Read Fulfulded Tooktaaki Tawreeta 26 Bible Online

Tooktaaki Tawreeta 26 - Fulfulded bible

Tooktaaki Tawreeta 26

¹“To on nasti lesdi ndi Jawmiraawo, Allah mooɗon hokkata on, to on mari ndi, on ɗon njooɗi nder maari,

²nden kam koo moy mon hoo'a yeɓre haa ko o aartata sodugo haa ngesa maako. O waata ɗum nder silaawo, o yahra haa nokkuure nde Jawmiraawo, Allah mooɗon suɓata ngam innde muuɗum wona ton.

³O yaha haa limanjo nyalɗe maajum, o wi'a mo: Mi ɗon anndina Jawmiraawo, Allah maaɗa hannde, mi nasti nder lesdi ndi o hunani kaakiraaɓe meeɗen o hokkan en.

⁴Limanjo jaɓa silaawo man, o jo'ina ngo yeeso hirsirde Jawmiraawo, Allah mooɗon.

⁵Nden mbolwe bolle ɗe'e ton yeeso Jawmiraawo, Allah mooɗon: Kaaka am Yaakubu o Aramiijo eggi-egginoowo. O yehi lesdi Misra, o hoɗi ton bee yimɓe saare maako seɗɗa. Ammaa haa ton ɓe laati ummaatoore mawnde, semmbiɗnde e ɗuuɗnde.

⁶Misra'en toonyi en, ɓilli en, kuuwni en kuugal caatuŋgal.

⁷Nden en mboyani Jawmiraawo Allah kaakiraaɓe meeɗen. Kaŋko boo o nani bojji men, o yi'i bone men e torra men e ɓillaare meeɗen.

⁸O wurtini en diga lesdi Misra bee juŋngo semmbiɗŋgo, fortaaŋgo. O huuwi kuuje kulniiɗe mawɗe e alaamaaji e kaayeefiiji.

⁹O waddi en haa nokkuure nde'e, o hokki en lesdi keewndi kosam e njumri.

¹⁰Jonta ndaa mi waddi ko aarti ɓenndugo haa lesdi ndi'i, an Jawmiraawo a hokki yam. Nden njo'ine ɗum yeeso Jawmiraawo, Allah mooɗon, cujidane mo.

¹¹Ceyore kuuje booɗɗe ɗe Jawmiraawo, Allah mooɗon hokki on, onon e yimɓe ci'e[23] mon. Ceyode bee Lewi'en e hoɗɓe wonɓe caka mooɗon.

¹²Nde duuɓi tati mbaɗi fuu, ngadde zakka kuuje ɗe keɓoton hitaande tataɓre. Ndokke ɗum Lewi'en e hoɗɓe e atiime'en e rewɓe yurumɓe wonɓe nder berniiji mon, haa ɓe nyaama, ɓe kaara.

¹³Nden on mbi'a yeeso Jawmiraawo, Allah mooɗon: Mi wurtini dokkal cenaaŋgal fuu diga saare am. Mi hokki ngal Lewi'en e hoɗɓe e atiime'en e rewɓe yurumɓe, bana umrooje ɗe a umri yam fuu. Mi luutaay umrooje ma ɗe'e, mi yejjitaay koo woore.

¹⁴Mi nyaamaay goɗɗum man wakkati boyki maayɗo. Mi wurtinaay koo ɗume nder maajum yaake mi coɓɗo. Mi lii'anaaki maayɗo koo ɗume nder maajum. Mi ɗowtani wolde Jawmiraawo Allah am, mi waɗi bana a umri yam.

¹⁵Laaram diga asama haa pellel ceniiŋgel ngel njooɗiiɗa, barkiɗin ummaatoore ma Isra'iila, barkiɗin lesdi ndi ndokkuɗa min, bana a hunani kaakiraaɓe amin. Ɗum lesdi keewndi kosam e njumri.”

¹⁶Hannde Jawmiraawo, Allah mooɗon ɗon umra on farillaaji ɗi'i e kiitaaji ɗi'i. Kakkilane ɗi, ɗowtane ɗi bee ɓerɗe mon e yoŋkiiji mon fuu.

¹⁷Haa Jawmiraawo on mbi'i hannde, kaŋko woni Allah mooɗon, onon boo on tokkoto laabi maako, on kakkilanan farillaaji e umrooje e kiitaaji maako e on ɗowtanto wolde maako.

¹⁸Hannde Jawmiraawo wi'i on, on laatake ummaatoore maako yiɗaande, bana o hunani on, o umri on on ɗowtano umrooje maako fuu,

¹⁹kaŋko boo o ɓaŋgtan on dow ummaatooje ɗe o tagi fuu, o samɗinan on, o darjiɗinan on masin yeeso maaje, ngam on laatake ummaatoore senaande ngam Jawmiraawo, Allah mooɗon, bana o wolwi.