Read Fulfulded Tooktaaki Tawreeta 31 Bible Online

Tooktaaki Tawreeta 31 - Fulfulded bible

Tooktaaki Tawreeta 31

¹Muusa tokki wolwango Isra'iila'en fuu bolle ɗe'e.

²O wi'i ɓe: “Duuɓi am teemerre e noogas (120) jonta, mi waawataa mi tokko ardaago on fahin. Jawmiraawo boo wi'i yam mi heɓataa eeraago maayo Urdun ngo'o.

³Jawmiraawo, Allah mooɗon bee hoore mum ardoto on. O nattinan ummaatooje yeeso mooɗon ɗe'e haa on nyaama lesdi maaje. Yosuwa boo ardoto on eeraago, bana Jawmiraawo wi'i.

⁴Jawmiraawo nattinan ummaatooje ɗe'e, bana o nattiniri Sihon e Ook, laamiiɓe Amoori'en e lesdi maɓɓe.

⁵Jawmiraawo hokkan on ɓe. Sey on kuuwa ɓe fodde umrooje ɗe mi umri on fuu.

⁶Cemmbiɗe, cuusɗine ɓerɗe mon, taa kule sam, taa kultoreeŋgol naŋnga on yeeso maɓɓe! Ngam Jawmiraawo, Allah mooɗon yahdan bee mooɗon, o accataa on, o wudintaa on.”

⁷Nden Muusa ewni Yosuwa, wi'i mo yeeso Isra'iila'en fuu: “Semmbiɗiɗ, suusɗin ɓernde ma, ngam an yahdata bee ummaatoore nde'e haa lesdi ndi Jawmiraawo hunani kaakiraaɓe mooɗon, o hokkan ɓe e an a senndanan ɓe ndi, ɓe mara.

⁸Jawmiraawo bee hoore mum ardoto ma, wondan bee ma. O accataa ma, o wudintaa ma. Ngam maajum taa hul, taa tampu sam.”

⁹Nden Muusa winndi tawreeta ka'a, hokki ka liman'en ɓiɓɓe Lewi roondooɓe sundukru alkawal Allah e ndotti'en Isra'iila fuu.

¹⁰Muusa umri ɓe, o wi'i: “Nde duuɓi joweeɗiɗi njaalti fuu, waato nder hitaande dimɗinki, njaŋnge tawreeta ka'a wakkati juulde bukkaaji.

¹¹Njaŋngane ka Isra'iila'en fuu mooɓtotooɓe ngam ɓe cujidana Jawmiraawo, Allah mooɗon haa nokkuure nde o suɓata, ɓe nana ka.

¹²Mooɓte ummaatoore, worɓe e rewɓe e ɓikkoy e jananɓe jooɗiiɓe nder berniiji mon, haa ɓe nana, ɓe ekkito hulugo Jawmiraawo, Allah mooɗon, ɓe kakkilana umrooje tawreeta ka'a fuu, ɓe ɗowtano ɗe.

¹³Ɓikkoy mon koy anndaa tawreeta boo, ekkititto hulugo Jawmiraawo, Allah mooɗon balɗe ngeendam maɓɓe fuu nder lesdi gaɗa Urdun ndi nastoton haa maron ndi.”

¹⁴Nden Jawmiraawo wi'i Muusa: “Wakkati maayde ma ɓadake. Ewna Yosuwa, ngarde haa laymaaru fottirde, haa mi umra mo no o huuwrata.” Muusa e Yosuwa njehi haa laymaaru fottirde.

¹⁵Jawmiraawo waŋgani ɓe ton nder ruulde nanndunde bee daŋraŋgal, nde dari haa nastirde laymaaru.

¹⁶Nden Jawmiraawo wi'i Muusa: “A maayan bana kaakiraaɓe ma. Ɓaawo maayde ma, ummaatoore nde'e tuurtan, nde ɗakkotiran bee ɗowanteeɓe jananɓe nder lesdi ndi nde nastata, nde wudintam, nde yewan alkawal ngal kaɓɓumi bee maare.

¹⁷Nden tikkere am saatan dow maɓɓe. Mi wudinan ɓe, mi wiirnan ɓe gite am, haa ɓe kalka. Boneeji e ɓillaaje ɗuuɗɗe ukkanto ɓe. Nden ɓe mbi'an nyalaade maajum: Boneeji ɗi'i fuu keɓi en ngam Jawmiraawo, Allah meeɗen acci wondugo bee meeɗen.

¹⁸Saa'i man mi wiirnan ɓe yeeso am, ngam halleende nde ɓe mbaɗi, ɓe ngayliti haa ɗowanteeɓe woɗɓe.

¹⁹Jonta kam, winndu yimre. Ekkitin ngol Isra'iila'en, yimre nde'e laatano yam seedamku dow Isra'iila'en.

²⁰Ngam to mi yahri ɓe nder lesdi keewndi kosam e njumri ndi kunaniimi kaakiraaɓe maɓɓe, ɓe nyaaman ɓe kaaran, ɓe payan boo. Ammaa ɓe ngaylititto gal ɗowanteeɓe woɗɓe, ɓe njagganto ɓe, ɓe njawoto yam, ɓe ngewan alkawal am boo.

²¹To boneeji e ɓillaaje ɗuuɗɗe ɗe'e ukkanake ɓe, nden yimre nde'e laatoto ceedoowo am dow maɓɓe, ngam danygol maɓɓe yejjitittaa nde. Koo jonta boo mi anndi numooji maɓɓe, hiddeko mi nastina ɓe nder lesdi ndi kunaniimi ɓe.”

²²Nyannde maajum Muusa winndi yimre man, ekkitini nde Isra'iila'en.

²³Nden Jawmiraawo umri Yosuwa ɓii Nuuna, o wi'i: “Semmbiɗa, suusɗin ɓernde ma! Ngam an yahrata Isra'iila'en nder lesdi ndi kuniimi hokkugo ɓe. Min boo mi wondan bee maaɗa.”

²⁴Nde Muusa timmini winndugo bolle tawreeta go fuu nder deftere,

²⁵o umri liman'en Lewi'en roondooɓe sundukru alkawal Allah, o wi'i ɓe:

²⁶“Koo'e deftere tawreeta nde'e, mballine nde kommbi sundukru alkawal Jawmiraawo, Allah mooɗon. Nde laatoto ton seedamku dow mooɗon.

²⁷Ngam mi anndi tuurtol mooɗon e caatal-ko'e mooɗon. Mi ɗon wondi bee mooɗon hannde ma, on tuurtani Jawmiraawo, sakko ɓaawo maayde am!

²⁸Mooɓte ndotti'en le'i mooɗon e kaliifa'en mooɗon fuu yeeso am, haa mi yecca on bolle ɗe'e. Mi ewnoto asama e lesdi, ɗum laato seedooɓe am dow maɓɓe.

²⁹Ngam mi anndi, ɓaawo maayde am onon fuu on mbonnoto, on accan tokkaago laawol ngol mi umri on. Saa'iire waran nde sarru ukkanto on, ngam on mbaɗan kalluɗum yeeso Jawmiraawo, on tikkinan mo bee kuuɗe mon.”

³⁰Nden Muusa yimi yimre nde'e, mooɓtorde Isra'iila'en fuu ɗon keɗito nde haa nde timmi: