake Jawmiraawo ngaari malla ndammoowa, balawal e galaŋge e ndeera fuu liman'en jeyi.

⁴On ndokkan ɓe boo geɗal aartuŋgal haa alkamaari mon e inaboojam mon e nebbam mon e gaasa baali mon.

⁵Ngam Jawmiraawo, Allah mooɗon suɓi lenyol Lewi caka le'i mon fuu, haa ngol huuwana mo kuugal limanku haa foroy.

⁶Koo moy Lewiijo gonɗo haa berniwol koo ngole nder Isra'iila fuu yiɗi wurtaago ngol e wargo haa nokkuure nde Jawmiraawo suɓata,

⁷ngam jagganaago Jawmiraawo, Allah mum ton bana deerɗiraaɓe mum Lewi'en woɗɓe, darotooɓe ton yeeso Jawmiraawo,

⁸o soorra goɗɗum haa ndonŋgu baaba maako, o wuura bee saman coggu man, o heɓa boo geɗal nyaamdu bana liman'en woɗɓe.”

⁹To on nasti lesdi ndi Jawmiraawo, Allah mooɗon hokkata on, taa on tokko al'aadaaji nyidduɗi ɗi ummaatooje goɗɗe tokkoto ton.

¹⁰Taa goɗɗo caka mooɗon lii'o ɓiɗɗo mum gorko malla debbo guleteeɗo. Taa goɗɗo laato baɗoowo hatti malla daaroowo kuuje feere malla hiilaajo

¹¹malla ciiroowo malla carwotooɗo maayɓe malla carwotooɗo ruuhuuji goɗɗi.

¹²Kuuwanɗo kuuje ɗe'e o nyidduɗo haa Jawmiraawo, Allah mooɗon. Ngam daliila kuuje nyidduɗe ɗe'e, o ɗon riiwa ummaatooje ɗe'e yeeso mooɗon.

¹³Ammaa onon laate on timmuɓe yeeso Jawmiraawo, Allah mooɗon.

¹⁴Nden Muusa wi'i: “Ummaatooje ɗe nyaamoton lesdi muuɗum'en, ɗon nanana hiila'en e laarooɓe. Ammaa onon, Jawmiraawo, Allah mooɗon duŋanaaki on waɗugo irin maajum.

¹⁵Jawmiraawo umminanan on annabiijo nder mon bana am, goɗɗo caka deerɗiraaɓe mooɗon, kaŋko nananton.

¹⁶Nyalaade on mooɓi haa hooseere Horeb, on tori taa on nana sawtu Jawmiraawo, Allah mooɗon fahin, taa on meeta yi'ugo yiite maŋnge go boo, ngam taa on maaya.

¹⁷Jawmiraawo wi'i yam: Tornde maɓɓe fotti.

¹⁸Mi umminanan ɓe annabiijo bana maaɗa iwanɗo caka deerɗiraaɓe maɓɓe. Mi waɗan bolle am nder hunnduko maako, o wolwanan ɓe ko mi umri mo fuu.

¹⁹To goɗɗo salake ɗowtanaago ko annabiijo wolwi bee innde am, mi hiitoto mo.

²⁰Ammaa to annabiijo goɗɗo mawnitake, wolwi bee innde am bilaa umroore am, o mbareteeɗo. Annabiijo mo wolwi bee innde ɗowanteeɓe jananɓe boo, o mbareteeɗo.

²¹To on numi: Noy min anndirta wolde nde Jawmiraawo wolwaay ɗum?

²²To annabiijo wolwi bee innde Jawmiraawo, ko o wi'i man laataaki, nden kam naa ɗum wolde Jawmiraawo, annabiijo oo mawniti, wolwi meere. Taa kule mo.”