Read Fulfulded Tooktaaki Tawreeta 25 Bible Online

Tooktaaki Tawreeta 25 - Fulfulded bible

Tooktaaki Tawreeta 25

¹To jokkirgol ummake hakkunde yimɓe, ɓe njehi yeeso kiita, hiitooɓe kiito ɓe, ɓe ngooŋɗina gooŋgaajo, ɓe aybina kalluɗo.

²To ɓe kiitake kalluɗo oo kiita ɓocceego, nden kam kiitoowo wallina mo haa lesdi, ɓe ɓocca mo yeeso maako deydey aybe maako.

³Ɓe ɓocca mo ɓocci cappanɗe nayi, taa ɓura, ngam taa o yawna banndiraawo maako yeeso yimɓe.

⁴Taa mbaɗane ngaari corɓoori[22] sabakaare to ndi ɗon sorɓa.

⁵To deerɗiraaɓe ɗiɗo ɗon njooɗodi saare woore, gooto maɓɓe maayi, danyaay, taa debbo maayɗo oo te'e haa goɗɗo feere. Eekiiko te'a mo teegal eekiraagu.

⁶Mbaɗe ɓiɗɗo afo debbo oo bana ɓii maayɗo, ngam taa innde maayɗo oo wile diga Isra'iila.

⁷Ammaa to gorko oo yiɗaa te'ugo mo, nden kam debbo yaha haa ndotti'en haa dammugal berniwol, wi'a ɓe: Eekam yiɗaa haɓɓugo teegal eekiraawal, o sali waɗango deerɗiiko danygol ngam haa innde maako lutta nder Isra'iila.

⁸Nden ndotti'en berniwol gorko oo ewno mo, mbolwana mo. To o salake te'ugo mo,

⁹nden kam debbo oo ɓadito mo yeeso ndotti'en, faɗɗita mo faɗo wooto, tuuta mo tuuɗe haa yeeso, o wi'a: Ndaa ko laatanto gorko mo sali waɗango deerɗum danygol.

¹⁰Innde maako nder Isra'iila laato saare paɗɗitaaɗo faɗo.

¹¹To deerɗiraaɓe ɗon kaɓa, debbo gooto maɓɓe ɓaditi ngam hisnugo gorum diga juŋngo piyanɗo mo, to o naŋngi les oya,

¹²nden kam ta'e juŋngo maako. Taa enɗe mo.

¹³Taa njoge kaa'e awnorɗum, hoynde e teddunde feere feere ɗiɗi nder boorooji mooɗon.

¹⁴Taa mare nder ci'e mon muudoore mawnde e famarde.

¹⁵Sey on mara hayre heƴnde e gooŋɗunde. Non boo muudoore, nde laato heƴnde e gooŋɗunde, ngam haa balɗe mon njuuta nder lesdi ndi Jawmiraawo, Allah mooɗon hokkata on.

¹⁶Ngam waɗooɓe rikici bee awnorɗum e poondirɗum, ɓe nyidduɓe haa yeeso Jawmiraawo, Allah mooɗon.

¹⁷Ciftore ko Amaleki'en mbaɗi on dow laawol saa'i ngurtiiɗon lesdi Misra.

¹⁸Ɓe ukkani on gal ɓaawo, wakkati on somɓe, on tampuɓe, ɓe mbari sakkitiiɓe mon tampuɓe fuu. Ɓe kulaay Allah.

¹⁹To Jawmiraawo, Allah mooɗon marni on lesdi, hokki on siwtaare diga konne'en mon taariiɓe lesdi ndi o hokki on ngam nyaamon, maron ndi fuu, on nattina Amaleki'en, ngam taa goɗɗo siftora inɗe maɓɓe haa duniyaaru. Taa ngejjite ɗum!