Read Fulfulded Tooktaaki Tawreeta 21 Bible Online

Tooktaaki Tawreeta 21 - Fulfulded bible

Tooktaaki Tawreeta 21

¹“To on ngi'i mbaraaɗo baaliiɗo yaasi berniwol nder lesdi ndi Jawmiraawo, Allah mooɗon marnata on, ammaa on anndaa mbarɗo mo,

²ndotti'en mon e hiitooɓe mon ngurto. Ɓe poonda daayaare hakkunde pellel mbaraaɗo e berniiji taariiɗi.

³Nden ndotti'en berniwol ɓurŋgol ɓadaago maayɗo, koo'a wiige nge meeɗaay remugo malla dasugo saret tawon.

⁴Ndotti'en berniwol man njahra nge haa maayel ilooyel foroy, haa nokkuure nde meeɗaay remeego malla aaweego, ton ɓe ngewa daande maage nder maayo.

⁵Liman'en Lewi'en njaha ton boo, ngam kamɓe, Jawmiraawo, Allah mooɗon suɓi ɓe ngam ɓe kuuwana mo, ɓe mbarkiɗina bee innde maako. Dow umroore maɓɓe, kiita jokkirgol e sarru e naawnere fuu ta'ete.

⁶Nden ndotti'en berniwol ɓurŋgol ɓadaago nokkuure nde ɓe tawi mbaraaɗo go, ɓe fuu ɓe loota juuɗe maɓɓe dow wiige nge ɓe ngewi daande haa maayo go.

⁷Ɓe mbi'a: Juuɗe amin ndufaay ƴiiƴam ɗa'am, gite amin boo ngi'aay ko waɗi.

⁸Yaa Jawmiraawo, yaafana ummaatoore ma Isra'iila nde kisnuɗa. Taa liman min aybe mbarki goɗɗo mo walaa aybe, mo ɓe mbari caka ummaatoore ma Isra'iila. Bana nii yaafuye ƴiiƴam ɗam heɓrete.

⁹Bana non mbaaroton ko fottani Jawmiraawo, on ittiran aybe ƴiiƴam man caka mooɗon.”

¹⁰“Koo ndey on ngurtoto ngam haɓre bee konne'en mon, to Jawmiraawo, Allah mooɗon hokki on ɓe, on naŋnga naŋngeteeɓe.

¹¹To gooto mon yi'i caka horɓe naŋngaaɓe debbo booɗɗo mo o yiɗi haa o te'a ɗum,

¹²nden kam o yahra debbo oo nder saare maako. Debbo oo femmba gaasa hoore mum, helnya peɗeeli mum,

¹³ɓorto limce ɗe ɓe naŋngiri ɗum, ɓorno limce goɗɗe, jooɗo nder saare maako lewru wooru ngam woyugo saaro'en mum. Ɓaawo man o waawan te'ugo debbo oo haa o laato debbo maako.

¹⁴Yeeso boo, to gorko oo wanyi mo, sey o yoofta mo o dimo, ngam o dooli mo waaldugo bee maako, ngam maajum o waawataa jogitaago mo bana korɗo, o waawataa soorrugo mo boo.”

¹⁵“Teema goɗɗo woodi rewɓe ɗiɗo. O yiɗi oo, o ɗon yawo oya. Ɓe ɗiɗo fuu ɓe ndanyani mo ɓiɓɓe worɓe. Ammaa afo maako woni ɓii jawaaɗo.

¹⁶Nyalaade nde o yiɗi ronnugo ɓikkoy maako, taa o ɓurna ɓii giɗaaɗo dow afo maako, ɓii jawaaɗo.

¹⁷Sey o hokka afo maako geɓe ɗiɗi haa maral maako, koo to o yiɗaa daada maako. Doole o gooŋɗina afaaku, o hokka afo maako ko woodani mo.”

¹⁸“To goɗɗo woodi ɓiɗɗo gorko saata-hooreejo, tuurtoowo, mo sali ɗowtanaago baaba mum e daada mum, koo nde ɓe elti mo.

¹⁹Nden kam saaro'en maako njahra mo yeeso ndotti'en haa dammugal berniwol maako haa nokkuure kiita.

²⁰Ɓe mbi'a ndotti'en berniwol maɓɓe: Ɓiɗɗo amin oo o saata-hooreejo, tuurtoowo, o sali ɗowtanaago min, o daakaareejo e guykoowo.

²¹Nden yimɓe berniwol maako fuu piɗa mo bee kaa'e haa o maaya. Bana non ittirton halleende caka mooɗon. Isra'iila'en fuu nana habaru maajum, ɓe kula.”

²²To goɗɗo waɗi hakkewol maŋngol, o hiitaama kiita mbareego, to on mbari mo, on ɓili ɓanndu maako haa leggal,

²³taa ndu lutta haa maagal haa jaŋngo fajiri. Sey on uwa mo nyalaade man, ngam naaloore Allah ɗon dow koo moy ɓilaaɗo haa leggal. Uwe maayɗo oo ngam taa on coɓna lesdi ndi Jawmiraawo, Allah mooɗon hokkata on, maron.