Read Fulfulded Tooktaaki Tawreeta 2 Bible Online

Tooktaaki Tawreeta 2 - Fulfulded bible

Tooktaaki Tawreeta 2

¹“Nden en ngayliti, en lori nder ladde dow laawol yahugo maayo Maliya, bana Jawmiraawo wi'no yam. En taari lesdi kooseeje Se'ir balɗe e balɗe.

²Nden Jawmiraawo wi'i yam:

³On paɓɓi taaraago hooseere nde'e, he'i. Jonta, njehe woyla.

⁴Umru yimɓe ummaatoore ni'i: On caaloto nder lesdi banndiraaɓe mooɗon danygol Isuwa jooɗiiɓe haa Se'ir. Ɓe kulan on, ammaa kakkile booɗɗum,

⁵taa on kaɓa bee maɓɓe. Ngam mi hokkataa on koo ɗume haa lesdi maɓɓe, koo peetum bana jaaɓrugal boo. Ngam mi hokki lesdi kooseeje Se'ir haa danygol Isuwa mara ndi.

⁶Coode nyaamdu e ndiyam haa maɓɓe bee ceede mooɗon.

⁷Ngam Jawmiraawo, Allah mooɗon barkiɗini on nder kuuɗe mon fuu. O hakkilani jahaale mon nder ladde mawnde nde'e. O wondi bee mooɗon duuɓi cappanɗe nayi ɗi'i fuu, on cooyaay koo ɗume.

⁸En caali daayiiɗum bee banndiraaɓe meeɗen ɓiɓɓe Isuwa jooɗiiɓe haa Se'ir dow laawol caalotooŋgol Araba e Elat e Esiyon-Geber, en lorti en tokki laawol ladde Mo'ab.

⁹Jawmiraawo wi'i yam: Taa kone Mo'abi'en, danygol Ludu, taa kaɓe bee maɓɓe. Mi marni ɓe berniwol Ar, mi hokkataa on koo ɗume haa lesdi maɓɓe.”

¹⁰Ɓooyma Emi'en njooɗino haa lesdi ndi'i, ɗum yimɓe ummaatoore mawnde e ɗuuɗnde, ɓe maapinndi'en bana Enaki'en.

¹¹Yimɓe ndaari ɓe bana Refa'en e bana Enaki'en boo. Ammaa Mo'abi'en ewni ɓe Emi'en.

¹²Haa Se'ir, Hoori'en njooɗino ɓooyma. Ammaa yimɓe danygol Isuwa ndiiwi ɓe, nattini ɓe, nden ɓe njooɗi haa nokkuure maɓɓe. Bana non Isra'iila'en boo kuuwri lesdi ndi Jawmiraawo hokki ɗum'en.

¹³Jawmiraawo umri, wi'i: Jonta umme, eere maayo Zeret, en eeri maayo Zeret.

¹⁴Wakkati gurtaaki meeɗen diga Kaades-Barne'a haa en eeri maayo Zeret, duuɓi cappanɗe tati e joweetati. Yidere waawɓe konu fuu maayno bana Jawmiraawo hunanino ɓe.

¹⁵Jawmiraawo honi ɓe haa o nattini ɓe fuu.

¹⁶Ɓaawo waawɓe konu ɓe'e maayi fuu,

¹⁷Jawmiraawo wi'i yam:

¹⁸“Hannde on caaloto keerol lesdi Mo'ab bee laawol berniwol Ar.

¹⁹On ɓadititto Ammooni'en, danygol Ludu. Taa kone ɓe, taa kaɓe bee maɓɓe, ngam mi hokkataa on maral haa lesdi Ammooni'en, ngam mi marni ndi ɓikkoy Ludu.”

²⁰Yimɓe ndaari lesdi ndi'i bana ɗum lesdi Refa'en jooɗinooɓe ton ɓooyma. Ammooni'en ewni ɓe Zamzumi'en.

²¹Ɓe mawɓe, ɗuuɗɓe, ɓe maapinndi'en bana Enaki'en. Ammaa Jawmiraawo nattini ɓe yeeso maɓɓe, ɓe kooci lesdi maɓɓe ɓe mari ndi, nden ɓe njooɗi haa nokkuure maɓɓe.

²²Bana non Jawmiraawo waɗno yimɓe danygol Isuwa, jooɗinooɓe haa Se'ir. O nattini Hoori'en yeeso maɓɓe, ɓe kooci lesdi maɓɓe ɓe mari ndi, nden ɓe njooɗi haa nokkuure maɓɓe haa wargo hannde.

²³Kaftori'en iwɓe duunde Kaftor boo nattini Awwi'en jooɗinooɓe nder gure fombina haa yotti Gaaza, ɓe njooɗi haa nokkuure maɓɓe.

²⁴Jawmiraawo wi'i: “Umme, eere maayo Arnon. Mi hokki on Sihon, laamiiɗo Hesbon e Amoni e lesdi maako haa maron ndi. Puɗɗe haɓugo bee maako.

²⁵Hannde puɗɗanmi hulnugo yimɓe ummaatooje koo toy nder duniyaaru fuu ngam daliila mooɗon. To ɓe nani habaru mon, ɓe ndiwnan ngam kulol.”

²⁶“Ɓaawo man nelmi nelaaɓe diga ladde Kedemot haa Sihon, laamiiɗo Hesbon, bee habaru salaama wi'ugo ni'i:

²⁷Mi saalorto laawol lesdi ma, mi tokkoto laawol maŋngol, mi selataa haa nyaamo koo haa nano.

²⁸Min njoɓan nyaamdu e ndiyam, haa min nyaama, min njara. Walaa ko min ngiɗi, sey saalaago tan,

²⁹haa min eero maayo Urdun, min nasta nder lesdi ndi Jawmiraawo, Allah amin hokkata min. Yimɓe danygol Isuwa, jooɗiiɓe haa lesdi kooseeje Se'ir e Mo'abi'en, jooɗiiɓe haa Ar, kamɓe boo ɓe nduŋani min saalaago lesdi maɓɓe bana non.

³⁰Ammaa Sihon, laamiiɗo Hesbon sali duŋanaago en en caalo lesdi muuɗum, ngam Jawmiraawo, Allah meeɗen saatini hoore e ɓernde maako, ngam o hokka en mo haa juuɗe men bana ko laati hannde.

³¹Nden Jawmiraawo wi'i yam: Ndaa, mi hokki on Sihon e lesdi muuɗum, nyaame lesdi maako, mare ndi.

³²Sihon wurti bee ummaatoore mum fuu ngam haɓugo bee meeɗen haa Yahas.

³³Jawmiraawo, Allah meeɗen hokki en mo, en njaali mo, kaŋko bee ɓikkoy maako e ummaatoore maako fuu.

³⁴Wakkati man en nyaami berniiji maako fuu, en kalki ɗi, en nattini jooɗiiɓe ton fuu, worɓe e rewɓe e ɓikkoy. Walaa koo gooto mo en acci daɗi.

³⁵En kooci dabbaaji e kuuje gonɗe nder berniiji.

³⁶Jawmiraawo, Allah meeɗen hokki en berniiji fuu, diga Aro'er haa sera waadiwol Arnon e berniwol nder waadiwol man, haa yotti lesdi Gile'at. Walaa berniwol bee mahi mum towɗi salori en.

³⁷Ammaa en ɓaditaaki lesdi Ammooni'en, koo fomoonde maayo Yabbok e berniiji lesdi dow kooseeje, ngam Jawmiraawo, Allah meeɗen haɗi en yahugo ton.”