Read Fulfulded Tooktaaki Tawreeta 5 Bible Online

Tooktaaki Tawreeta 5 - Fulfulded bible

Tooktaaki Tawreeta 5

¹Muusa mooɓti Isra'iila'en fuu, wi'i ɓe: “Onon Isra'iila'en, nane farillaaji e kiitaaji fuu ɗi umranmi on hannde! Ekkite ɗi, kakkilane ɗi, ɗowtane ɗi.

²Jawmiraawo, Allah meeɗen haɓɓi alkawal bee meeɗen haa hooseere Horeb.

³O haɓɓaay ngal bee baabiraaɓe meeɗen, ammaa bee meeɗen enen yeeɗɓe hannde haa ɗo fuu.

⁴Dow hooseere, Jawmiraawo waŋgani on caka yiite, wolwani on gite bee gite nder yiite.

⁵Min mi ɗonno dari hakkunde mooɗon bee Jawmiraawo saa'i man, ngam mi anndina on ko Jawmiraawo wi'i. Ngam on kuli yiite, on mba'aaki hooseere. O wi'i:

⁶Min woni Jawmiraawo, Allah maaɗa, gurtinɗo ma jeyaaŋgu haa lesdi Misra.

⁷Taa ɗowanteeɓe woɗɓe tawe haa ma, sey min feere am.

⁸Taa waɗan hoore ma lawru koo nduye, koo suura tagdi koo ndiye haa asama malla dow lesdi malla nder ndiyam les lesdi.

⁹Taa sujidan ɗi, taa teddin ɗi, ngam min Jawmiraawo, Allah maaɗa, mi yiɗaa a tokko ɗowanteeɗo feere sam[7]. Mi hiitoto aybe wanyɓe yam haa ɓiɓɓe maɓɓe, koo haa taaniraaɓe maɓɓe e jaatiraaɓe maɓɓe boo.

¹⁰Ammaa mi waɗanan yiɗɓe yam, ɗowtaniiɓe umrooje am mbooɗeeŋga haa gide ujineeje.

¹¹Taa ewna innde Jawmiraawo, Allah maaɗa meere. Ngam fakat Jawmiraawo hiitoto koo moy ewni innde muuɗum meere.

¹²Hakkilan nyannde siwtorde, sen nde bana min Jawmiraawo, Allah maaɗa mi umri ma.

¹³Nder nyalɗe joweego kuuwata kuugal ma fuu.

¹⁴Ammaa nyalaade joweeɗiɗawre woni siwtorde ngam Jawmiraawo, Allah maaɗa. Taa huuw kuugal koo ngale, koo an, koo ɓiya gorko, koo ɓiya debbo, koo maccuɗo ma, koo korɗo ma, koo nagge ma, koo wamnde ma, koo dabbaaji ma fuu, koo koɗo gonɗo nder wuro ma. Ngam maccuɗo ma e korɗo ma ciwto bana ma.

¹⁵Siftor an boo a laatino maccuɗo nder lesdi Misra. E min Jawmiraawo, Allah maaɗa mi wurtini ma ton bee juŋngo am semmbiɗŋgo fortaaŋgo. Ngam man min Jawmiraawo, Allah maaɗa mi umri ma a siwto nyalaade siwtorde.

¹⁶Teddin baaba ma e daada ma, bana min Jawmiraawo, Allah maaɗa mi umri ma. Nden kam a heɓan hayru, balɗe ma njuutan nder lesdi ndi min Jawmiraawo, Allah maaɗa ndokkanmaami.

¹⁷Taa mbar-hoore.

¹⁸Taa waɗ njeenu.

¹⁹Taa wujju.

²⁰Taa seeda fewre dow keeddiɗɗiraawo ma.

²¹Taa suuna debbo keeddiɗɗa. Taa suuna saare keeddiɗɗa, koo ngesa maako, koo maccuɗo maako, koo korɗo maako, koo nagge maako, koo wamnde maako e koo ɗume ko keeddiɗɗa mari fuu.

²²Kanjum woni bolle ɗe Jawmiraawo wolwani jama'aare mooɗon fuu mooɓiinde dow hooseere bee sawtu cemmbiɗɗo caka yiite e duule nyiɓɓuɗe. Nden o winndi ɗe dow alluhaaje kaa'e ɗiɗi, o hokki yam ɗe.”

²³Nde on nani sawtu iwɗo nder nyiɓre, hooseere boo jammi, ardiiɓe le'i mon e ndotti'en mooɗon fuu ɓaditi yam.

²⁴On mbi'i: Ndaa, Jawmiraawo, Allah meeɗen yi'ni min tedduŋgal muuɗum e maŋngu mum, min nani sawtu maako caka yiite. Min ngi'i hannde, neɗɗo yeeɗan koo to Allah wolwani ɗum.

²⁵Ammaa jonta, ngam ɗume yiite naawŋge nge'e wulata min haa min maaya, to min tokkitini nanugo sawtu Jawmiraawo, Allah meeɗen fahin, nden kam min maayan!

²⁶Ngam neɗɗo moye meeɗi yeeɗugo ɓaawo o nani Allah geeto wolwani mo nder yiite, bana minin hannde?

²⁷An Muusa, ɓadita, nan ko Jawmiraawo, Allah meeɗen wi'ete fuu. Nden lornan min ko Jawmiraawo, Allah meeɗen wolwani ma fuu, minin boo min nanante, min ɗowtanto ɗum.

²⁸Jawmiraawo nani bolle mooɗon, nde on mbolwani yam: O wi'i yam: Mi nani ko yimɓe ummaatoore mbi'i ma fuu, ɗum gooŋga.

²⁹Mi yiɗi ɓerɗe maɓɓe tabita bana non, ɓe kulammi foroy, ɓe ɗowtano umrooje am fuu, ngam ɓe keɓa hayru kamɓe e ɓikkoy maɓɓe haa foroy.

³⁰Yah, yeccu ɓe ɓe loro nder laymaaji maɓɓe.

³¹Ammaa an, wondu bee am haa ɗo, haa mi wi'e umrooje e farillaaji e kiitaaji am fuu. Ekkitin ɗum yimɓe, haa ɓe ɗowtano ɗum nder lesdi ndi ndokkanmi ɓe ɓe mara.

³²“Ngam maajum kakkile, ɗowtane ko Jawmiraawo, Allah mooɗon umri on fuu. Taa cele laawol umrooje maako, koo haa nyaamo koo haa nano.

³³Tokke laawol umrooje ɗe Jawmiraawo, Allah mooɗon umri on fuu ngam on ngeeɗa, on keɓa hayru, balɗe mon njuuta nder lesdi ndi maroton.”