Read Fulfulded Tooktaaki Tawreeta 9 Bible Online

Tooktaaki Tawreeta 9 - Fulfulded bible

Tooktaaki Tawreeta 9

¹“Nane, onon Isra'iila'en! Jonta on ɓadake eeraago maayo Urdun ngam on nyaama maral ummaatooje ɓurduɗe on ɗuuɗeeŋga e semmbe. Berniiji maɓɓe mawɗi, mahi maaji towɗi haa njotti asama.

²Ɗum yimɓe mawɓe e juutɓe, ɗum ɓiɓɓe Anaki'en ɓe annduɗon. On nani woɗɓe mbi'i: Moy waawata dartanaago ɓiɓɓe Anak?

³Annde jonta: Jawmiraawo, Allah mooɗon bee hoore mum aartan on eeraago, o ɗon nanndi bee yiite wulanŋge. O do'an ɓe yeeso mooɗon, haa on ndiiwa ɓe, on nattina ɓe law, bana Jawmiraawo wi'i on.

⁴To Jawmiraawo, Allah mooɗon riiwi ummaatooje ɗe'e yeeso mooɗon, taa nume o marni on lesdi ndi'i daliila adilaaku mooɗon. Naa non, ammaa o riiwan ummaatooje ɗe'e yeeso mooɗon daliila halleende maaje.

⁵Naa ngam adilaaku e gooŋgaaku ɓerɗe mooɗon nastoton lesdi maɓɓe. Ammaa Jawmiraawo, Allah mooɗon jaɓtan ɓe ndi ngam halleende maɓɓe e ngam o hebbina boo hunayeere nde o hunani kaakiraaɓe mooɗon Ibrahiima e Isiyaaku e Yaakubu.

⁶Paame kadi, naa daliila adilaaku mon Jawmiraawo, Allah mooɗon marnataa on lesdi mboondi ndi'i. Onon on caata-ko'e'en.

⁷Taa ngejjite sam no on tikkiniri Jawmiraawo, Allah mooɗon nder ladde. Diga nyannde gurtaaki mon haa lesdi Misra, haa njottiiɗon nokkuure nde'e, on ɗon tuurtani Jawmiraawo.

⁸Haa Horeb boo on toonyi Jawmiraawo, haa o tikkani on, o yiɗino nattingo on.

⁹Nde mi wa'ino hooseere ngam mi jaɓa alluhaaje kaa'e ɗiɗi binndaaɗe bolle alkawal ngal Jawmiraawo haɓɓuno bee mooɗon, mi jooɗi dow hooseere nyalawmaaje cappanɗe nayi e jemmaaje cappanɗe nayi, mi nyaamaay koo ɗume, mi yaraay boo ndiyam.

¹⁰Nden Jawmiraawo hokki yam alluhaaje kaa'e ɗiɗi. Allah bee hoore mum winndi bolle ɗe o wi'no on dow hooseere caka yiite nyalaade nde on mooɓino les hooseere go fuu bee juŋngo maako.

¹¹Haa timmoode nyalawmaaje cappanɗe nayi e jemmaaje cappanɗe nayi go, Jawmiraawo hokki yam alluhaaje kaa'e ɗiɗi binndaaɗe bolle alkawal go.

¹²Nden Jawmiraawo wi'i yam: Umma jippa hooseere nde'e law, ngam ummaatoore ma nde ngurtinɗa lesdi Misra wonnake, law nde seli laawol ngol umrumi nde. Nde waɗani hoore maare lawru ɓolinaandu.

¹³Jawmiraawo wi'i yam boo: Mi yi'i ummaatoore nde'e, hoore maare saati.

¹⁴Kadi accam jonta, haa mi nattina nde, mi majjina innde maare diga duniyaaru. Ammaa an, mi laatinte ummaatoore ɗuuɗnde, marnde baawɗe ɓurannde nde'e.

¹⁵Mi wayliti, mi jippi hooseere. Alluhaaje kaa'e ɗiɗi go ɗon haa juuɗe am. Yiite jammi hooseere.

¹⁶Mi yi'i on mbaɗi hakke dow Jawmiraawo, Allah mooɗon, on mbaɗani ko'e mon lawru gaggel ɓolinaaŋgel, law on celi laawol ngol Jawmiraawo umri on.

¹⁷Mi hooci alluhaaje kaa'e go, mi sakkini ɗe, mi fusi ɗe yeeso mooɗon.

¹⁸Nden mi sujidi yeeso Jawmiraawo fahin nyalawmaaje cappanɗe nayi e jemmaaje cappanɗe nayi. Mi nyaamaay koo ɗume, mi yaraay boo ndiyam. Ngam on mbaɗi hakke dow Jawmiraawo, on mbaɗi ko halli yeeso Allah.

¹⁹Mi hulino tikkere Jawmiraawo saatunde dow mooɗon ngam nattingo on. Ammaa o jaɓi tornde am ngam mooɗon fahin.

²⁰O tikkanino Haruna boo ɗuuɗɗum, o yiɗino mbarugo mo. Ammaa mi tori boo ɗuuɗɗum ngam Haruna saa'i man.

²¹Mi hoo'i gaggel ngel mbaɗɗon haa nastini on nder hakke, mi wuli ngel. Nden mi fusi ngel, mi nami ngel haa ɗiggi, mi rufi doɗɗe man nder maayel ilooyel diga hooseere.

²²Kadiboo on tikkini Jawmiraawo, Allah mooɗon haa Tabe'era e Massa e Kibirot-Hattaawa.

²³Nde Jawmiraawo neli on diga Kaades-Barne'a, o umri on on njaha on kooca lesdi ndi o hokki on, maron. On tuurtani mo, on nuɗɗinaay mo, on ɗowtanaaki umroore maako.

²⁴Diga Jawmiraawo anndi on, on ɗon tuurtana mo.

²⁵Mi sujidi yeeso Jawmiraawo nyalawmaaje cappanɗe nayi e jemmaaje cappanɗe nayi ngam Jawmiraawo wi'no o nattinan on go.

²⁶Mi tori Jawmiraawo, mi wi'i mo: Yaa Allah Jawmiraawo, taa nattin ummaatoore ma nde marɗa, yimɓe ɓe kisnuɗa bee baawɗe ma mawɗe, ɓe ngurtinɗa lesdi Misra bee juŋngo ma semmbiɗŋgo.

²⁷Siftor jaggiiɓe ma: Ibrahiima e Isiyaaku e Yaakubu, taa laar caatal ummaatoore nde'e e halleende maare e hakke maare.

²⁸To naa non, yimɓe lesdi ndi min ngurti haa muuɗum mbi'an: Jawmiraawo waawaay yahrugo ɓe nder lesdi ndi o iinani ɓe. O wanyi ɓe, ngam maajum o wurtini ɓe, o yahri ɓe nder ladde ngam o mbara ɓe ton.

²⁹Ammaa kamɓe ngoni ummaatoore ma, maral ma, ɓe ngurtinɗa lesdi Misra bee baawɗe ma mawɗe e juŋngo ma fortaaŋgo.”