Read Fulfulded Tooktaaki Tawreeta 23 Bible Online

Tooktaaki Tawreeta 23 - Fulfulded bible

Tooktaaki Tawreeta 23

¹“Taa goɗɗo waalda bee debbo baaba mum. Taa o toska baaba maako bee waɗugo kalluɗum ɗu'um.”

²“Walaa gorko cortaaɗo malla mo jakari mum ta'a, nastata mooɓtorde yimɓe Jawmiraawo.

³Walaa njaaluujo malla danygol maako, koo nder yidere sappoore boo, nastata mooɓtorde yimɓe Jawmiraawo.

⁴Walaa Ammooniijo malla Mo'abiijo malla danygol maɓɓe, koo nder yidere sappoore boo, nastata mooɓtorde yimɓe Jawmiraawo haa foroy.

⁵Ngam saa'i on ngurtino lesdi Misra, ɓe mballitaay on bee nyaamdu e ndiyam dow laawol. Ɓe njoɓi Balaama ɓii Be'or, goɗɗo Petor nder Mesopotamiya, ngam o naala on.

⁶Ammaa Jawmiraawo, Allah mooɗon nananaay Balaama. O wartiri naaloore man barka, ngam Jawmiraawo, Allah mooɗon yiɗi on.

⁷Saa'i ummaatoore mon ɗon, taa on ɗaɓɓita hayru e salaaman maɓɓe sam.

⁸Taa njawe Edoomi'en, ngam ɓe banndiraaɓe mon. Taa njawe Misra'en boo, ngam on hoɗɓeno nder lesdi maɓɓe.

⁹Ɓiɓɓe maɓɓe nder yidere tataɓre keɓan nastugo mooɓtorde yimɓe Jawmiraawo.”

¹⁰“To on ngurtake, on mbaɗi saŋngeere haɓugo bee konne'en mooɗon, ndeente, taa on kuuwa cemtuɗum.

¹¹To goɗɗo mon soɓi bee koyɗitaaki jemma, nden kam o wurto saŋngeere, o jooɗo yaasi saŋngeere.

¹²To kiikiiɗe waɗi, o yiiwo, ɓaawo mutki naaŋge, o lorto nder saŋngeere.

¹³Mbaɗe nokkuure ngam widdoyaago haa yaasi saŋngeere mon.

¹⁴Koo moy mooɗon mara gasirgal caka kuuje mum. To o dilli haaje maako, sey o wasa ngaska, o uwa coofe maako.

¹⁵Jawmiraawo, Allah mooɗon ɗon wondi bee mooɗon nder saŋngeere, ngam o hisna on, o hokka on konne'en wonɓe yeeso mon. Ngam maajum sey on cena saŋngeere mooɗon. Taa Jawmiraawo yi'a huunde semtinannde caka mooɗon, ngam taa o waylito, o acca on.”

¹⁶“To maccuɗo doggi jawmum, wari haa mooɗon ngam o hisa, taa lorne mo haa jawmiiko.

¹⁷Sey o jooɗo caka mooɗon, haa nokkuure nde o suɓi caka nokkuuje berniwol mooɗon. Taa ɓille mo.

¹⁸Taa Isra'iilaajo, gorko malla debbo, laato daakaareejo bee rewugo lawru.

¹⁹Taa nastine caahu ngeenaari njeenu nder suudu Jawmiraawo, Allah mooɗon ngam yoɓugo togayeeje koo ɗeye. Ngam ɗum nyidduɗum haa Jawmiraawo.

²⁰Taa ndokke Isra'iilaajo nyamaande bee ndiyam, koo ceede koo nyaamdu koo huunde woɗnde.

²¹Sey jananno ndokkoton nyamaande bee ndiyam, ammaa naa goɗɗo lenyol mon. Ɗowtane umroore nde'e. Nden kam Jawmiraawo, Allah mooɗon barkiɗinan kuuɗe mon fuu nder lesdi ndi maroton.

²²To on toganake Jawmiraawo, Allah mooɗon togayeere, kebbine ɗum law. Ngam Jawmiraawo ƴamtan ɗum. To on kebbinaay nde, ɗum laatoto aybe dow mooɗon.

²³To on togaaki togayeere, naa ɗum aybe.

²⁴Ammaa ko on togani Jawmiraawo, Allah mooɗon bee kunnduɗe mon, bee ngiɗa mooɗon, sey on kakkilana ɗum, on kebbitina ɗum.

²⁵To a ɗon waanca nder ngesa inabooje keeddiɗɗa, a nyaaman haa a haara to a yiɗi. Ammaa taa waatu nder silaawo ma kam.

²⁶Bana non boo, to a ɗon waanca nder ngesa alkamaari maako, to a yiɗi, a ittan cammeeje bee juŋngo kam. Ammaa taa ta'u bee wafdu.”