Read Fulfulded Tooktaaki Tawreeta 7 Bible Online

Tooktaaki Tawreeta 7 - Fulfulded bible

Tooktaaki Tawreeta 7

¹“To Jawmiraawo, Allah mooɗon yahri on haa lesdi ndi maroton, o riiwan ummaatooje ɗuuɗɗe ɗe'e yeeso mooɗon: Heti'en e Girgasi'en e Amoori'en e Kanaani'en e Perezzi'en e Hewi'en e Yebusi'en. Ummaatooje joweeɗiɗi ɗe'e, ɓuri on ɗuuɗeeŋga e semmbe.

²Jawmiraawo, Allah mooɗon hokkan on yimɓe wonɓe yeeso mooɗon ɓe'e. On njaaloto ɓe, on mbaran ɓe, on nattinan ɓe fuu. Taa kaɓɓe alkawal bee maɓɓe, taa enɗe ɓe.

³Taa esire bee maɓɓe, taa ndokke ɓiɓɓe maɓɓe worɓe ɓiɓɓe mon rewɓe, taa te'ane ɓiɓɓe mon worɓe ɓiɓɓe maɓɓe rewɓe boo.

⁴Ngam ɗum daaynan ɓiɓɓe mon worɓe e Jawmiraawo, haa ɓe cujidana labbi goɗɗi. Nden ɗum umminan tikkere Jawmiraawo saatunde dow mooɗon, o nattinan on law.

⁵Ndaa ko on mbaɗata yimɓe ɓe'e: Ngibbine kirsirɗe maɓɓe, puse kaa'e ciftinorɗe maɓɓe, ngibbine Aseraaji maɓɓe cenaaɗi, ngule labbi maɓɓe.

⁶Ngam onon on ummaatoore senaande ngam Jawmiraawo, Allah mooɗon mo suɓi on haa on laatano mo ummaatoore yiɗaande caka ummaatooje gonɗe nder duniyaaru fuu.

⁷Jawmiraawo yiɗi on, suɓi on, naa ngam on ɓuri ummaatooje goɗɗe ɗuuɗugo! Fakat on ɓuri ɗe fuu famɗugo.

⁸Ngam Jawmiraawo yiɗi on, hebbini hunayeere nde o hunani kaakiraaɓe mon. O wurtini on bee juŋngo maako semmbiɗŋgo diga lesdi Misra, o rimɗini on e njeyaaŋgu diga juŋngo Firawna, laamiiɗo Misra.

⁹Anndite, Jawmiraawo, Allah mooɗon woni Allah, o koolniiɗo feere maako, o ɗon jogi alkawal maako bee adilaaku ngam yiɗɓe mo e ɗowtantooɓe umrooje maako haa yotto gide ujineere.

¹⁰Ammaa o neeɓataa waataago wanyɓe mo. Fakat o halkan koo moy ganyɗo mo.

¹¹Ngam maajum kakkilane umrooje e farillaaji e kiitaaji ɗum umranmi on hannde. Ɗowtane ɗum.”

¹²“To on kakkilani kiitaaji ɗi'i, to on ɗowtanake ɗi bee gooŋga, nden kam Jawmiraawo, Allah mooɗon jogititto alkawal mum e mo'ere mum, bana o hunorani kaakiraaɓe mooɗon.

¹³O yiɗan on, o barkiɗinan on haa on ɓesdo ɗuuɗugo, on keɓa ɓikkoy ɗuuɗkoy. O barkiɗinan ƴaamle mon haa on keɓa alkamaari e inaboojam e nebbam ɗuuɗɗam. O ɗuɗɗinan na'i mon e dammooji mon. On keɓan barkaaji ɗi'i fuu nder lesdi ndi o hunani kaakiraaɓe mooɗon o hokkan on ndi.

¹⁴On barkiɗinteeɓe ko ɓuri ummaatooje duniyaaru fuu. Dimaro malla sooya-ngorgaaku wonataa caka mooɗon e caka dabbaaji mon.

¹⁵Jawmiraawo daaynanan on nyawuji fuu. Nyawuji kalluɗi ɗi annduɗon haa Misra, o ukkantaa on koo ngootu maaji. Ammaa o ukkan ɗi fuu dow konne'en mon fuu.

¹⁶Nattine ummaatooje ɗe Jawmiraawo, Allah mooɗon hokkata on fuu. Taa njurmine ɗe. Taa cujidane labbi maaje, ngam ɗum laatanto on tuuforgol.

¹⁷Taa nume: Yimɓe ɓe'e ɓuri en ɗuuɗugo, en mbaawataa riiwugo ɓe.

¹⁸Taa kule ɓe, ciftore ko Jawmiraawo, Allah mooɗon waɗi Firawna e Misra'en fuu.

¹⁹Ciftore masiibooji naawɗi e kaayeefiiji ɗi ngi'ɗon bee gite mon. Ciftore no Jawmiraawo rimɗiniri on bee juŋngo mum fortaaŋgo, semmbiɗŋgo. Ummaatooje ɗe kuloton jonta, o halkan ɗe bana o halkiri Misra'en.

²⁰O ukkanan yimɓe maaje jabatti sey to daɗanɓe, nyukkotooɓe yeeso mooɗon kalki.

²¹Taa kultore yeeso maɓɓe, ngam Jawmiraawo, Allah gonduɗo bee mooɗon, o Allah mawɗo, kulniiɗo.

²²Jawmiraawo, Allah mooɗon riiwan ummaatooje man seɗɗa seɗɗa yeeso mooɗon. On mbaawataa nattingo ɗe law, ngam taa kuuje ladde ɗuuɗa dow mooɗon.

²³Jawmiraawo, Allah mooɗon hokkan on ummaatooje yeeso mon ɗe'e, o ukkanan ɗe kulol e kultoreeŋgol masin haa ɗe natta fuu.

²⁴O hokkan on laamiiɓe maaje boo. On nattinan inɗe maɓɓe haa duniyaaru. Walaa koo gooto dartoto yeeso mooɗon, on nattinan ɓe fuu.

²⁵Ngule suuraaji labbi maɓɓe. Taa cuune cardi e kaŋŋeeri ngonndi haa labbi man, taa kooce ndi. To naa non, on nastan nder tuuforgol, ngam ɗum nyidduɗum haa Jawmiraawo, Allah mooɗon.

²⁶Taa nastine labbi nyidduɗi ɗi'i nder cuuɗi mon, ngam taa nattere wonnde dow maaji wara dow mooɗon boo. Sey on nganya ɗi, on ndaara ɗi bana nyidduɗi, ngam ɗi karamɗi.”