Read Fulfulded Tooktaaki Tawreeta 29 Bible Online

Tooktaaki Tawreeta 29 - Fulfulded bible

Tooktaaki Tawreeta 29

¹Muusa mooɓti Isra'iila'en fuu, wi'i ɓe: “On ngi'i bee gite mon ko Jawmiraawo waɗi nder lesdi Misra e ko o waɗi Firawna e saraaki'en muuɗum e lesdi muuɗum fuu.

²On ngi'i masiibooji kulniiɗi e alaamaaji mawɗi e kaayeefiiji mawɗi ɗi o waɗi.

³Ammaa haa wargo hannde o hokkaay on ɓerɗe paamanɗe e gite gi'anɗe e noppi nananɗi.

⁴Duuɓi cappanɗe nayi mi ɗowi on nder ladde. Saa'i man fuu limce mon e paɗe mon kiiɗaay.

⁵On nyaamaay tamseeje, on njaraay inaboojam e nguykinoojam boo, ngam haa anndon kaŋko woni Allah mooɗon.

⁶Nde en njotti nokkuure nde'e, Sihon, laamiiɗo Hesbon e Ook, laamiiɗo Baasan, ngari haɓugo bee meeɗen. Ammaa en njaali ɓe.

⁷En nyaami lesɗe maɓɓe, en cenndi ɗe hakkunde le'i Ruben e Gada e reeta lenyol Manassa.

⁸Kakkilane bolle alkawal nga'al, ɗowtane ɗe, ngam keɓon hayru nder kuuɗe mon fuu.

⁹Hannde on fuu on ɗon ndari yeeso Jawmiraawo, Allah mooɗon, hoore'en e ardiiɓe e ndotti'en e winndooɓe e worɓe Isra'iila fuu

¹⁰e ɓikkoy mon e rewɓe mon, non boo jananɓe jooɗiiɓe caka mooɗon nder caŋngeeje mon, diga fe'anooɓe on leɗɗe haa yotto nyeɗanooɓe on ndiyam.

¹¹On nastan alkawal Jawmiraawo, Allah mooɗon ngal o haɓɓi bee mooɗon hannde bee hunayeere nde o huni.

¹²Ngam haa o mawnina on hannde, on laato ummaatoore maako, kaŋko boo o laato Allah mooɗon bana o wolwani on e bana o hunani baabiraaɓe mon Ibrahiima e Isiyaaku e Yaakubu.

¹³Naa bee mooɗon tan mi ɗon haɓɓa alkawal nga'al hannde bee hunayeere,

¹⁴ammaa bee koo moy gonduɗo bee meeɗen hannde dariiɗo haa ɗo yeeso Jawmiraawo Allah meeɗen, non boo bee danygol men ngol danyaaka tawon.

¹⁵Ngam on anndi no en njooɗori nder lesdi Misra e no en caalori lesɗe ummaatooje ɗe on caali.

¹⁶On ngi'i labbi maɓɓe nyidduɗi, kuuwraaɗi bee leɗɗe e kaa'e e cardi e kaŋŋeeri.

¹⁷Taa goɗɗo caka mooɗon, gorko malla debbo malla saare malla lenyol, waylito acca Jawmiraawo, Allah mooɗon ngam yahugo jaggano ɗowanteeɓe ummaatooje ɗe'e. Taa goɗɗo caka mooɗon laato bana ɗaɗol puɗnanŋgol haako haaɗko, mbarooho.

¹⁸Taa goɗɗo, nanɗo bolle hunayeere ɗe'e sarga hoore mum bee numugo nder ɓernde mum: Mi heɓan salaaman, koo to mi saatini hoore am, to mi waɗi ko ɓernde am yiɗi, nden o nastina woɗɓe nder dewki labbi.

¹⁹Jawmiraawo yaafantaako mo, ammaa tikkere maako saatan dow goɗɗo oo. Naalooje binndaaɗe nder deftere nde'e fuu ukkanto mo, Jawmiraawo majjinan innde maako diga duniyaaru.

²⁰Jawmiraawo senndan mo bee le'i Isra'iila fuu, o ukkanan mo sarru fodde naalooje alkawal binndaaŋgal nder deftere tawreeta nde'e.

²¹Nder zamanuuji garanɗi, danygol mon e jananɓe iwɓe haa lesɗe daayiiɗe ngi'an masiibooji e nyawuji ɗi Jawmiraawo ukkanta lesdi mon.

²²Gese laatoto ladde meere, ɗe cuddirteeɗe mannda e baruudu[27]. Walaa mo aawata ton. Koo geene boo puɗataa ton. Gure mon nanndan bee Sodoma e Gomorra e Adama e Ceboyim, ɓaawo Jawmiraawo nattini ɗe bee tikkere mum saatunde.

²³Nden ummaatooje fuu ƴaman: Ngam ɗume Jawmiraawo waɗi lesdi mum bana nii? Ngam ɗume tikkere maako saati?

²⁴Ɓe mbi'an: Ngam ɓe ngudini alkawal ngal Allah kaakiraaɓe maɓɓe haɓɓi bee maɓɓe, saa'i o wurtini ɓe lesdi Misra.

²⁵Ɓe njehi ɓe njaggani ɗowanteeɓe woɗɓe, ɓe cujidani ɓe. Naane ɓe anndaano ɗowanteeɓe man, Jawmiraawo boo haɗi ɓe sujidango ɓe.

²⁶Ngam man Jawmiraawo tikkani lesdi ndi'i, ukkani ndi naalooje binndaaɗe nder deftere nde'e fuu.

²⁷Jawmiraawo tikkani ɓe masin. Ngam daliila tikkere maako saatunde o ɗoofi ɓe diga lesdi maɓɓe, o sakkini ɓe haa lesdi njananndi haa ɓe ngoni hannde.

²⁸Kuuje sirriije, sey Jawmiraawo, Allah meeɗen anndata ɗe. Ammaa kuuje baŋginaaɗe, waato ko o wi'i nder tawreeta maako fuu, ɗum ɗon ngam meeɗen e danygol men haa en ɗowtano ɗum haa foroy.”